1.51

यतिश् च ब्रह्मचारी च पक्वान्नस्वामिनाव् उभौ

yatiś ca brahmacārī ca pakvānnasvāmināv ubhau

1.51.2

तयोर् अन्नम् अदत्त्वा तु भुक्त्वा चान्द्रायणं चरेत्

tayor annam adattvā tu bhuktvā cāndrāyaṇaṃ caret

1.52

दद्याच् च भिक्षात्रितयं परिव्राड् ब्रह्मचारिणाम्

dadyāc ca bhikṣātritayaṃ parivrāḍ brahmacāriṇām

1.52.2

इच्छया च ततो दद्याद् विभवे सत्यवारितम्

icchayā ca tato dadyād vibhave satyavāritam

1.53

यतिहस्ते जलं दद्याद् भैक्षं दद्यात् पुनर् जलम्

yatihaste jalaṃ dadyād bhaikṣaṃ dadyāt punar jalam

1.53.2

तद् भैक्ष्यं मेरुणा तुल्यं तज् जलं सागरोपमम्

tad bhaikṣyaṃ meruṇā tulyaṃ taj jalaṃ sāgaropamam

1.54

यस्य छत्रं हयश् चैव कुञ्जरारोहम् ऋद्धिमत्

yasya chatraṃ hayaś caiva kuñjarāroham ṛddhimat

1.54.2

ऐन्द्रं स्थानम् उपासीत तस्मात् तं न विचारयेत्

aindraṃ sthānam upāsīta tasmāt taṃ na vicārayet

1.55

वैश्वदेवकृतं पापं शक्तो भिक्षुर् व्यपोहितुम्

vaiśvadevakṛtaṃ pāpaṃ śakto bhikṣur vyapohitum

1.55.2

न हि भिक्षुकृतान् दोषान् वैश्वदेवो व्यपोहति

na hi bhikṣukṛtān doṣān vaiśvadevo vyapohati

1.56

अकृत्वा वैश्वदेवं तु भुञ्जते ये द्विजाधमाः

akṛtvā vaiśvadevaṃ tu bhuñjate ye dvijādhamāḥ

1.56.2

सर्वे ते निष्फला ज्ञेयाः पतन्ति नरके ऽशुचौ

sarve te niṣphalā jñeyāḥ patanti narake 'śucau

1.57

वैश्वदेवविहीना ये आतिथ्येन बहिष्कृताः

vaiśvadevavihīnā ye ātithyena bahiṣkṛtāḥ

1.57.2

सर्वे ते नरकं यान्ति काकयोनिं व्रजन्ति च

sarve te narakaṃ yānti kākayoniṃ vrajanti ca

1.58

पापो वा यदि चण्डालो विप्रघ्नः पितृघातकः

pāpo vā yadi caṇḍālo vipraghnaḥ pitṛghātakaḥ

1.58.2

वैश्वदेवे तु सम्प्राप्तः सो ऽतिथिः स्वर्गसंक्रमः

vaiśvadeve tu samprāptaḥ so 'tithiḥ svargasaṃkramaḥ

1.59

यो वेष्टितशिरा भुङ्क्ते यो भुङ्क्ते दक्षिणामुखः

yo veṣṭitaśirā bhuṅkte yo bhuṅkte dakṣiṇāmukhaḥ

1.59.2

वामपादे करं न्यस्य तद् वै रक्षांसि भुञ्जते

vāmapāde karaṃ nyasya tad vai rakṣāṃsi bhuñjate

1.60

अव्रता ह्य् अनधीयाना यत्र भैक्षचरा द्विजाः

avratā hy anadhīyānā yatra bhaikṣacarā dvijāḥ

1.60.2

तं ग्रामं दण्डयेद् राजा चोरभक्तप्रदो हि सः

taṃ grāmaṃ daṇḍayed rājā corabhaktaprado hi saḥ

Parāśaradharmasaṃhitā