1.1

तपःस्वाध्यायनिरतं तपस्वी वाग्विदां वरम्

tapaḥsvādhyāyanirataṃ tapasvī vāgvidāṃ varam

1.1.2

नारदं परिपप्रच्छ वाल्मीकिर् मुनिपुंगवम्

nāradaṃ paripapraccha vālmīkir munipuṃgavam

1.2

को न्व् अस्मिन् साम्प्रतं लोके गुणवान् कश् च वीर्यवान्

ko nv asmin sāmprataṃ loke guṇavān kaś ca vīryavān

1.2.2

धर्मज्ञश् च कृतज्ञश् च सत्यवाक्यो दृढव्रतः

dharmajñaś ca kṛtajñaś ca satyavākyo dṛḍhavrataḥ

1.3

चारित्रेण च को युक्तः सर्वभूतेषु को हितः

cāritreṇa ca ko yuktaḥ sarvabhūteṣu ko hitaḥ

1.3.2

विद्वान् कः कः समर्थश् च कश् चैकप्रियदर्शनः

vidvān kaḥ kaḥ samarthaś ca kaś caikapriyadarśanaḥ

1.4

आत्मवान् को जितक्रोधो मतिमान् को ऽनसूयकः

ātmavān ko jitakrodho matimān ko 'nasūyakaḥ

1.4.2

कस्य बिभ्यति देवाश् च जातरोषस्य संयुगे

kasya bibhyati devāś ca jātaroṣasya saṃyuge

1.5

एतद् इच्छाम्य् अहं श्रोतुं परं कौतूहलं हि मे

etad icchāmy ahaṃ śrotuṃ paraṃ kautūhalaṃ hi me

1.5.2

महर्षे त्वं समर्थो ऽसि ज्ञातुम् एवंविधं नरम्

maharṣe tvaṃ samartho 'si jñātum evaṃvidhaṃ naram

1.6

श्रुत्वा चैतत् त्रिलोकज्ञो वाल्मीकेर् नारदो वचः

śrutvā caitat trilokajño vālmīker nārado vacaḥ

1.6.2

श्रूयताम् इति चामन्त्र्य प्रहृष्टो वाक्यम् अब्रवीत्

śrūyatām iti cāmantrya prahṛṣṭo vākyam abravīt

1.7

बहवो दुर्लभाश् चैव ये त्वया कीर्तिता गुणाः

bahavo durlabhāś caiva ye tvayā kīrtitā guṇāḥ

1.7.2

मुने वक्ष्याम्य् अहं बुद्ध्वा तैर् युक्तः श्रूयतां नरः

mune vakṣyāmy ahaṃ buddhvā tair yuktaḥ śrūyatāṃ naraḥ

1.8

इक्ष्वाकुवंशप्रभवो रामो नाम जनैः श्रुतः

ikṣvākuvaṃśaprabhavo rāmo nāma janaiḥ śrutaḥ

1.8.2

नियतात्मा महावीर्यो द्युतिमान् धृतिमान् वशी

niyatātmā mahāvīryo dyutimān dhṛtimān vaśī

1.9

बुद्धिमान् नीतिमान् वाग्मी श्रीमाञ् शत्रुनिबर्हणः

buddhimān nītimān vāgmī śrīmāñ śatrunibarhaṇaḥ

1.9.2

विपुलांसो महाबाहुः कम्बुग्रीवो महाहनुः

vipulāṃso mahābāhuḥ kambugrīvo mahāhanuḥ

1.10

महोरस्को महेष्वासो गूढजत्रुर् अरिंदमः

mahorasko maheṣvāso gūḍhajatrur ariṃdamaḥ

1.10.2

आजानुबाहुः सुशिराः सुललाटः सुविक्रमः

ājānubāhuḥ suśirāḥ sulalāṭaḥ suvikramaḥ

Rāmāyaṇa