6.28

ततस् तद् इन्द्रक्षयसंनिभं पुरं दिदृक्षुभिर् जानपदैर् उपागतैः

tatas tad indrakṣayasaṃnibhaṃ puraṃ didṛkṣubhir jānapadair upāgataiḥ

6.28.2

समन्ततः सस्वनम् आकुलं बभौ समुद्रयादोभिर् इवार्णवोदकम्

samantataḥ sasvanam ākulaṃ babhau samudrayādobhir ivārṇavodakam

7.1

ज्ञातिदासी यतो जाता कैकेय्यास् तु सहोषिता

jñātidāsī yato jātā kaikeyyās tu sahoṣitā

7.1.2

प्रासादं चन्द्रसंकाशम् आरुरोह यदृच्छया

prāsādaṃ candrasaṃkāśam āruroha yadṛcchayā

7.2

सिक्तराजपथां कृत्स्नां प्रकीर्णकमलोत्पलाम्

siktarājapathāṃ kṛtsnāṃ prakīrṇakamalotpalām

7.2.2

अयोध्यां मन्थरा तस्मात् प्रासादाद् अन्ववैक्षत

ayodhyāṃ mantharā tasmāt prāsādād anvavaikṣata

7.3

पताकाभिर् वरार्हाभिर् ध्वजैश् च समलंकृताम्

patākābhir varārhābhir dhvajaiś ca samalaṃkṛtām

7.3.2

सिक्तां चन्दनतोयैश् च शिरःस्नातजनैर् वृताम्

siktāṃ candanatoyaiś ca śiraḥsnātajanair vṛtām

7.4

अविदूरे स्थितां दृष्ट्वा धात्रीं पप्रच्छ मन्थरा

avidūre sthitāṃ dṛṣṭvā dhātrīṃ papraccha mantharā

7.4.2

उत्तमेनाभिसंयुक्ता हर्षेणार्थपरा सती

uttamenābhisaṃyuktā harṣeṇārthaparā satī

7.5

राममाता धनं किं नु जनेभ्यः सम्प्रयच्छति

rāmamātā dhanaṃ kiṃ nu janebhyaḥ samprayacchati

7.5.2

अतिमात्रं प्रहर्षो ऽयं किं जनस्य च शंस मे

atimātraṃ praharṣo 'yaṃ kiṃ janasya ca śaṃsa me

7.5.3

कारयिष्यति किं वापि सम्प्रहृष्टो महीपतिः

kārayiṣyati kiṃ vāpi samprahṛṣṭo mahīpatiḥ

7.6

विदीर्यमाणा हर्षेण धात्री परमया मुदा

vidīryamāṇā harṣeṇa dhātrī paramayā mudā

7.6.2

आचचक्षे ऽथ कुब्जायै भूयसीं राघवे श्रियम्

ācacakṣe 'tha kubjāyai bhūyasīṃ rāghave śriyam

7.7

श्वः पुष्येण जितक्रोधं यौवराज्येन राघवम्

śvaḥ puṣyeṇa jitakrodhaṃ yauvarājyena rāghavam

7.7.2

राजा दशरथो रामम् अभिषेचयितानघम्

rājā daśaratho rāmam abhiṣecayitānagham

7.8

धात्र्यास् तु वचनं श्रुत्वा कुब्जा क्षिप्रम् अमर्षिता

dhātryās tu vacanaṃ śrutvā kubjā kṣipram amarṣitā

7.8.2

कैलासशिखराकारात् प्रासादाद् अवरोहत

kailāsaśikharākārāt prāsādād avarohata

7.9

सा दह्यमाना कोपेन मन्थरा पापदर्शिनी

sā dahyamānā kopena mantharā pāpadarśinī

Rāmāyaṇa