Prabh.33

अजशृङ्गी कटुस् तिक्ता कफार्शःशूलशोफजित्

ajaśṛṅgī kaṭus tiktā kaphārśaḥśūlaśophajit

Prabh.33.2

चक्षुष्या श्वासहृद्रोगविषकासातिकुष्ठजित्

cakṣuṣyā śvāsahṛdrogaviṣakāsātikuṣṭhajit

Prabh.34

अजशृङ्गीफलं तिक्तं कटूष्णं कफवातजित्

ajaśṛṅgīphalaṃ tiktaṃ kaṭūṣṇaṃ kaphavātajit

Prabh.34.2

जठरानलकृत् हृद्यं रुचिरं लवणाम्लकम्

jaṭharānalakṛt hṛdyaṃ ruciraṃ lavaṇāmlakam

Prabh.35

स्यात् काश्मर्यः काश्मरी कृष्णवृन्ता हीरा भद्रा सर्वतोभद्रिका च

syāt kāśmaryaḥ kāśmarī kṛṣṇavṛntā hīrā bhadrā sarvatobhadrikā ca

Prabh.35.2

श्रीपर्णी स्यात् सिन्धुपर्णी सुभद्रा कम्भारी सा कट्फला भद्रपर्णी

śrīparṇī syāt sindhuparṇī subhadrā kambhārī sā kaṭphalā bhadraparṇī

Prabh.36

कुमुदा च गोपभद्रा विदारिणी क्षीरिणी महाभद्रा

kumudā ca gopabhadrā vidāriṇī kṣīriṇī mahābhadrā

Prabh.36.2

मधुपर्णी स्वभद्रा कृष्णा श्वेता च रोहिणी गृष्टिः

madhuparṇī svabhadrā kṛṣṇā śvetā ca rohiṇī gṛṣṭiḥ

Prabh.37

स्थूलत्वचा मधुमती सुफला मेदिनी महाकुमुदा

sthūlatvacā madhumatī suphalā medinī mahākumudā

Prabh.37.2

सुदृढत्वचा च कथिता विज्ञेयोनत्रिंशतिर् नाम्नाम्

sudṛḍhatvacā ca kathitā vijñeyonatriṃśatir nāmnām

Prabh.38

काश्मरी कटुका तिक्ता गुरूष्णा कफशोफनुत्

kāśmarī kaṭukā tiktā gurūṣṇā kaphaśophanut

Prabh.38.2

त्रिदोषविषदाहार्तिज्वरतृष्णास्रदोषजित्

tridoṣaviṣadāhārtijvaratṛṣṇāsradoṣajit

Prabh.39

अश्मन्तकश् चेन्दुकश् च कुद्दालश् चाम्लपत्त्रकः

aśmantakaś cendukaś ca kuddālaś cāmlapattrakaḥ

Prabh.39.2

श्लक्ष्णत्वक् पीलुपत्त्रश् च स्मृतो यमलपत्त्रकः

ślakṣṇatvak pīlupattraś ca smṛto yamalapattrakaḥ

Prabh.40

अश्मान्तकेन्दुशफरी शिलान्तश् चाम्बुदः स्मृतः

aśmāntakenduśapharī śilāntaś cāmbudaḥ smṛtaḥ

Prabh.40.2

पाषाणान्तक इत्य् उक्तो वह्निचन्द्रमिताह्वयः

pāṣāṇāntaka ity ukto vahnicandramitāhvayaḥ

Prabh.41

अश्मन्तकः स्यान् मधुरः कषायः सुशीतलः पित्तहरः प्रमेहजित्

aśmantakaḥ syān madhuraḥ kaṣāyaḥ suśītalaḥ pittaharaḥ pramehajit

Prabh.41.2

विदाहतृष्णाविषमज्वरापहो विषार्तिविच्छर्दिहरश् च भूतजित्

vidāhatṛṣṇāviṣamajvarāpaho viṣārtivicchardiharaś ca bhūtajit

Prabh.42

अथ भवति कर्णिकारो राजतरुः प्रग्रहश् च कृतमालः

atha bhavati karṇikāro rājataruḥ pragrahaś ca kṛtamālaḥ

Prabh.42.2

सुफलश् च परिव्याधो व्याधिरिपुः पङ्क्तिबीजको वसुसंज्ञः

suphalaś ca parivyādho vyādhiripuḥ paṅktibījako vasusaṃjñaḥ

Rājanighaṇṭu