1.71

यद् एतत् परिसंख्यातम् आदाव् एव चतुर्युगम्

yad etat parisaṃkhyātam ādāv eva caturyugam

1.71.2

एतद् द्वादशसाहस्रं देवानां युगम् उच्यते

etad dvādaśasāhasraṃ devānāṃ yugam ucyate

1.72

दैविकानां युगानां तु सहस्रं परिसंख्यया

daivikānāṃ yugānāṃ tu sahasraṃ parisaṃkhyayā

1.72.2

ब्राह्मम् एकम् अहर् ज्ञेयं तावतीं रात्रिम् एव च

brāhmam ekam ahar jñeyaṃ tāvatīṃ rātrim eva ca

1.73

तद् वै युगसहस्रान्तं ब्राह्मं पुण्यम् अहर् विदुः

tad vai yugasahasrāntaṃ brāhmaṃ puṇyam ahar viduḥ

1.73.2

रात्रिं च तावतीम् एव ते ऽहोरात्रविदो जनाः

rātriṃ ca tāvatīm eva te 'horātravido janāḥ

1.74

तस्य सो ऽहर्निशस्यान्ते प्रसुप्तः प्रतिबुध्यते

tasya so 'harniśasyānte prasuptaḥ pratibudhyate

1.74.2

प्रतिबुद्धश् च सृजति मनः सदसदात्मकम्

pratibuddhaś ca sṛjati manaḥ sadasadātmakam

1.75

मनः सृष्टिं विकुरुते चोद्यमानं सिसृक्षया

manaḥ sṛṣṭiṃ vikurute codyamānaṃ sisṛkṣayā

1.75.2

आकाशं जायते तस्मात् तस्य शब्दं गुणं विदुः

ākāśaṃ jāyate tasmāt tasya śabdaṃ guṇaṃ viduḥ

1.76

आकाशात् तु विकुर्वाणात् सर्वगन्धवहः शुचिः

ākāśāt tu vikurvāṇāt sarvagandhavahaḥ śuciḥ

1.76.2

बलवाञ् जायते वायुः स वै स्पर्शगुणो मतः

balavāñ jāyate vāyuḥ sa vai sparśaguṇo mataḥ

1.77

वायोर् अपि विकुर्वाणाद् विरोचिष्णु तमोनुदम्

vāyor api vikurvāṇād virociṣṇu tamonudam

1.77.2

ज्योतिर् उत्पद्यते भास्वत् तद् रूपगुणम् उच्यते

jyotir utpadyate bhāsvat tad rūpaguṇam ucyate

1.78

ज्योतिषश् च विकुर्वाणाद् आपो रसगुणाः स्मृताः

jyotiṣaś ca vikurvāṇād āpo rasaguṇāḥ smṛtāḥ

1.78.2

अद्भ्यो गन्धगुणा भूमिर् इत्य् एषा सृष्टिर् आदितः

adbhyo gandhaguṇā bhūmir ity eṣā sṛṣṭir āditaḥ

1.79

यत् प्राग् द्वादशसाहस्रम् उदितं दैविकं युगम्

yat prāg dvādaśasāhasram uditaṃ daivikaṃ yugam

1.79.2

तद् एकसप्ततिगुणं मन्वन्तरम् इहोच्यते

tad ekasaptatiguṇaṃ manvantaram ihocyate

1.80

मन्वन्तराण्य् असंख्यानि सर्गः संहार एव च

manvantarāṇy asaṃkhyāni sargaḥ saṃhāra eva ca

1.80.2

क्रीडन्न् इवैतत् कुरुते परमेष्ठी पुनः पुनः

krīḍann ivaitat kurute parameṣṭhī punaḥ punaḥ

Manusmṛti