4.1

अतिमानाद् अतिक्रोधात् स्नेहाद् वा यदि वा भयात्

atimānād atikrodhāt snehād vā yadi vā bhayāt

4.1.2

उद्बध्नीयात् स्त्री पुमान् वा गतिर् एषा विधीयते

udbadhnīyāt strī pumān vā gatir eṣā vidhīyate

4.2

पूयशोणितसम्पूर्णे त्व् अन्धे तमसि मज्जति

pūyaśoṇitasampūrṇe tv andhe tamasi majjati

4.2.2

षष्ठीर् वर्षसहस्राणि नरकं प्रतिपद्यते

ṣaṣṭhīr varṣasahasrāṇi narakaṃ pratipadyate

4.3

नाशौचं नोदकं नाग्निं नाश्रुपातं च कारयेत्

nāśaucaṃ nodakaṃ nāgniṃ nāśrupātaṃ ca kārayet

4.3.2

वोढारो ऽग्निप्रदातारः पाशच्छेदकरास् तथा

voḍhāro 'gnipradātāraḥ pāśacchedakarās tathā

4.4

तप्तकृच्छ्रेण शुध्यन्तीत्य् एवम् आह प्रजापतिः

taptakṛcchreṇa śudhyantīty evam āha prajāpatiḥ

4.4.2

गोभिर् हतं तथोद्बद्धं ब्राह्मणेन तु घातितम्

gobhir hataṃ tathodbaddhaṃ brāhmaṇena tu ghātitam

4.5

संस्पृशन्ति तु ये विप्रा वोढारश् चाग्निदाश् च ये

saṃspṛśanti tu ye viprā voḍhāraś cāgnidāś ca ye

4.5.2

अन्ये ये वानुगन्तारः पाशच्छेदकराश् च ये

anye ye vānugantāraḥ pāśacchedakarāś ca ye

4.6

तप्तकृच्छ्रेण शुद्धास् ते कुर्युर् ब्राह्मणभोजनम्

taptakṛcchreṇa śuddhās te kuryur brāhmaṇabhojanam

4.6.2

अनडुत्सहितां गां च दद्युर् विप्राय दक्षिणाम्

anaḍutsahitāṃ gāṃ ca dadyur viprāya dakṣiṇām

4.7

त्र्यहम् उष्णं पिबेद् वारि त्र्यहम् उष्णं पयः पिबेत्

tryaham uṣṇaṃ pibed vāri tryaham uṣṇaṃ payaḥ pibet

4.7.2

त्र्यहम् उष्णं पिबेत् सर्पिर् वायुभक्षो दिनत्रयम्

tryaham uṣṇaṃ pibet sarpir vāyubhakṣo dinatrayam

4.8

षट्पलं तु पिबेद् अम्भस् त्रिपलं तु पयः पिबेत्

ṣaṭpalaṃ tu pibed ambhas tripalaṃ tu payaḥ pibet

4.8.2

पलम् एकं पिबेत् सर्पिस् तप्तकृच्छ्रं विधीयते

palam ekaṃ pibet sarpis taptakṛcchraṃ vidhīyate

4.9

यो वै समाचरेद् विप्रः पतितादिष्व् अकामतः

yo vai samācared vipraḥ patitādiṣv akāmataḥ

4.9.2

पञ्चाहं वा दशाहं वा द्वादशाहम् अथापि वा

pañcāhaṃ vā daśāhaṃ vā dvādaśāham athāpi vā

4.10

मासार्धं मासम् एकं वा मासद्वयम् अथापि वा

māsārdhaṃ māsam ekaṃ vā māsadvayam athāpi vā

4.10.2

अब्दार्धम् अब्दम् एकं वा तदूर्ध्वं चैव तत्समः

abdārdham abdam ekaṃ vā tadūrdhvaṃ caiva tatsamaḥ

Parāśaradharmasaṃhitā