2.25.4

ज्येष्ठं विकृष्टं विज्ञेयं नाट्यवेदप्रयोक्तृभिः

jyeṣṭhaṃ vikṛṣṭaṃ vijñeyaṃ nāṭyavedaprayoktṛbhiḥ

2.25.5

देवानां मानसी सृष्टिर्गृहेषूपवनेषु च

devānāṃ mānasī sṛṣṭirgṛheṣūpavaneṣu ca

2.25.6

यत्नभावाभिनिष्पन्नाः सर्वे भावा हि मानुषाः

yatnabhāvābhiniṣpannāḥ sarve bhāvā hi mānuṣāḥ

2.26

तस्माद्देवकृतैर्भावैर्न विस्पर्धेत मानुषः

tasmāddevakṛtairbhāvairna vispardheta mānuṣaḥ

2.26.2

मानुषस्य तु गेहस्य सम्प्रवक्ष्यामि लक्षणम्

mānuṣasya tu gehasya sampravakṣyāmi lakṣaṇam

2.27

भूमेर्विभागं पूर्वं तु परीक्षेत प्रयोजकः

bhūmervibhāgaṃ pūrvaṃ tu parīkṣeta prayojakaḥ

2.27.2

ततो वास्तु प्रमाणेन प्रारभेत शुभेच्छया

tato vāstu pramāṇena prārabheta śubhecchayā

2.28

समा स्थिरा तु कठिना कृष्णा गौरी च या भवेत्

samā sthirā tu kaṭhinā kṛṣṇā gaurī ca yā bhavet

2.28.2

भूमिस्तत्रैव कर्तव्यः कर्तृभिर्नाट्यमण्डपः

bhūmistatraiva kartavyaḥ kartṛbhirnāṭyamaṇḍapaḥ

2.29

प्रथमं शोधनं कृत्वा लाङ्गलेन समुत्कृषेत्

prathamaṃ śodhanaṃ kṛtvā lāṅgalena samutkṛṣet

2.29.2

अस्थिकीलकपालानि तृणगुल्मांश्च शोधयेत्

asthikīlakapālāni tṛṇagulmāṃśca śodhayet

2.30

शोधयित्वा वसुमतीं प्रमाणं निर्दिशेत्ततः

śodhayitvā vasumatīṃ pramāṇaṃ nirdiśettataḥ

2.30.2

त्रीण्युत्तराणि सौम्यं च विशाखापि च रेवती

trīṇyuttarāṇi saumyaṃ ca viśākhāpi ca revatī

2.31

हस्तितिष्यानुराधाश्च प्रशस्ता नाट्यकर्मणि

hastitiṣyānurādhāśca praśastā nāṭyakarmaṇi

2.31.2

पुष्यनक्षत्रयोगेन शुक्लं सूत्रं प्रसारयेत्

puṣyanakṣatrayogena śuklaṃ sūtraṃ prasārayet

2.32

कार्पासं बाल्बजं वापि मौञ्जं वाल्कलमेव च

kārpāsaṃ bālbajaṃ vāpi mauñjaṃ vālkalameva ca

2.32.2

सूत्रं बुधैस्तु कर्तव्यं यस्य छेदो न विद्यते

sūtraṃ budhaistu kartavyaṃ yasya chedo na vidyate

2.33

अर्धच्छिन्ने भवेत्सूत्रे स्वामिनो मरणं ध्रुवम्

ardhacchinne bhavetsūtre svāmino maraṇaṃ dhruvam

2.33.2

त्रिभागच्छिन्नया रज्ज्वा राष्ट्रकोपो विधीयते

tribhāgacchinnayā rajjvā rāṣṭrakopo vidhīyate

2.34

छिन्नायां तु चतुर्भागे प्रयोक्तुर्नाश उच्यते

chinnāyāṃ tu caturbhāge prayokturnāśa ucyate

Nāṭyaśāstra