7.18

रजोनिवृत्तौ गम्या स्त्री गृहकर्मणि चैव हि

rajonivṛttau gamyā strī gṛhakarmaṇi caiva hi

7.18.2

प्रथमे ऽहनि चण्डाली द्वितीये ब्रह्मघातिनी

prathame 'hani caṇḍālī dvitīye brahmaghātinī

7.19

तृतीये रजकी प्रोक्ता चतुर्थे ऽहनि शुध्यति

tṛtīye rajakī proktā caturthe 'hani śudhyati

7.19.2

आतुरे स्नानोत्पन्ने दशकृत्वो ह्य् अनातुरः

āture snānotpanne daśakṛtvo hy anāturaḥ

7.20

स्नात्वा स्नात्वा स्पृशेद् एनं ततः शुध्येत् स आतुरः

snātvā snātvā spṛśed enaṃ tataḥ śudhyet sa āturaḥ

7.20.2

उच्छिष्टोच्छिष्टसंस्पृष्टः शुना शूद्रेण वा द्विजः

ucchiṣṭocchiṣṭasaṃspṛṣṭaḥ śunā śūdreṇa vā dvijaḥ

7.21

उपोष्य रजनीम् एकां पञ्चगव्येन शुध्यति

upoṣya rajanīm ekāṃ pañcagavyena śudhyati

7.21.2

अनुच्छिष्टेन शूद्रेण स्पर्शे स्नानं विधीयते

anucchiṣṭena śūdreṇa sparśe snānaṃ vidhīyate

7.22

तेनोच्छिष्टेन संस्पृष्टः प्राजापत्यं समाचरेत्

tenocchiṣṭena saṃspṛṣṭaḥ prājāpatyaṃ samācaret

7.22.2

भस्मना शुध्यते कांस्यं सुरया यन् न लिप्यते

bhasmanā śudhyate kāṃsyaṃ surayā yan na lipyate

7.23

सुरामात्रेण संस्पृष्टं शुध्यते ऽग्न्युपलेखनैः

surāmātreṇa saṃspṛṣṭaṃ śudhyate 'gnyupalekhanaiḥ

7.23.2

गवाघ्रातानि कांस्यानि श्वकाकोपहतानि च

gavāghrātāni kāṃsyāni śvakākopahatāni ca

7.24

शुध्यन्ति दशभिः क्षारैः शूद्रोच्छिष्टानि यानि च

śudhyanti daśabhiḥ kṣāraiḥ śūdrocchiṣṭāni yāni ca

7.24.2

गण्डूषं पादशौचं च कृत्वा वै कांस्यभाजने

gaṇḍūṣaṃ pādaśaucaṃ ca kṛtvā vai kāṃsyabhājane

7.25

षण्मासान् भुवि निःक्षिप्य उद्धृत्य पुनर् आहरेत्

ṣaṇmāsān bhuvi niḥkṣipya uddhṛtya punar āharet

7.25.2

आयसेष्व् आयसानां च सीसस्याग्नौ विशोधनम्

āyaseṣv āyasānāṃ ca sīsasyāgnau viśodhanam

7.26

दन्तम् अस्थि तथा भृङ्गं रूप्यं सौवर्णभाजनम्

dantam asthi tathā bhṛṅgaṃ rūpyaṃ sauvarṇabhājanam

7.26.2

मणिपाषाणपात्राणीत्य् एतान् प्रक्षालयेज् जलैः

maṇipāṣāṇapātrāṇīty etān prakṣālayej jalaiḥ

7.27

पाषाणे तु पुनर् घर्षः शुद्धिर् एवम् उदाहृता

pāṣāṇe tu punar gharṣaḥ śuddhir evam udāhṛtā

7.27.2

मृण्मये दहनाच्छुद्धिर् धान्यानां मार्जनाद् अपि

mṛṇmaye dahanācchuddhir dhānyānāṃ mārjanād api

Parāśaradharmasaṃhitā