1.11

न जातु देवतामूर्तिर् अस्मदादिशरीरवत्

na jātu devatāmūrtir asmadādiśarīravat

1.11.2

विशिष्टैश्वर्यसम्पन्ना सातो नैतन् निदर्शनम्

viśiṣṭaiśvaryasampannā sāto naitan nidarśanam

1.12

अथास्त्व् एवं घटे न्यायः शब्दत्वाद् इन्द्रशब्दवत्

athāstv evaṃ ghaṭe nyāyaḥ śabdatvād indraśabdavat

1.12.2

नादत्ते घटशब्दो ऽम्भश् चन्द्रशब्दो न राजते

nādatte ghaṭaśabdo 'mbhaś candraśabdo na rājate

1.13

अथान्यविषयं वाक्यम् अस्तु शक्रादिवाचकम्

athānyaviṣayaṃ vākyam astu śakrādivācakam

1.13.2

कर्मरूपादिशब्दानां सार्थकत्वं कथं भवेत्

karmarūpādiśabdānāṃ sārthakatvaṃ kathaṃ bhavet

1.14

प्रवादो ऽप्य् अखिलो मिथ्या समूलत्वान् न युक्तिमत्

pravādo 'py akhilo mithyā samūlatvān na yuktimat

1.14.2

स चेद् अमूलो भूतानां हताः सर्वाः प्रवृत्तयः

sa ced amūlo bhūtānāṃ hatāḥ sarvāḥ pravṛttayaḥ

1.15

उपमन्युर् हरं दृष्ट्वा विमन्युर् अभवन् मुनिः

upamanyur haraṃ dṛṣṭvā vimanyur abhavan muniḥ

1.15.2

कथं तस्य वचो मिथ्या यस्य वश्यः पयोनिधिः

kathaṃ tasya vaco mithyā yasya vaśyaḥ payonidhiḥ

1.16

क्रोडीकृतो हि पाशेन विषज्वालावलीमुचा हुंकृत्य

kroḍīkṛto hi pāśena viṣajvālāvalīmucā huṃkṛtya

1.16.2

मोचितः पत्या दृष्टः श्वेतो घनैर् जनैः

mocitaḥ patyā dṛṣṭaḥ śveto ghanair janaiḥ

1.17

इति वादानुषङ्गेण हरशंसाप्रहर्षितान्

iti vādānuṣaṅgeṇa haraśaṃsāpraharṣitān

1.17.2

साश्रुगद्गदवाचस् तान् वीक्ष्य प्रीतो ऽभवद् धीरः

sāśrugadgadavācas tān vīkṣya prīto 'bhavad dhīraḥ

1.18

स्वं रूपं दर्शयामास वज्री देवः शतक्रतुः

svaṃ rūpaṃ darśayāmāsa vajrī devaḥ śatakratuḥ

1.18.2

तरुणादित्यसंकाशं स्तूयमानं मरुद्गणैः

taruṇādityasaṃkāśaṃ stūyamānaṃ marudgaṇaiḥ

1.19

ते तम् ऋग्भिर् यजुर्भिश् च सामभिश् चास्तुवन्

te tam ṛgbhir yajurbhiś ca sāmabhiś cāstuvan

1.19.2

सो ऽब्रवीद् उच्यतां कामो जगत्सु प्रवरो ऽपि यः

so 'bravīd ucyatāṃ kāmo jagatsu pravaro 'pi yaḥ

1.20

ते वव्रिरे शिवज्ञानं श्रूयताम् इति सो ऽब्रवीत्

te vavrire śivajñānaṃ śrūyatām iti so 'bravīt

1.20.2

किंत्व् एको ऽस्तु मम प्रष्टा निखिलश्रोतृसंमतः

kiṃtv eko 'stu mama praṣṭā nikhilaśrotṛsaṃmataḥ

Mṛgendratantra