2.7.7

अन्नं वै सप्तदशो यत् सप्त मध्ये भवन्ति पञ्च पञ्चाभितो ऽन्नम् एव तन् मध्यतो धीयते ऽनशनायुको यजमानो भवत्य् अनशनायुकाः प्रजाः

annaṃ vai saptadaśo yat sapta madhye bhavanti pañca pañcābhito 'nnam eva tan madhyato dhīyate 'naśanāyuko yajamāno bhavaty anaśanāyukāḥ prajāḥ

2.7.8

वैराजो वै पुरुषः सप्त ग्राम्याः पशवो यद् दश पूर्वा भवन्ति सप्तोत्तमा यजमानम् एव तत् पशुषु प्रतिष्ठापयति

vairājo vai puruṣaḥ sapta grāmyāḥ paśavo yad daśa pūrvā bhavanti saptottamā yajamānam eva tat paśuṣu pratiṣṭhāpayati

2.7.9

एषा वै प्रतिष्ठिता सप्तदशस्य विष्टुतिः प्रतितिष्ठति य एतया स्तुते

eṣā vai pratiṣṭhitā saptadaśasya viṣṭutiḥ pratitiṣṭhati ya etayā stute

2.8.1

एष एव व्यूहः सप्तैकमध्या

eṣa eva vyūhaḥ saptaikamadhyā

2.8.2

ब्रह्मणो वा आयतनं प्रथमा क्षत्रस्य मध्यमा विश उत्तमा यत् प्रथमा भूयिष्ठा भाजयति ब्रह्मण्य् एव तद् ओजो वीर्यं दधाति ब्रह्मण एव तत् क्षत्रं च विशं चानुगे करोति क्षत्रस्यास्य प्रकाशो भवति य एतया स्तुते

brahmaṇo vā āyatanaṃ prathamā kṣatrasya madhyamā viśa uttamā yat prathamā bhūyiṣṭhā bhājayati brahmaṇy eva tad ojo vīryaṃ dadhāti brahmaṇa eva tat kṣatraṃ ca viśaṃ cānuge karoti kṣatrasyāsya prakāśo bhavati ya etayā stute

2.8.3

ताम् एतां त्रिखर्वा उपासते तस्मात् ते स्पर्धमाना न व्लीयन्ते

tām etāṃ trikharvā upāsate tasmāt te spardhamānā na vlīyante

2.9.1

सप्तभ्यो हिंकरोति स तिसृभिः स तिसृभिः स एकया तिसृभ्यो हिंकरोति पराचीभिः सप्तभ्यो हिंकरोति स एकया स तिसृभिः स तिसृभिः सप्तास्थिता

saptabhyo hiṃkaroti sa tisṛbhiḥ sa tisṛbhiḥ sa ekayā tisṛbhyo hiṃkaroti parācībhiḥ saptabhyo hiṃkaroti sa ekayā sa tisṛbhiḥ sa tisṛbhiḥ saptāsthitā

2.9.2

भ्रातृव्यवाṁ स्तुवीत यथा सप्तास्थितेन मत्येन समीकरोत्य् एवं पाप्मानं भ्रातृव्यं प्ररुजति

bhrātṛvyavāṁ stuvīta yathā saptāsthitena matyena samīkaroty evaṃ pāpmānaṃ bhrātṛvyaṃ prarujati

2.9.3

एताम् एव बहुभ्यो यजमानेभ्यः कुर्याद् यः प्रथमो हिङ्कारः स प्रथमाया यत् तां सप्तभ्यो हिंकरोति तेन सा सप्त भजते यत् सप्तैव मध्ये सम्पद्यन्ते तेन सा सप्त भजते य उत्तमो हिङ्कारः स उत्तमया यत् तां सप्तभ्यो हिंकरोति तेन सा सप्त भजते सर्वान् एवैनान् समावद्भाजः करोति नान्योन्यम् अपघ्नते समावदिन्द्रिया भवन्ति

etām eva bahubhyo yajamānebhyaḥ kuryād yaḥ prathamo hiṅkāraḥ sa prathamāyā yat tāṃ saptabhyo hiṃkaroti tena sā sapta bhajate yat saptaiva madhye sampadyante tena sā sapta bhajate ya uttamo hiṅkāraḥ sa uttamayā yat tāṃ saptabhyo hiṃkaroti tena sā sapta bhajate sarvān evainān samāvadbhājaḥ karoti nānyonyam apaghnate samāvadindriyā bhavanti

2.9.4

ताम् एताम् अभिप्रतारिण उपासते तस्मात् त ओजिष्ठा स्वानाम्

tām etām abhipratāriṇa upāsate tasmāt ta ojiṣṭhā svānām

2.10.1

एष एव व्यूह उभयः सप्तैकमध्या निर्मध्या

eṣa eva vyūha ubhayaḥ saptaikamadhyā nirmadhyā

2.10.1.2

आनुजावर स्तुवीतालोको वा एष यद् आनुजावरो यत् सप्त प्रथमाः सप्तोत्तमास् तिस्रो मध्ये त्र्यक्षरः पुरुषो लोकम् एवास्मै तन् मध्यतः करोति तस्मिंल्लोके प्रतितिष्ठति

ānujāvara stuvītāloko vā eṣa yad ānujāvaro yat sapta prathamāḥ saptottamās tisro madhye tryakṣaraḥ puruṣo lokam evāsmai tan madhyataḥ karoti tasmiṃlloke pratitiṣṭhati

2.10.1.3

एताम् एव प्रजाकामाय कुर्यान् मध्यतो वा एष संरूढो यः प्रजां न विन्दते लोकम् एवास्मै तं मध्यतः करोति तं लोकं प्रजया च पशुभिश् चानुप्रजायते

etām eva prajākāmāya kuryān madhyato vā eṣa saṃrūḍho yaḥ prajāṃ na vindate lokam evāsmai taṃ madhyataḥ karoti taṃ lokaṃ prajayā ca paśubhiś cānuprajāyate

2.10.1.4

एताम् एवापरुद्धराजन्याय कुर्याद् विड् वै सप्तदशस् तस्या राजा गर्भो विश एव तद् राजानं निर्हन्त्यपावगतो ऽपरुध्यते ऽवगच्छत्य् अपरुद्धः

etām evāparuddharājanyāya kuryād viḍ vai saptadaśas tasyā rājā garbho viśa eva tad rājānaṃ nirhantyapāvagato 'parudhyate 'vagacchaty aparuddhaḥ

2.10.1.5

एताम् एवाभिचर्यमाणाय कुर्यात् प्रजापतिर् वै सप्तदशः प्रजापतिम् एव मध्यतः प्रविशन्त्य् अस्तृत्यै

etām evābhicaryamāṇāya kuryāt prajāpatir vai saptadaśaḥ prajāpatim eva madhyataḥ praviśanty astṛtyai

2.11.1

पञ्चभ्यो हिंकरोति स तिसृभिः स एकया स एकया तिसृभ्यो हिंकरोति स पराचीभिर् नवभ्यो हिंकरोति स तिसृभिः स तिसृभिः स तिसृभिः

pañcabhyo hiṃkaroti sa tisṛbhiḥ sa ekayā sa ekayā tisṛbhyo hiṃkaroti sa parācībhir navabhyo hiṃkaroti sa tisṛbhiḥ sa tisṛbhiḥ sa tisṛbhiḥ

2.11.2

चतुर स्तोमान् प्रतिविहिता ब्रह्मवर्चसकामः स्तुवीत पञ्चभिः पञ्चदशं तिसृभिस् त्रिवृतं नवभिस् त्रिणवं स्वयं सप्तदशः सम्पन्नो वीर्यं वै स्तोमा वीर्यम् एव तद् एकधा समूहते ब्रह्मवर्चसस्यावरुद्ध्यै तेजस्वी ब्रह्मवर्चसी भवति य एतया स्तुते

catura stomān prativihitā brahmavarcasakāmaḥ stuvīta pañcabhiḥ pañcadaśaṃ tisṛbhis trivṛtaṃ navabhis triṇavaṃ svayaṃ saptadaśaḥ sampanno vīryaṃ vai stomā vīryam eva tad ekadhā samūhate brahmavarcasasyāvaruddhyai tejasvī brahmavarcasī bhavati ya etayā stute

2.12.1

तिसृभ्यो हिंकरोति स पराचीभिः पञ्चभ्यो हिंकरोति स एकया स तिसृभिः स एकया नवभ्यो हिंकरोति स तिसृभिः स तिसृभिः स तिसृभिर् उद्यती सप्तदशस्य विष्टुतिः

tisṛbhyo hiṃkaroti sa parācībhiḥ pañcabhyo hiṃkaroti sa ekayā sa tisṛbhiḥ sa ekayā navabhyo hiṃkaroti sa tisṛbhiḥ sa tisṛbhiḥ sa tisṛbhir udyatī saptadaśasya viṣṭutiḥ

2.12.2

एतया वै देवाः स्वर्गं लोकम् आयन् स्वर्गकामः स्तुवीत स्वर्गस्य लोकस्य समष्ट्यै स्वर्गाल्लोकान्न च्यवते तुष्टुवानो ऽभिक्रामन्ती विष्टुतिर् अभिक्रान्त्या एवाभिक्रान्तेन हि यज्ञस्यर्ध्नोति तस्माद् एतया स्तोतव्यम् ऋद्ध्या एव

etayā vai devāḥ svargaṃ lokam āyan svargakāmaḥ stuvīta svargasya lokasya samaṣṭyai svargāllokānna cyavate tuṣṭuvāno 'bhikrāmantī viṣṭutir abhikrāntyā evābhikrāntena hi yajñasyardhnoti tasmād etayā stotavyam ṛddhyā eva

2.13.1

सप्तभ्यो हिंकरोति स तिसृभिः स तिसृभिः स एकया पञ्चभ्यो हिंकरोति स एकया स तिसृभिः स एकया पञ्चभ्यो हिंकरोति स एकया स एकया स तिसृभिर् भस्त्रावाचीनबिला

saptabhyo hiṃkaroti sa tisṛbhiḥ sa tisṛbhiḥ sa ekayā pañcabhyo hiṃkaroti sa ekayā sa tisṛbhiḥ sa ekayā pañcabhyo hiṃkaroti sa ekayā sa ekayā sa tisṛbhir bhastrāvācīnabilā

Pañcaviṃśabrāhmaṇa