3.15.2

निशायां तु प्रभातायां पूजनं प्रक्रमेदिह

niśāyāṃ tu prabhātāyāṃ pūjanaṃ prakramediha

3.16

आर्द्रायां वा मघायां वा याम्ये पूर्वेषु वा त्रिषु

ārdrāyāṃ vā maghāyāṃ vā yāmye pūrveṣu vā triṣu

3.16.2

आश्लेषामूलयोर्वापि कर्तव्यं रङ्गपूजनम्

āśleṣāmūlayorvāpi kartavyaṃ raṅgapūjanam

3.17

आचार्येण तु युक्तेन शुचिना दीक्षितेन च

ācāryeṇa tu yuktena śucinā dīkṣitena ca

3.17.2

रङ्गस्योद्द्योतनं कार्यं देवतानां च पूजनम्

raṅgasyoddyotanaṃ kāryaṃ devatānāṃ ca pūjanam

3.18

दिनान्ते दारुणे घोरे मुहूर्ते यमदैवते

dinānte dāruṇe ghore muhūrte yamadaivate

3.18.2

आचम्य तु यथान्यायं देवता वै निवेशयेत्

ācamya tu yathānyāyaṃ devatā vai niveśayet

3.19

रक्ताः प्रतिसराः सूत्रं रक्तगन्धाश्च पूजिताः

raktāḥ pratisarāḥ sūtraṃ raktagandhāśca pūjitāḥ

3.19.2

रक्ताः सुमनसश्चैव यच्च रक्तं फलं भवेत्

raktāḥ sumanasaścaiva yacca raktaṃ phalaṃ bhavet

3.20

यवैः सिद्धार्थकैर्लाजैरक्षतैः शालितण्डुलैः

yavaiḥ siddhārthakairlājairakṣataiḥ śālitaṇḍulaiḥ

3.20.2

नागपुष्पस्य चूर्णेन वितुषाभिः प्रियङ्गुभिः

nāgapuṣpasya cūrṇena vituṣābhiḥ priyaṅgubhiḥ

3.21

एतैर्द्रव्यैर्युतं कुर्याद्देवतानां निवेशनम्

etairdravyairyutaṃ kuryāddevatānāṃ niveśanam

3.21.2

आलिखेन्मण्डलं पूर्वं यथास्थानं यथाविधि

ālikhenmaṇḍalaṃ pūrvaṃ yathāsthānaṃ yathāvidhi

3.22

समन्ततश्च कर्तव्यं हस्ताः षोडश मण्डलम्

samantataśca kartavyaṃ hastāḥ ṣoḍaśa maṇḍalam

3.22.2

द्वाराणि चात्र कुर्वीत विधानेन चतुर्दिशम्

dvārāṇi cātra kurvīta vidhānena caturdiśam

3.23

मध्ये चैवात्र कर्तव्ये द्वे रेखे तिर्यगूर्ध्वगे

madhye caivātra kartavye dve rekhe tiryagūrdhvage

3.23.2

तयोः कक्ष्याविभागेन दैवतानि निवेशयेत्

tayoḥ kakṣyāvibhāgena daivatāni niveśayet

3.24

पद्मोपविष्टं ब्रह्माणं तस्य मध्ये निवेशयेत्

padmopaviṣṭaṃ brahmāṇaṃ tasya madhye niveśayet

3.24.2

आदौ निवेश्यो भगवान्सार्धं भूतगणैः शिवः

ādau niveśyo bhagavānsārdhaṃ bhūtagaṇaiḥ śivaḥ

3.25

नारायणो महेन्द्रश्च स्कन्दः सूर्यो ऽश्विनौ शशी

nārāyaṇo mahendraśca skandaḥ sūryo 'śvinau śaśī

Nāṭyaśāstra