4.31

मृते भर्तरि या नारी ब्रह्मचर्यव्रते स्थिता

mṛte bhartari yā nārī brahmacaryavrate sthitā

4.31.2

सा मृता लभते स्वर्गं यथा ते ब्रह्मचारिणः

sā mṛtā labhate svargaṃ yathā te brahmacāriṇaḥ

4.32

तिस्रः कोट्यो ऽर्धकोटी च यानि रोमाणि मानुषे

tisraḥ koṭyo 'rdhakoṭī ca yāni romāṇi mānuṣe

4.32.2

तावत्कालं वसेत् स्वर्गे भर्तारं यानुगच्छति

tāvatkālaṃ vaset svarge bhartāraṃ yānugacchati

4.33

व्यालग्राही यथा व्यालं बलाद् उद्धरते बिलात्

vyālagrāhī yathā vyālaṃ balād uddharate bilāt

4.33.2

एवं स्त्री पतिम् उद्धृत्य तेनैव सह मोदते

evaṃ strī patim uddhṛtya tenaiva saha modate

5.1

वृकश्वानसृगालाद्यैर् दष्टो यस् तु द्विजोत्तमः

vṛkaśvānasṛgālādyair daṣṭo yas tu dvijottamaḥ

5.1.2

स्नात्वा जपेत् स गायत्रीं पवित्रां वेदमातरम्

snātvā japet sa gāyatrīṃ pavitrāṃ vedamātaram

5.2

गवां शृङ्गोदकैः स्नानं महानद्योस् तु संगमे

gavāṃ śṛṅgodakaiḥ snānaṃ mahānadyos tu saṃgame

5.2.2

समुद्रदर्शनाद् वापि शुना दष्टः शुचिर् भवेत्

samudradarśanād vāpi śunā daṣṭaḥ śucir bhavet

5.3

वेदविद्याव्रतस्नातः शुना दष्टो द्विजो यदि

vedavidyāvratasnātaḥ śunā daṣṭo dvijo yadi

5.3.2

स हिरण्योदकैः स्नात्वा घृतं प्राश्य विशुध्यति

sa hiraṇyodakaiḥ snātvā ghṛtaṃ prāśya viśudhyati

5.4

सव्रतस् तु शुना दष्टो यस् त्रिरात्रम् उपावसेत्

savratas tu śunā daṣṭo yas trirātram upāvaset

5.4.2

घृतं कुशोदकं पीत्वा व्रतशेषं समापयेत्

ghṛtaṃ kuśodakaṃ pītvā vrataśeṣaṃ samāpayet

5.5

अव्रतः सव्रतो वापि शुना दष्टो भवेद् द्विजः

avrataḥ savrato vāpi śunā daṣṭo bhaved dvijaḥ

5.5.2

प्रणिपत्य भवेत् पूतो विप्रैश् चक्षुर्निरीक्षितः

praṇipatya bhavet pūto vipraiś cakṣurnirīkṣitaḥ

5.6

शुना घ्रातावलीढस्य नखैर् विलिखितस्य च

śunā ghrātāvalīḍhasya nakhair vilikhitasya ca

5.6.2

अद्भिः प्रक्षालनं प्रोक्तम् अग्निना चोपचूलनम्

adbhiḥ prakṣālanaṃ proktam agninā copacūlanam

5.7

शुना तु ब्राह्मणी दष्टा जम्बुकेन वृकेण वा

śunā tu brāhmaṇī daṣṭā jambukena vṛkeṇa vā

5.7.2

उदितं ग्रहनक्षत्रं दृष्ट्वा सद्यः शुचिर् भवेत्

uditaṃ grahanakṣatraṃ dṛṣṭvā sadyaḥ śucir bhavet

Parāśaradharmasaṃhitā