6.33

एकैकं ग्रासम् अश्नीयाद् गोमूत्रयावकस्य च

ekaikaṃ grāsam aśnīyād gomūtrayāvakasya ca

6.33.2

दशाहं नियमस्थस्य व्रतं तत् तु विनिर्दिशेत्

daśāhaṃ niyamasthasya vrataṃ tat tu vinirdiśet

6.34

अविज्ञातस् तु चण्डालो यत्र वेश्मनि तिष्ठति

avijñātas tu caṇḍālo yatra veśmani tiṣṭhati

6.34.2

विज्ञाते तूपसन्नस्य द्विजाः कुर्वन्त्य् अनुग्रहम्

vijñāte tūpasannasya dvijāḥ kurvanty anugraham

6.35

मुनिवक्त्रोद्गतान् धर्मान् गायन्तो वेदपारगाः

munivaktrodgatān dharmān gāyanto vedapāragāḥ

6.35.2

पतन्तम् उद्धरेयुस् तं धर्मज्ञाः पापसंकरात्

patantam uddhareyus taṃ dharmajñāḥ pāpasaṃkarāt

6.36

दध्ना च सर्पिषा चैव क्षीरगोमूत्रयावकम्

dadhnā ca sarpiṣā caiva kṣīragomūtrayāvakam

6.36.2

भुञ्जीत सह सर्वैश् च त्रिसंध्यम् अवगाहनम्

bhuñjīta saha sarvaiś ca trisaṃdhyam avagāhanam

6.37

त्र्यहं भुञ्जीत दध्ना च त्र्यहं भुञ्जीत सर्पिषा

tryahaṃ bhuñjīta dadhnā ca tryahaṃ bhuñjīta sarpiṣā

6.37.2

त्र्यहं क्षीरेण भुञ्जीत एकैकेन दिनत्रयम्

tryahaṃ kṣīreṇa bhuñjīta ekaikena dinatrayam

6.38

भावदुष्टं न भुञ्जीत नोच्छिष्टं कृमिदूषितम्

bhāvaduṣṭaṃ na bhuñjīta nocchiṣṭaṃ kṛmidūṣitam

6.38.2

दधिक्षीरस्य त्रिपलं पलं एकं घृतस्य तु

dadhikṣīrasya tripalaṃ palaṃ ekaṃ ghṛtasya tu

6.39

भस्मना तु भवेच्छुद्धिर् उभयोस् ताम्रकांस्ययोः

bhasmanā tu bhavecchuddhir ubhayos tāmrakāṃsyayoḥ

6.39.2

जलशौचेन वस्त्राणां परित्यागेन मृण्मयम्

jalaśaucena vastrāṇāṃ parityāgena mṛṇmayam

6.40

कुसुम्भगुडकार्पासलवणं तैलसर्पिषी

kusumbhaguḍakārpāsalavaṇaṃ tailasarpiṣī

6.40.2

द्वारे कृत्वा तु धान्यानि दद्याद् वेश्मनि पावकम्

dvāre kṛtvā tu dhānyāni dadyād veśmani pāvakam

6.41

एवं शुद्धस् ततः पश्चात् कुर्याद् ब्राह्मणतर्पणम्

evaṃ śuddhas tataḥ paścāt kuryād brāhmaṇatarpaṇam

6.41.2

त्रिंशतं गोवृषं चैकं दद्याद् विप्रेषु दक्षिणाम्

triṃśataṃ govṛṣaṃ caikaṃ dadyād vipreṣu dakṣiṇām

6.42

पुनर् लेपनखातेन होमजप्येन शुध्यति

punar lepanakhātena homajapyena śudhyati

6.42.2

आधारेण च विप्राणां भूमिदोषो न विद्यते

ādhāreṇa ca viprāṇāṃ bhūmidoṣo na vidyate

Parāśaradharmasaṃhitā