4.7

कुसूलधान्यको वा स्यात् कुम्भीधान्यक एव वा

kusūladhānyako vā syāt kumbhīdhānyaka eva vā

4.7.2

त्र्यहैहिको वापि भवेद् अश्वस्तनिक एव वा

tryahaihiko vāpi bhaved aśvastanika eva vā

4.8

चतुर्णाम् अपि चैतेषां द्विजानां गृहमेधिनाम्

caturṇām api caiteṣāṃ dvijānāṃ gṛhamedhinām

4.8.2

ज्यायान् परः परो ज्ञेयो धर्मतो लोकजित्तमः

jyāyān paraḥ paro jñeyo dharmato lokajittamaḥ

4.9

सकर्मैको भवत्य् एषां त्रिभिर् अन्यः प्रवर्तते

sakarmaiko bhavaty eṣāṃ tribhir anyaḥ pravartate

4.9.2

द्वाभ्याम् एकश् चतुर्थस् तु ब्रह्मसत्त्रेण जीवति

dvābhyām ekaś caturthas tu brahmasattreṇa jīvati

4.10

वर्तयंश् च शिलोञ्छाभ्याम् अग्निहोत्रपरायणः

vartayaṃś ca śiloñchābhyām agnihotraparāyaṇaḥ

4.10.2

इषीः पार्वायणान्तीयाः केवला निर्वपेत्

iṣīḥ pārvāyaṇāntīyāḥ kevalā nirvapet

4.11

न लोकवृत्तं वर्तेत वृत्तिहेतोः कथंचन

na lokavṛttaṃ varteta vṛttihetoḥ kathaṃcana

4.11.2

अजिह्माम् अशठां शुद्धाम् जीवेद् ब्राह्मणजीविकाम्

ajihmām aśaṭhāṃ śuddhām jīved brāhmaṇajīvikām

4.12

संतोषं परम् आस्थाय सुखार्थी संयतो भवेत्

saṃtoṣaṃ param āsthāya sukhārthī saṃyato bhavet

4.12.2

संतोषमूलं हि सुखं दुःखमूलं विपर्ययः

saṃtoṣamūlaṃ hi sukhaṃ duḥkhamūlaṃ viparyayaḥ

4.13

अतो ऽन्यतमया वृत्त्या जीवंस् तु स्नातको द्विजः

ato 'nyatamayā vṛttyā jīvaṃs tu snātako dvijaḥ

4.13.2

स्वर्गायुष्ययशस्यानि व्रताणीमानि धारयेत्

svargāyuṣyayaśasyāni vratāṇīmāni dhārayet

4.14

वेदोदितं स्वकं कर्म नित्यं कुर्याद् अतन्द्रितः

vedoditaṃ svakaṃ karma nityaṃ kuryād atandritaḥ

4.14.2

तद्धि कुर्वन् यथाशक्ति प्राप्नोति परमां गतिम्

taddhi kurvan yathāśakti prāpnoti paramāṃ gatim

4.15

नेहेतार्थान् प्रसङ्गेन न विरुद्धेन कर्मणा

nehetārthān prasaṅgena na viruddhena karmaṇā

4.15.2

न विद्यमानेष्व् अर्थेषु नार्त्याम् अपि यतस् ततः

na vidyamāneṣv artheṣu nārtyām api yatas tataḥ

4.16

इन्द्रियार्थेषु सर्वेषु न प्रसज्येत कामतः

indriyārtheṣu sarveṣu na prasajyeta kāmataḥ

4.16.2

अतिप्रसक्तिं चैतेषां मनसा संनिवर्तयेत्

atiprasaktiṃ caiteṣāṃ manasā saṃnivartayet

Manusmṛti