7.5

तेजःक्षमायशःप्राप्ताः स्मितपूर्वाभिभाषिणः

tejaḥkṣamāyaśaḥprāptāḥ smitapūrvābhibhāṣiṇaḥ

7.5.2

क्रोधात् कामार्थहेतोर् वा न ब्रूयुर् अनृतं वचः

krodhāt kāmārthahetor vā na brūyur anṛtaṃ vacaḥ

7.6

तेषाम् अविदितं किंचित् स्वेषु नास्ति परेषु वा

teṣām aviditaṃ kiṃcit sveṣu nāsti pareṣu vā

7.6.2

क्रियमाणं कृतं वापि चारेणापि चिकीर्षितम्

kriyamāṇaṃ kṛtaṃ vāpi cāreṇāpi cikīrṣitam

7.7

कुशला व्यवहारेषु सौहृदेषु परीक्षिताः

kuśalā vyavahāreṣu sauhṛdeṣu parīkṣitāḥ

7.7.2

प्राप्तकालं यथा दण्डं धारयेयुः सुतेष्व् अपि

prāptakālaṃ yathā daṇḍaṃ dhārayeyuḥ suteṣv api

7.8

कोशसंग्रहणे युक्ता बलस्य च परिग्रहे

kośasaṃgrahaṇe yuktā balasya ca parigrahe

7.8.2

अहितं चापि पुरुषं न विहिंस्युर् अदूषकम्

ahitaṃ cāpi puruṣaṃ na vihiṃsyur adūṣakam

7.9

वीरांश् च नियतोत्साहा राजशास्त्रम् अनुष्ठिताः

vīrāṃś ca niyatotsāhā rājaśāstram anuṣṭhitāḥ

7.9.2

शुचीनां रक्षितारश् च नित्यं विषयवासिनाम्

śucīnāṃ rakṣitāraś ca nityaṃ viṣayavāsinām

7.10

ब्रह्मक्षत्रम् अहिंसन्तस् ते कोशं समपूरयन्

brahmakṣatram ahiṃsantas te kośaṃ samapūrayan

7.10.2

सुतीक्ष्णदण्डाः सम्प्रेक्ष्य पुरुषस्य बलाबलम्

sutīkṣṇadaṇḍāḥ samprekṣya puruṣasya balābalam

7.11

शुचीनाम् एकबुद्धीनां सर्वेषां सम्प्रजानताम्

śucīnām ekabuddhīnāṃ sarveṣāṃ samprajānatām

7.11.2

नासीत् पुरे वा राष्ट्रे वा मृषावादी नरः क्वचित्

nāsīt pure vā rāṣṭre vā mṛṣāvādī naraḥ kvacit

7.12

कश्चिन् न दुष्टस् तत्रासीत् परदाररतिर् नरः

kaścin na duṣṭas tatrāsīt paradāraratir naraḥ

7.12.2

प्रशान्तं सर्वम् एवासीद् राष्ट्रं पुरवरं च तत्

praśāntaṃ sarvam evāsīd rāṣṭraṃ puravaraṃ ca tat

7.13

सुवाससः सुवेशाश् च ते च सर्वे सुशीलिनः

suvāsasaḥ suveśāś ca te ca sarve suśīlinaḥ

7.13.2

हितार्थं च नरेन्द्रस्य जाग्रतो नयचक्षुषा

hitārthaṃ ca narendrasya jāgrato nayacakṣuṣā

7.14

गुरौ गुणगृहीताश् च प्रख्याताश् च पराक्रमैः

gurau guṇagṛhītāś ca prakhyātāś ca parākramaiḥ

7.14.2

विदेशेष्व् अपि विज्ञाताः सर्वतो बुद्धिनिश्चयात्

videśeṣv api vijñātāḥ sarvato buddhiniścayāt

Rāmāyaṇa