2.33.2

पश्यामो यौवराज्यस्थं तव राजोत्तमात्मजम्

paśyāmo yauvarājyasthaṃ tava rājottamātmajam

2.34

तं देवदेवोपमम् आत्मजं ते सर्वस्य लोकस्य हिते निविष्टम्

taṃ devadevopamam ātmajaṃ te sarvasya lokasya hite niviṣṭam

2.34.2

हिताय नः क्षिप्रम् उदारजुष्टं मुदाभिषेक्तुं वरद त्वम् अर्हसि

hitāya naḥ kṣipram udārajuṣṭaṃ mudābhiṣektuṃ varada tvam arhasi

3.1

तेषाम् अञ्जलिपद्मानि प्रगृहीतानि सर्वशः

teṣām añjalipadmāni pragṛhītāni sarvaśaḥ

3.1.2

प्रतिगृह्याब्रवीद् राजा तेभ्यः प्रियहितं वचः

pratigṛhyābravīd rājā tebhyaḥ priyahitaṃ vacaḥ

3.2

अहो ऽस्मि परमप्रीतः प्रभावश् चातुलो मम

aho 'smi paramaprītaḥ prabhāvaś cātulo mama

3.2.2

यन् मे ज्येष्ठं प्रियं पुत्रं यौवराज्यस्थम् इच्छथ

yan me jyeṣṭhaṃ priyaṃ putraṃ yauvarājyastham icchatha

3.3

इति प्रत्यर्च्य तान् राजा ब्राह्मणान् इदम् अब्रवीत्

iti pratyarcya tān rājā brāhmaṇān idam abravīt

3.3.2

वसिष्ठं वामदेवं च तेषाम् एवोपशृण्वताम्

vasiṣṭhaṃ vāmadevaṃ ca teṣām evopaśṛṇvatām

3.4

चैत्रः श्रीमान् अयं मासः पुण्यः पुष्पितकाननः

caitraḥ śrīmān ayaṃ māsaḥ puṇyaḥ puṣpitakānanaḥ

3.4.2

यौवराज्याय रामस्य सर्वम् एवोपकल्प्यताम्

yauvarājyāya rāmasya sarvam evopakalpyatām

3.5

कृतम् इत्य् एव चाब्रूताम् अभिगम्य जगत्पतिम्

kṛtam ity eva cābrūtām abhigamya jagatpatim

3.5.2

यथोक्तवचनं प्रीतौ हर्षयुक्तौ द्विजर्षभौ

yathoktavacanaṃ prītau harṣayuktau dvijarṣabhau

3.6

ततः सुमन्त्रं द्युतिमान् राजा वचनम् अब्रवीत्

tataḥ sumantraṃ dyutimān rājā vacanam abravīt

3.6.2

रामः कृतात्मा भवता शीघ्रम् आनीयताम् इति

rāmaḥ kṛtātmā bhavatā śīghram ānīyatām iti

3.7

स तथेति प्रतिज्ञाय सुमन्त्रो राजशासनात्

sa tatheti pratijñāya sumantro rājaśāsanāt

3.7.2

रामं तत्रानयांचक्रे रथेन रथिनां वरम्

rāmaṃ tatrānayāṃcakre rathena rathināṃ varam

3.8

अथ तत्र समासीनास् तदा दशरथं नृपम्

atha tatra samāsīnās tadā daśarathaṃ nṛpam

3.8.2

प्राच्योदीच्याः प्रतीच्याश् च दाक्षिणात्याश् च भूमिपाः

prācyodīcyāḥ pratīcyāś ca dākṣiṇātyāś ca bhūmipāḥ

3.9

म्लेच्छाश् चार्याश् च ये चान्ये वनशैलान्तवासिनः

mlecchāś cāryāś ca ye cānye vanaśailāntavāsinaḥ

Rāmāyaṇa