7.29.2

एतन् मे प्रियम् आख्यातुः किं वा भूयः करोमि ते

etan me priyam ākhyātuḥ kiṃ vā bhūyaḥ karomi te

7.30

रामे वा भरते वाहं विशेषं नोपलक्षये

rāme vā bharate vāhaṃ viśeṣaṃ nopalakṣaye

7.30.2

तस्मात् तुष्टास्मि यद् राजा रामं राज्ये ऽभिषेक्ष्यति

tasmāt tuṣṭāsmi yad rājā rāmaṃ rājye 'bhiṣekṣyati

7.31

न मे परं किंचिद् इतस् त्वया पुनः प्रियं प्रियार्हे सुवचं वचो वरम्

na me paraṃ kiṃcid itas tvayā punaḥ priyaṃ priyārhe suvacaṃ vaco varam

7.31.2

तथा ह्य् अवोचस् त्वम् अतः प्रियोत्तरं वरं परं ते प्रददामि तं वृणु

tathā hy avocas tvam ataḥ priyottaraṃ varaṃ paraṃ te pradadāmi taṃ vṛṇu

8.1

मन्थरा त्व् अभ्यसूय्यैनाम् उत्सृज्याभरणं च तत्

mantharā tv abhyasūyyainām utsṛjyābharaṇaṃ ca tat

8.1.2

उवाचेदं ततो वाक्यं कोपदुःखसमन्विता

uvācedaṃ tato vākyaṃ kopaduḥkhasamanvitā

8.2

हर्षं किम् इदम् अस्थाने कृतवत्य् असि बालिशे

harṣaṃ kim idam asthāne kṛtavaty asi bāliśe

8.2.2

शोकसागरमध्यस्थम् आत्मानं नावबुध्यसे

śokasāgaramadhyastham ātmānaṃ nāvabudhyase

8.3

सुभगा खलु कौसल्या यस्याः पुत्रो ऽभिषेक्ष्यते

subhagā khalu kausalyā yasyāḥ putro 'bhiṣekṣyate

8.3.2

यौवराज्येन महता श्वः पुष्येण द्विजोत्तमैः

yauvarājyena mahatā śvaḥ puṣyeṇa dvijottamaiḥ

8.4

प्राप्तां सुमहतीं प्रीतिं प्रतीतां तां हतद्विषम्

prāptāṃ sumahatīṃ prītiṃ pratītāṃ tāṃ hatadviṣam

8.4.2

उपस्थास्यसि कौसल्यां दासीव त्वं कृताञ्जलिः

upasthāsyasi kausalyāṃ dāsīva tvaṃ kṛtāñjaliḥ

8.5

हृष्टाः खलु भविष्यन्ति रामस्य परमाः स्त्रियः

hṛṣṭāḥ khalu bhaviṣyanti rāmasya paramāḥ striyaḥ

8.5.2

अप्रहृष्टा भविष्यन्ति स्नुषास् ते भरतक्षये

aprahṛṣṭā bhaviṣyanti snuṣās te bharatakṣaye

8.6

तां दृष्ट्वा परमप्रीतां ब्रुवन्तीं मन्थरां ततः

tāṃ dṛṣṭvā paramaprītāṃ bruvantīṃ mantharāṃ tataḥ

8.6.2

रामस्यैव गुणान् देवी कैकेयी प्रशशंस ह

rāmasyaiva guṇān devī kaikeyī praśaśaṃsa ha

8.7

धर्मज्ञो गुरुभिर् दान्तः कृतज्ञः सत्यवाक् शुचिः

dharmajño gurubhir dāntaḥ kṛtajñaḥ satyavāk śuciḥ

8.7.2

रामो राज्ञः सुतो ज्येष्ठो यौवराज्यम् अतो ऽर्हति

rāmo rājñaḥ suto jyeṣṭho yauvarājyam ato 'rhati

8.8

भ्रातॄन् भृत्यांश् च दीर्घायुः पितृवत् पालयिष्यति

bhrātṝn bhṛtyāṃś ca dīrghāyuḥ pitṛvat pālayiṣyati

Rāmāyaṇa