1.1.1

ॐ महन् मे वोचो भर्गो मे वोचो यशो मे वोचः स्तोमं मे वोचो भुक्तिं मे वोचः सर्वं मे वोचस् तन् मावतु तन् माविशतु तेन भुक्षिषीय

oṃ mahan me voco bhargo me voco yaśo me vocaḥ stomaṃ me voco bhuktiṃ me vocaḥ sarvaṃ me vocas tan māvatu tan māviśatu tena bhukṣiṣīya

1.1.2

देवो देवम् एतु सोमः सोमम् एत्व् ऋतस्य पथा

devo devam etu somaḥ somam etv ṛtasya pathā

1.1.3

विहाय दौष्कृत्यम्

vihāya dauṣkṛtyam

1.1.4

बद्वा नामासि सृतिः सोमसरणी सोमं गमेयम्

badvā nāmāsi sṛtiḥ somasaraṇī somaṃ gameyam

1.1.5

पितरो भूः पितरो भूः पितरो भूः

pitaro bhūḥ pitaro bhūḥ pitaro bhūḥ

1.1.6

नृमण ऊर्ध्वभरसं त्वोर्ध्वभरा दृशेयम्

nṛmaṇa ūrdhvabharasaṃ tvordhvabharā dṛśeyam

1.1.7

मृदा शिथिरा देवानां तीर्थं वेदिर् असि मा मा हिंसीः

mṛdā śithirā devānāṃ tīrthaṃ vedir asi mā mā hiṃsīḥ

1.1.8

विष्णोः शिरो ऽसि यशोधा यशो मयि धेहि

viṣṇoḥ śiro 'si yaśodhā yaśo mayi dhehi

1.1.9

इष ऊर्ज आयुषे वर्चसे च

iṣa ūrja āyuṣe varcase ca

1.2.1

युनज्मि ते पृथिवीम् अग्निना सह युनज्मि वाचं सह सूर्येण युक्तो वातो ऽन्तरिक्षेण ते सह युक्तास् तिस्रो विमृजः सूर्यस्य

yunajmi te pṛthivīm agninā saha yunajmi vācaṃ saha sūryeṇa yukto vāto 'ntarikṣeṇa te saha yuktās tisro vimṛjaḥ sūryasya

1.2.2

ऋतस्य सदने सीदामि

ṛtasya sadane sīdāmi

1.2.3

ऋतपात्रम् असि

ṛtapātram asi

1.2.4

वानस्पत्यो ऽसि बार्हस्पत्यो ऽसि प्राजापत्यो ऽसि प्रजापतेर् मूर्धास्य् अत्यायुपात्रम् असीदम् अहं मां प्राञ्चं प्रोहामि तेजसे ब्रह्मवर्चसाय

vānaspatyo 'si bārhaspatyo 'si prājāpatyo 'si prajāpater mūrdhāsy atyāyupātram asīdam ahaṃ māṃ prāñcaṃ prohāmi tejase brahmavarcasāya

1.2.5

मरुतो नपातो ऽपां क्षयाः पर्वतानां ककुभः श्येना अजिरा एन्द्रं वग्नुना वहत घोषेणामीवां चातयध्वं युक्ता स्थ वहत

maruto napāto 'pāṃ kṣayāḥ parvatānāṃ kakubhaḥ śyenā ajirā endraṃ vagnunā vahata ghoṣeṇāmīvāṃ cātayadhvaṃ yuktā stha vahata

1.2.6

इदम् अहम् अमुं यजमानं पशुष्व् अध्यूहामि पशुषु च मां ब्रह्मवर्चसे च

idam aham amuṃ yajamānaṃ paśuṣv adhyūhāmi paśuṣu ca māṃ brahmavarcase ca

1.2.7

वसवस् त्वा गायत्रेण छन्दसा संमृजन्तु रुद्रास् त्वा त्रैष्टुभेन छन्दसा संमृजन्त्व् आदित्यास् त्वा जागतेन छन्दसा संमृजन्तु

vasavas tvā gāyatreṇa chandasā saṃmṛjantu rudrās tvā traiṣṭubhena chandasā saṃmṛjantv ādityās tvā jāgatena chandasā saṃmṛjantu

1.2.8

पवित्रं ते विततं ब्रह्मणस्पते प्रभुर् गात्राणि पर्येषि विश्वतो ऽतप्ततनूर् न तद् आमो अश्नुते शृतास इद् वहन्तः सं तद् आशत

pavitraṃ te vitataṃ brahmaṇaspate prabhur gātrāṇi paryeṣi viśvato 'taptatanūr na tad āmo aśnute śṛtāsa id vahantaḥ saṃ tad āśata

1.2.9

प्र शुक्रैतु देवी मनीषास्मद् रथः सुतष्टो न वाज्य् आयुषे मे पवस्व वर्चसे मे पवस्व विदुः पृथिव्या दिवो जनित्राच्छृण्वन्त्व् आपो ऽधः क्षरन्तीः सोमेहोद्गाय माम् आयुषे मम ब्रह्मवर्चसाय यजमानस्यर्द्ध्या अमुष्य राज्याय

pra śukraitu devī manīṣāsmad rathaḥ sutaṣṭo na vājy āyuṣe me pavasva varcase me pavasva viduḥ pṛthivyā divo janitrācchṛṇvantv āpo 'dhaḥ kṣarantīḥ somehodgāya mām āyuṣe mama brahmavarcasāya yajamānasyarddhyā amuṣya rājyāya

1.3.1

बेकुरानामासि जुष्टा देवेभ्यो नमो वाचे नमो वाचस्पतये देवि वाग् यत् ते वाचो मधुमत् तस्मिन् मा धाः सरस्वत्यै स्वाहा

bekurānāmāsi juṣṭā devebhyo namo vāce namo vācaspataye devi vāg yat te vāco madhumat tasmin mā dhāḥ sarasvatyai svāhā

1.3.2

सूर्यो मा दिव्याभ्यो नाष्ट्राभ्यः पातु वायुर् अन्तरिक्षाभ्यो ऽग्निः पार्थिवाभ्यः स्वाहा

sūryo mā divyābhyo nāṣṭrābhyaḥ pātu vāyur antarikṣābhyo 'gniḥ pārthivābhyaḥ svāhā

Pañcaviṃśabrāhmaṇa