3.53

आर्षे गोमिथुनं शुल्कं केचिद् आहुर् मृषैव तत्

ārṣe gomithunaṃ śulkaṃ kecid āhur mṛṣaiva tat

3.53.2

अल्पो ऽप्य् एवं महान् वापि विक्रयस् तावद् एव सः

alpo 'py evaṃ mahān vāpi vikrayas tāvad eva saḥ

3.54

यासां नाददते शुल्कं ज्ञातयो न स विक्रयः

yāsāṃ nādadate śulkaṃ jñātayo na sa vikrayaḥ

3.54.2

अर्हणं तत् कुमारीणाम् आनृशंस्यं च केवलम्

arhaṇaṃ tat kumārīṇām ānṛśaṃsyaṃ ca kevalam

3.55

पितृभिर् भ्रातृभिश् चैताः पतिभिर् देवरैस् तथा

pitṛbhir bhrātṛbhiś caitāḥ patibhir devarais tathā

3.55.2

पूज्या भूषयितव्याश् च बहुकल्याणम् ईप्सुभिः

pūjyā bhūṣayitavyāś ca bahukalyāṇam īpsubhiḥ

3.56

यत्र नार्यस् तु पूज्यन्ते रमन्ते तत्र देवताः

yatra nāryas tu pūjyante ramante tatra devatāḥ

3.56.2

यत्रैतास् तु न पूज्यन्ते सर्वास् तत्राफलाः क्रियाः

yatraitās tu na pūjyante sarvās tatrāphalāḥ kriyāḥ

3.57

शोचन्ति जामयो यत्र विनश्यत्य् आशु तत् कुलम्

śocanti jāmayo yatra vinaśyaty āśu tat kulam

3.57.2

न शोचन्ति तु यत्रैता वर्धते तद्धि सर्वदा

na śocanti tu yatraitā vardhate taddhi sarvadā

3.58

जामयो यानि गेहानि शपन्त्य् अप्रतिपूजिताः

jāmayo yāni gehāni śapanty apratipūjitāḥ

3.58.2

तानि कृत्याहतानीव विनश्यन्ति समन्ततः

tāni kṛtyāhatānīva vinaśyanti samantataḥ

3.59

तस्माद् एताः सदा पूज्या भूषणाच्छादनाशनैः

tasmād etāḥ sadā pūjyā bhūṣaṇācchādanāśanaiḥ

3.59.2

भूतिकामैर् नरैर् नित्यं सत्करेषूत्सवेषु

bhūtikāmair narair nityaṃ satkareṣūtsaveṣu

3.60

संतुष्टो भार्यया भर्ता भर्त्रा भार्या तथैव च

saṃtuṣṭo bhāryayā bhartā bhartrā bhāryā tathaiva ca

3.60.2

यस्मिन्न् एव कुले नित्यं कल्याणं तत्र वै ध्रुवम्

yasminn eva kule nityaṃ kalyāṇaṃ tatra vai dhruvam

3.61

यदि हि स्त्री न रोचेत पुमांसं न प्रमोदयेत्

yadi hi strī na roceta pumāṃsaṃ na pramodayet

3.61.2

अप्रमोदात् पुनः पुंसः प्रजनं न प्रवर्तते

apramodāt punaḥ puṃsaḥ prajanaṃ na pravartate

3.62

स्त्रियां तु रोचमानायां सर्वं तद् रोचते कुलम्

striyāṃ tu rocamānāyāṃ sarvaṃ tad rocate kulam

3.62.2

तस्यां त्व् अरोचमानायां सर्वम् एव न रोचते

tasyāṃ tv arocamānāyāṃ sarvam eva na rocate

Manusmṛti