4.17

अपि चाद्याशुभान् राम स्वप्नान् पश्यामि दारुणान्

api cādyāśubhān rāma svapnān paśyāmi dāruṇān

4.17.2

सनिर्घाता महोल्काश् च पतन्तीह महास्वनाः

sanirghātā maholkāś ca patantīha mahāsvanāḥ

4.18

अवष्टब्धं च मे राम नक्षत्रं दारुणैर् ग्रहैः

avaṣṭabdhaṃ ca me rāma nakṣatraṃ dāruṇair grahaiḥ

4.18.2

आवेदयन्ति दैवज्ञाः सूर्याङ्गारकराहुभिः

āvedayanti daivajñāḥ sūryāṅgārakarāhubhiḥ

4.19

प्रायेण हि निमित्तानाम् ईदृशानां समुद्भवे

prāyeṇa hi nimittānām īdṛśānāṃ samudbhave

4.19.2

राजा वा मृत्युम् आप्नोति घोरां वापदम् ऋच्छति

rājā vā mṛtyum āpnoti ghorāṃ vāpadam ṛcchati

4.20

तद् यावद् एव मे चेतो न विमुह्यति राघव

tad yāvad eva me ceto na vimuhyati rāghava

4.20.2

तावद् एवाभिषिञ्चस्व चला हि प्राणिनां मतिः

tāvad evābhiṣiñcasva calā hi prāṇināṃ matiḥ

4.21

अद्य चन्द्रो ऽभ्युपगतः पुष्यात् पूर्वं पुनर् वसुम्

adya candro 'bhyupagataḥ puṣyāt pūrvaṃ punar vasum

4.21.2

श्वः पुष्ययोगं नियतं वक्ष्यन्ते दैवचिन्तकाः

śvaḥ puṣyayogaṃ niyataṃ vakṣyante daivacintakāḥ

4.22

तत्र पुष्ये ऽभिषिञ्चस्व मनस् त्वरयतीव माम्

tatra puṣye 'bhiṣiñcasva manas tvarayatīva mām

4.22.2

श्वस् त्वाहम् अभिषेक्ष्यामि यौवराज्ये परंतप

śvas tvāham abhiṣekṣyāmi yauvarājye paraṃtapa

4.23

तस्मात् त्वयाद्य व्रतिना निशेयं नियतात्मना

tasmāt tvayādya vratinā niśeyaṃ niyatātmanā

4.23.2

सह वध्वोपवस्तव्या दर्भप्रस्तरशायिना

saha vadhvopavastavyā darbhaprastaraśāyinā

4.24

सुहृदश् चाप्रमत्तास् त्वां रक्षन्त्व् अद्य समन्ततः

suhṛdaś cāpramattās tvāṃ rakṣantv adya samantataḥ

4.24.2

भवन्ति बहुविघ्नानि कार्याण्य् एवंविधानि हि

bhavanti bahuvighnāni kāryāṇy evaṃvidhāni hi

4.25

विप्रोषितश् च भरतो यावद् एव पुराद् इतः

viproṣitaś ca bharato yāvad eva purād itaḥ

4.25.2

तावद् एवाभिषेकस् ते प्राप्तकालो मतो मम

tāvad evābhiṣekas te prāptakālo mato mama

4.26

कामं खलु सतां वृत्ते भ्राता ते भरतः स्थितः

kāmaṃ khalu satāṃ vṛtte bhrātā te bharataḥ sthitaḥ

4.26.2

ज्येष्ठानुवर्ती धर्मात्मा सानुक्रोशो जितेन्द्रियः

jyeṣṭhānuvartī dharmātmā sānukrośo jitendriyaḥ

Rāmāyaṇa