4.21

न कार्यम् आवसथ्येन नाग्निहोत्रेण वा पुनः

na kāryam āvasathyena nāgnihotreṇa vā punaḥ

4.21.2

स भवेत् कर्मचाण्डालो यस् तु धर्मपराङ्मुखः

sa bhavet karmacāṇḍālo yas tu dharmaparāṅmukhaḥ

4.22

ओघवाताहृतं बीजं यस्य क्षेत्रे प्ररोहति

oghavātāhṛtaṃ bījaṃ yasya kṣetre prarohati

4.22.2

स क्षेत्री लभते बीजं न बीजी भागम् अर्हति

sa kṣetrī labhate bījaṃ na bījī bhāgam arhati

4.23

तद्वत् परस्त्रियाः पुत्रौ द्वौ स्मृतौ कुण्डगोलकौ

tadvat parastriyāḥ putrau dvau smṛtau kuṇḍagolakau

4.23.2

पत्यौ जीवति कुण्डः स्यात् मृते भर्तरि गोलकः

patyau jīvati kuṇḍaḥ syāt mṛte bhartari golakaḥ

4.24

औरसः क्षेत्रजश् चैव दत्तः कृत्रिमकः सुतः

aurasaḥ kṣetrajaś caiva dattaḥ kṛtrimakaḥ sutaḥ

4.24.2

दद्यान् माता पिता वापि स पुत्रो दत्तको भवेत्

dadyān mātā pitā vāpi sa putro dattako bhavet

4.25

परिवित्तिः परिवेत्ता यया च परिविद्यते

parivittiḥ parivettā yayā ca parividyate

4.25.2

सर्वे ते नरकं यान्ति दातृयाजकपञ्चमाः

sarve te narakaṃ yānti dātṛyājakapañcamāḥ

4.26

द्वौ कृच्छ्रौ परिवित्तेस् तु कन्यायाः कृच्छ्र एव च

dvau kṛcchrau parivittes tu kanyāyāḥ kṛcchra eva ca

4.26.2

कृच्छ्रातिकृच्छ्रौ दातुस् तु होता चान्द्रायणं चरेत्

kṛcchrātikṛcchrau dātus tu hotā cāndrāyaṇaṃ caret

4.27

कुब्जवामनषण्ढेषु गद्गदेषु जडेषु च

kubjavāmanaṣaṇḍheṣu gadgadeṣu jaḍeṣu ca

4.27.2

जात्यन्धे बधिरे मूके न दोषः परिवेदने

jātyandhe badhire mūke na doṣaḥ parivedane

4.28

पितृव्यपुत्रः सापत्नः परनारीसुतस् तथा

pitṛvyaputraḥ sāpatnaḥ paranārīsutas tathā

4.28.2

दाराग्निहोत्रसंयोगे न दोषः परिवेदने

dārāgnihotrasaṃyoge na doṣaḥ parivedane

4.29

ज्येष्ठो भ्राता यदा तिष्ठेद् आधानं नैव कारयेत्

jyeṣṭho bhrātā yadā tiṣṭhed ādhānaṃ naiva kārayet

4.29.2

अनुज्ञातस् तु कुर्वीत शङ्खस्य वचनं यथा

anujñātas tu kurvīta śaṅkhasya vacanaṃ yathā

4.30

नष्टे मृते प्रव्रजिते क्लीबे च पतिते पतौ

naṣṭe mṛte pravrajite klībe ca patite patau

4.30.2

पञ्चस्व् आपत्सु नारीणां पतिर् अन्यो विधीयते

pañcasv āpatsu nārīṇāṃ patir anyo vidhīyate

Parāśaradharmasaṃhitā