5.8

कृष्णपक्षे यदा सोमो न दृश्येत कदाचन

kṛṣṇapakṣe yadā somo na dṛśyeta kadācana

5.8.2

यां दिशं व्रजते सोमस् तां दिशं वावलोकयेत्

yāṃ diśaṃ vrajate somas tāṃ diśaṃ vāvalokayet

5.9

असद्ब्राह्मणके ग्रामे शुना दष्टो द्विजोत्तमः

asadbrāhmaṇake grāme śunā daṣṭo dvijottamaḥ

5.9.2

वृषं प्रदक्षिणीकृत्य सद्यः स्नात्वा शुचिर् भवेत्

vṛṣaṃ pradakṣiṇīkṛtya sadyaḥ snātvā śucir bhavet

5.10

चण्डालेन श्वपाकेन गोभिर् विप्रैर् हतो यदि

caṇḍālena śvapākena gobhir viprair hato yadi

5.10.2

आहिताग्निर् मृतो विप्रो विषेणात्महतो यदि

āhitāgnir mṛto vipro viṣeṇātmahato yadi

5.11

दहेत् तं ब्राह्मणं विप्रो लोकाग्नौ मन्त्रवर्जितम्

dahet taṃ brāhmaṇaṃ vipro lokāgnau mantravarjitam

5.11.2

स्पृष्ट्वा वोढ्वा च दग्ध्वा च सपिण्डेषु च सर्वथा

spṛṣṭvā voḍhvā ca dagdhvā ca sapiṇḍeṣu ca sarvathā

5.12

प्राजापत्यं चरेत् पश्चाद् विप्राणाम् अनुशासनात्

prājāpatyaṃ caret paścād viprāṇām anuśāsanāt

5.12.2

दग्धास्थीनि पुनर् गृह्य क्षीरैः प्रक्षालयेद् द्विजः

dagdhāsthīni punar gṛhya kṣīraiḥ prakṣālayed dvijaḥ

5.13

पुनर् दहेत् स्वाग्निना तु स्वतन्त्रेण पृथक् पृथक्

punar dahet svāgninā tu svatantreṇa pṛthak pṛthak

5.13.2

आहिताग्निर् द्विजः कश्चित् प्रवसन् कालचोदितः

āhitāgnir dvijaḥ kaścit pravasan kālacoditaḥ

5.14

देहनाशम् अनुप्राप्तस् तस्याग्निर् वसते गृहे

dehanāśam anuprāptas tasyāgnir vasate gṛhe

5.14.2

प्रेताग्निहोत्रसंस्कारः श्रूयताम् ऋषिपुङ्गवाः

pretāgnihotrasaṃskāraḥ śrūyatām ṛṣipuṅgavāḥ

5.15

कृष्णाजिनं समास्तीर्य कुशैस् तु पुरुषाकृतिम्

kṛṣṇājinaṃ samāstīrya kuśais tu puruṣākṛtim

5.15.2

षट्शतानि शतं चैव पलाशानां च वृन्ततः

ṣaṭśatāni śataṃ caiva palāśānāṃ ca vṛntataḥ

5.16

चत्वारिंशच्छिरे दद्याच्छतं कण्ठे तु विन्यसेत्

catvāriṃśacchire dadyācchataṃ kaṇṭhe tu vinyaset

5.16.2

बाहुभ्यां शतकं दद्याद् अङ्गुलीषु दशैव तु

bāhubhyāṃ śatakaṃ dadyād aṅgulīṣu daśaiva tu

5.17

शतं तु जघने दद्याद् द्विशतं तूदरे तथा

śataṃ tu jaghane dadyād dviśataṃ tūdare tathā

5.17.2

दद्याद् अष्टौ वृषणयोः पञ्च मेढ्रे तु विन्यसेत्

dadyād aṣṭau vṛṣaṇayoḥ pañca meḍhre tu vinyaset

Parāśaradharmasaṃhitā