4.17

सर्वान् परित्यजेद् अर्थान् स्वाध्यायस्य विरोधिनः

sarvān parityajed arthān svādhyāyasya virodhinaḥ

4.17.2

यथा तथाध्यापयंस् तु सा ह्य् अस्य कृतकृत्यता

yathā tathādhyāpayaṃs tu sā hy asya kṛtakṛtyatā

4.18

वयसः कर्मणो ऽर्थस्य श्रुतस्याभिजनस्य च

vayasaḥ karmaṇo 'rthasya śrutasyābhijanasya ca

4.18.2

वेषवाग्बुद्धिसारूप्यम् आचरन् विचरेद् इह

veṣavāgbuddhisārūpyam ācaran vicared iha

4.19

बुद्धिवृद्धिकराण्य् आशु धन्यानि च हितानि च

buddhivṛddhikarāṇy āśu dhanyāni ca hitāni ca

4.19.2

नित्यं शास्त्राण्य् अवेक्षेत निगमांश् चैव वैदिकान्

nityaṃ śāstrāṇy avekṣeta nigamāṃś caiva vaidikān

4.20

यथा यथा हि पुरुषः शास्त्रं समधिगच्छति

yathā yathā hi puruṣaḥ śāstraṃ samadhigacchati

4.20.2

तथा तथा विजानाति विज्ञानं चास्य रोचते

tathā tathā vijānāti vijñānaṃ cāsya rocate

4.21

ऋषियज्ञं देवयज्ञं भूतयज्ञं च सर्वदा

ṛṣiyajñaṃ devayajñaṃ bhūtayajñaṃ ca sarvadā

4.21.2

नृयज्ञं पितृयज्ञं च यथाशक्ति न हापयेत्

nṛyajñaṃ pitṛyajñaṃ ca yathāśakti na hāpayet

4.22

एतान् एके महायज्ञान् यज्ञशास्त्रविदो जनाः

etān eke mahāyajñān yajñaśāstravido janāḥ

4.22.2

अनीहमानाः सततम् इन्द्रियेष्व् एव जुह्वति

anīhamānāḥ satatam indriyeṣv eva juhvati

4.23

वाच्य् एके जुह्वति प्राणं प्राणे वाचं च सर्वदा

vācy eke juhvati prāṇaṃ prāṇe vācaṃ ca sarvadā

4.23.2

वाचि प्राणे च पश्यन्तो यज्ञनिर्वृत्तिम् अक्षयाम्

vāci prāṇe ca paśyanto yajñanirvṛttim akṣayām

4.24

ज्ञानेनैवापरे विप्रा यजन्त्य् एतैर् मखैः सदा

jñānenaivāpare viprā yajanty etair makhaiḥ sadā

4.24.2

ज्ञानमूलाम् क्रियाम् एषां पश्यन्तो ज्ञानचक्षुषा

jñānamūlām kriyām eṣāṃ paśyanto jñānacakṣuṣā

4.25

अग्निहोत्रं च जुहुयाद् आद्यन्ते द्युनिशोः सदा

agnihotraṃ ca juhuyād ādyante dyuniśoḥ sadā

4.25.2

दर्शेन चार्धमासान्ते पौर्णमासेन चैव हि

darśena cārdhamāsānte paurṇamāsena caiva hi

4.26

सस्यान्ते नवसस्येष्ट्या तथर्त्वन्ते द्विजो ऽध्वरैः

sasyānte navasasyeṣṭyā tathartvante dvijo 'dhvaraiḥ

4.26.2

पशुना त्व् अयनस्यादौ समान्ते सौमिकैर् मखैः

paśunā tv ayanasyādau samānte saumikair makhaiḥ

Manusmṛti