3.19

ब्रह्मचारी गृहे येषां हूयते च हुताशनः

brahmacārī gṛhe yeṣāṃ hūyate ca hutāśanaḥ

3.19.2

संपर्कं न च कुर्वन्ति न तेषां सूतकं भवेत्

saṃparkaṃ na ca kurvanti na teṣāṃ sūtakaṃ bhavet

3.20

संपर्काद् दुष्यते विप्रो जनने मरणे तथा

saṃparkād duṣyate vipro janane maraṇe tathā

3.20.2

संपर्काच् च निवृत्तस्य न प्रेतं नैव सूतकम्

saṃparkāc ca nivṛttasya na pretaṃ naiva sūtakam

3.21

शिल्पिनः कारुका वैद्या दासीदासाश् च नापिताः

śilpinaḥ kārukā vaidyā dāsīdāsāś ca nāpitāḥ

3.21.2

राजानः श्रोत्रियाश् चैव सद्यः शौचाः प्रकीर्तिताः

rājānaḥ śrotriyāś caiva sadyaḥ śaucāḥ prakīrtitāḥ

3.22

सव्रतः सत्रपूतश् च आहिताग्निश् च यो द्विजः

savrataḥ satrapūtaś ca āhitāgniś ca yo dvijaḥ

3.22.2

राज्ञश् च सूतकं नास्ति यस्य चेच्छति पार्थिवः

rājñaś ca sūtakaṃ nāsti yasya cecchati pārthivaḥ

3.23

उद्यतो निधने दाने आर्तो विप्रो निमन्त्रितः

udyato nidhane dāne ārto vipro nimantritaḥ

3.23.2

तदैव ऋषिभिर् दृष्टं यथा कालेन शुध्यति

tadaiva ṛṣibhir dṛṣṭaṃ yathā kālena śudhyati

3.24

प्रसवे गृहमेधी तु न कुर्यात् संकरं यदि

prasave gṛhamedhī tu na kuryāt saṃkaraṃ yadi

3.24.2

दशाहाच्छुध्यते माता त्व् अवगाह्य पिता शुचिः

daśāhācchudhyate mātā tv avagāhya pitā śuciḥ

3.25

सर्वेषां शावम् आशौचं मातापित्रोस् तु सूतकम्

sarveṣāṃ śāvam āśaucaṃ mātāpitros tu sūtakam

3.25.2

सूतकं मातुर् एव स्याद् उपस्पृश्य पिता शुचिः

sūtakaṃ mātur eva syād upaspṛśya pitā śuciḥ

3.26

यदि पत्न्यां प्रसूतायां संपर्कं कुरुते द्विजः

yadi patnyāṃ prasūtāyāṃ saṃparkaṃ kurute dvijaḥ

3.26.2

सूतकं तु भवेत् तस्य यदि विप्रः षडङ्गवित्

sūtakaṃ tu bhavet tasya yadi vipraḥ ṣaḍaṅgavit

3.27

संपर्काज् जायते दोषो नान्यो दोषो ऽस्ति वै द्विजे

saṃparkāj jāyate doṣo nānyo doṣo 'sti vai dvije

3.27.2

तस्मात् सर्वप्रयत्नेन संपर्कं वर्जयेद् बुधः

tasmāt sarvaprayatnena saṃparkaṃ varjayed budhaḥ

3.28

विवाहोत्सवयज्ञेषु त्व् अन्तरा मृतसूतके

vivāhotsavayajñeṣu tv antarā mṛtasūtake

3.28.2

पूर्वसंकल्पितं द्रव्यं दीयमानं न दुष्यति

pūrvasaṃkalpitaṃ dravyaṃ dīyamānaṃ na duṣyati

Parāśaradharmasaṃhitā