9.3.11

यद्य् अतिष्टुयुः स्वारम् अग्निष्टोमसाम कार्यम् ऊनम् इव वा एतत् साम्नो यत् स्वरस् तेनैव तत् समं क्रियते

yady atiṣṭuyuḥ svāram agniṣṭomasāma kāryam ūnam iva vā etat sāmno yat svaras tenaiva tat samaṃ kriyate

9.4.1

यदि सोमौ संसुतौ स्यातां महति रात्रेः प्रातरनुवाकम् उपाकुर्यात्

yadi somau saṃsutau syātāṃ mahati rātreḥ prātaranuvākam upākuryāt

9.4.2

पूर्वो वाचं पूर्वश् छन्दांसि पूर्वो देवता वृङ्क्ते

pūrvo vācaṃ pūrvaś chandāṃsi pūrvo devatā vṛṅkte

9.4.3

वृषण्वतीं प्रतिपदं कुर्याद् इन्द्रो वै वृषा प्रातःसवनाद् एवैषाम् इन्द्रं वृङ्क्ते

vṛṣaṇvatīṃ pratipadaṃ kuryād indro vai vṛṣā prātaḥsavanād evaiṣām indraṃ vṛṅkte

9.4.4

अथो खल्व् आहुः सवनमुखे सवनमुखे कार्या सवनमुखात् सवनमुखाद् एवैषाम् इन्द्रं वृङ्क्ते

atho khalv āhuḥ savanamukhe savanamukhe kāryā savanamukhāt savanamukhād evaiṣām indraṃ vṛṅkte

9.4.5

सुसमिद्धे होतव्यम् अग्निर् वै सर्वा देवताः सर्वा एव देवताः पश्यञ् जुहोति

susamiddhe hotavyam agnir vai sarvā devatāḥ sarvā eva devatāḥ paśyañ juhoti

9.4.6

संवेशायोपवेशाय गायत्र्यै छन्दसे ऽभिभूतये स्वाहा संवेशायोपवेशाय त्रिष्टुभे छन्दसे ऽभिभूतये स्वाहा संवेशायोपवेशाय जगत्यै छन्दसे ऽभिभूतये स्वाहेति जुहोति

saṃveśāyopaveśāya gāyatryai chandase 'bhibhūtaye svāhā saṃveśāyopaveśāya triṣṭubhe chandase 'bhibhūtaye svāhā saṃveśāyopaveśāya jagatyai chandase 'bhibhūtaye svāheti juhoti

9.4.7

छन्दांसि वा अभिभूतयस् तैर् एवैनान् अभिभवत्य् उभे बृहद्रथन्तरे कार्ये

chandāṃsi vā abhibhūtayas tair evainān abhibhavaty ubhe bṛhadrathantare kārye

9.4.8

यत्र वा इन्द्रस्य हरी तद् इन्द्रः इन्द्रस्य वै हरी बृहद्रथन्तरे यद् उभे बृहद्रथन्तरे भवतः पूर्व एवेन्द्रस्य हरी आरभन्ते

yatra vā indrasya harī tad indraḥ indrasya vai harī bṛhadrathantare yad ubhe bṛhadrathantare bhavataḥ pūrva evendrasya harī ārabhante

9.4.9

तौरश्रवसे कार्ये

tauraśravase kārye

9.4.10

तुरश्रवसश् च वै पारावतानां च सोमौ संसुताव् आस्तां तत एते तुरश्रवाः सामनी अपश्यत् ताभ्याम् अस्मा इन्द्रः शल्मलिनां यमुनाया हव्यं निरावहत् यत् तौरश्रवसे भवतो हव्यम् एवैषां

turaśravasaś ca vai pārāvatānāṃ ca somau saṃsutāv āstāṃ tata ete turaśravāḥ sāmanī apaśyat tābhyām asmā indraḥ śalmalināṃ yamunāyā havyaṃ nirāvahat yat tauraśravase bhavato havyam evaiṣāṃ

9.4.11

पूर्वे ऽभिषुणुयुः

pūrve 'bhiṣuṇuyuḥ

9.4.12

या वै पूर्वाः प्रस्नान्ति ताः पूर्वास् तीर्थं जयन्ति पूर्व एवेन्द्रम् आरभन्ते

yā vai pūrvāḥ prasnānti tāḥ pūrvās tīrthaṃ jayanti pūrva evendram ārabhante

9.4.13

विहव्यं शस्यम्

vihavyaṃ śasyam

9.4.14

जमदग्नेश् च वा ऋषीणां च सोमौ संसुताव् आस्तां तत एतज्जमदग्निर् विहव्यम् अपश्यत् तम् इन्द्र उपावर्तत यद् विहव्यं होता शंसतीन्द्रम् एवैषां वृङ्क्ते

jamadagneś ca vā ṛṣīṇāṃ ca somau saṃsutāv āstāṃ tata etajjamadagnir vihavyam apaśyat tam indra upāvartata yad vihavyaṃ hotā śaṃsatīndram evaiṣāṃ vṛṅkte

9.4.15

यदीतरो ऽग्निष्टोमः स्याद् उक्थः कार्यो यद्य् उक्थो ऽतिरात्रो यो वै भूयान् यज्ञक्रतुः स इन्द्रस्य प्रियो भूयसैवैषां यज्ञक्रतुनेन्द्रं वृङ्क्ते

yadītaro 'gniṣṭomaḥ syād ukthaḥ kāryo yady uktho 'tirātro yo vai bhūyān yajñakratuḥ sa indrasya priyo bhūyasaivaiṣāṃ yajñakratunendraṃ vṛṅkte

9.4.16

अथो खल्व् आहुर् दुष्प्राप इव वै परः पन्था यम् एवाग्रे यज्ञक्रतुम् आरभेत तस्मान् नेयाद् इति

atho khalv āhur duṣprāpa iva vai paraḥ panthā yam evāgre yajñakratum ārabheta tasmān neyād iti

9.4.17

सजनीयं शस्यम् अगस्त्यस्य कयाशुभीयं शस्यम्

sajanīyaṃ śasyam agastyasya kayāśubhīyaṃ śasyam

9.4.18

अस्या अमुष्या अद्यश्वान् मिथुनाद् अहोरात्राभ्याम् एवैनान् निर्भजति

asyā amuṣyā adyaśvān mithunād ahorātrābhyām evainān nirbhajati

9.5.1

यदि सोमम् अक्रीतम् अपहरेयुर् अन्यः क्रेतव्यः

yadi somam akrītam apahareyur anyaḥ kretavyaḥ

Pañcaviṃśabrāhmaṇa