4.27

नानिष्ट्वा नवसस्येष्ट्या पशुना चाग्निमान् द्विजः

nāniṣṭvā navasasyeṣṭyā paśunā cāgnimān dvijaḥ

4.27.2

नवान्नम् अद्यान् मांसं वा दीर्घम् आयुर् जिजीविषुः

navānnam adyān māṃsaṃ vā dīrgham āyur jijīviṣuḥ

4.28

नवेनानर्चिता ह्य् अस्य पशुहव्येन चाग्नयः

navenānarcitā hy asya paśuhavyena cāgnayaḥ

4.28.2

प्राणान् एवात्तुम् इच्छन्ति नवान्नामिषगर्धिनः

prāṇān evāttum icchanti navānnāmiṣagardhinaḥ

4.29

आसनाशनशय्याभिर् अद्भिर् मूलफलेन वा

āsanāśanaśayyābhir adbhir mūlaphalena vā

4.29.2

नास्य कश्चिद् वसेद् गेहे शक्तितो ऽनर्चितो ऽतिथिः

nāsya kaścid vased gehe śaktito 'narcito 'tithiḥ

4.30

पाषाण्डिनो विकर्मस्थान् बैडालव्रतिकान् शठान्

pāṣāṇḍino vikarmasthān baiḍālavratikān śaṭhān

4.30.2

हैतुकान् बकवृत्तींश् च वाङ्मात्रेणापि नार्चयेत्

haitukān bakavṛttīṃś ca vāṅmātreṇāpi nārcayet

4.31

वेदविद्याव्रतस्नातान् श्रोत्रियान् गृहमेधिनः

vedavidyāvratasnātān śrotriyān gṛhamedhinaḥ

4.31.2

पूजयेद्धव्यकव्येन विपरीतांश् च वर्जयेत्

pūjayeddhavyakavyena viparītāṃś ca varjayet

4.32

शक्तितो ऽपचमानेभ्यो दातव्यं गृहमेधिना

śaktito 'pacamānebhyo dātavyaṃ gṛhamedhinā

4.32.2

संविभागश् च भूतेभ्यः कर्तव्यो ऽनुपरोधतः

saṃvibhāgaś ca bhūtebhyaḥ kartavyo 'nuparodhataḥ

4.33

राजतो धनम् अन्विच्छेत् संसीदन् स्नातकः क्षुधा

rājato dhanam anvicchet saṃsīdan snātakaḥ kṣudhā

4.33.2

याज्यान्तेवासिनोर् वापि न त्व् अन्यत इति स्थितिः

yājyāntevāsinor vāpi na tv anyata iti sthitiḥ

4.34

न सीदेत् स्नातको विप्रः क्षुधा शक्तः कथंचन

na sīdet snātako vipraḥ kṣudhā śaktaḥ kathaṃcana

4.34.2

न जीर्णमलवद्वासा भवेच् च विभवे सति

na jīrṇamalavadvāsā bhavec ca vibhave sati

4.35

क्ﾱप्तकेशनखश्मश्रुर् दान्तः शुक्लाम्बरः शुचिः

kﾱptakeśanakhaśmaśrur dāntaḥ śuklāmbaraḥ śuciḥ

4.35.2

स्वाध्याये चैव युक्तः स्यान् नित्यम् आत्महितेषु च

svādhyāye caiva yuktaḥ syān nityam ātmahiteṣu ca

4.36

वैणवीं धारयेद् यष्टिं सोदकं च कमण्डलुम्

vaiṇavīṃ dhārayed yaṣṭiṃ sodakaṃ ca kamaṇḍalum

4.36.2

यज्ञोपवीतं वेदं च शुभं रौक्मे च कुण्डले

yajñopavītaṃ vedaṃ ca śubhaṃ raukme ca kuṇḍale

Manusmṛti