5.22.2

पुरीम् आवासयामास राजा दशरथस् तदा

purīm āvāsayāmāsa rājā daśarathas tadā

5.23

ताम् अग्निमद्भिर् गुणवद्भिर् आवृतां द्विजोत्तमैर् वेदषडङ्गपारगैः

tām agnimadbhir guṇavadbhir āvṛtāṃ dvijottamair vedaṣaḍaṅgapāragaiḥ

5.23.2

सहस्रदैः सत्यरतैर् महात्मभिर् महर्षिकल्पैर् ऋषिभिश् च केवलैः

sahasradaiḥ satyaratair mahātmabhir maharṣikalpair ṛṣibhiś ca kevalaiḥ

6.1

पुर्यां तस्याम् अयोध्यायां वेदवित् सर्वसंग्रहः

puryāṃ tasyām ayodhyāyāṃ vedavit sarvasaṃgrahaḥ

6.1.2

दीर्घदर्शी महातेजाः पौरजानपदप्रियः

dīrghadarśī mahātejāḥ paurajānapadapriyaḥ

6.2

इक्ष्वाकूणाम् अतिरथो यज्वा धर्मरतो वशी

ikṣvākūṇām atiratho yajvā dharmarato vaśī

6.2.2

महर्षिकल्पो राजर्षिस् त्रिषु लोकेषु विश्रुतः

maharṣikalpo rājarṣis triṣu lokeṣu viśrutaḥ

6.3

बलवान् निहतामित्रो मित्रवान् विजितेन्द्रियः

balavān nihatāmitro mitravān vijitendriyaḥ

6.3.2

धनैश् च संचयैश् चान्यैः शक्रवैश्रवणोपमः

dhanaiś ca saṃcayaiś cānyaiḥ śakravaiśravaṇopamaḥ

6.4

यथा मनुर् महातेजा लोकस्य परिरक्षिता

yathā manur mahātejā lokasya parirakṣitā

6.4.2

तथा दशरथो राजा वसञ् जगद् अपालयत्

tathā daśaratho rājā vasañ jagad apālayat

6.5

तेन सत्याभिसंधेन त्रिवर्गम् अनुतिष्ठता

tena satyābhisaṃdhena trivargam anutiṣṭhatā

6.5.2

पालिता सा पुरी श्रेष्ठेन्द्रेण इवामरावती

pālitā sā purī śreṣṭhendreṇa ivāmarāvatī

6.6

तस्मिन् पुरवरे हृष्टा धर्मात्मना बहु श्रुताः

tasmin puravare hṛṣṭā dharmātmanā bahu śrutāḥ

6.6.2

नरास् तुष्टाधनैः स्वैः स्वैर् अलुब्धाः सत्यवादिनः

narās tuṣṭādhanaiḥ svaiḥ svair alubdhāḥ satyavādinaḥ

6.7

नाल्पसंनिचयः कश्चिद् आसीत् तस्मिन् पुरोत्तमे

nālpasaṃnicayaḥ kaścid āsīt tasmin purottame

6.7.2

कुटुम्बी यो ह्य् असिद्धार्थो ऽगवाश्वधनधान्यवान्

kuṭumbī yo hy asiddhārtho 'gavāśvadhanadhānyavān

6.8

कामी वा न कदर्यो वा नृशंसः पुरुषः क्वचित्

kāmī vā na kadaryo vā nṛśaṃsaḥ puruṣaḥ kvacit

6.8.2

द्रष्टुं शक्यम् अयोध्यायां नाविद्वान् न च नास्तिकः

draṣṭuṃ śakyam ayodhyāyāṃ nāvidvān na ca nāstikaḥ

6.9

सर्वे नराश् च नार्यश् च धर्मशीलाः सुसंयताः

sarve narāś ca nāryaś ca dharmaśīlāḥ susaṃyatāḥ

Rāmāyaṇa