9.84

यदि स्वाश् चापराश् चैव विन्देरन् योषितो द्विजाः

yadi svāś cāparāś caiva vinderan yoṣito dvijāḥ

9.84.2

तासां वर्णक्रमेण स्याज् ज्यैष्ठ्यं पूजा च वेश्म च

tāsāṃ varṇakrameṇa syāj jyaiṣṭhyaṃ pūjā ca veśma ca

9.85

भर्तुः शरीरशुश्रूषां धर्मकार्यं च नैत्यकम्

bhartuḥ śarīraśuśrūṣāṃ dharmakāryaṃ ca naityakam

9.85.2

स्वा चैव कुर्यात् सर्वेषां नास्वजातिः कथंचन

svā caiva kuryāt sarveṣāṃ nāsvajātiḥ kathaṃcana

9.86

यस् तु तत् कारयेन् मोहात् सजात्या स्थितयान्यया

yas tu tat kārayen mohāt sajātyā sthitayānyayā

9.86.2

यथा ब्राह्मणचाण्डालः पूर्वदृष्टस् तथैव सः

yathā brāhmaṇacāṇḍālaḥ pūrvadṛṣṭas tathaiva saḥ

9.87

उत्कृष्टायाभिरूपाय वराय सदृशाय च

utkṛṣṭāyābhirūpāya varāya sadṛśāya ca

9.87.2

अप्राप्ताम् अपि तां तस्मै कन्यां दद्याद् यथाविधि

aprāptām api tāṃ tasmai kanyāṃ dadyād yathāvidhi

9.88

कामम् आ मरणात् तिष्ठेद् गृहे कन्यर्तुमत्य्

kāmam ā maraṇāt tiṣṭhed gṛhe kanyartumaty

9.88.2

न चैवैनां प्रयच्छेत् तु गुणहीनाय कर्हिचित्

na caivaināṃ prayacchet tu guṇahīnāya karhicit

9.89

त्रीणि वर्षाण्य् उदीक्षेत कुमार्य् ऋतुमती सती

trīṇi varṣāṇy udīkṣeta kumāry ṛtumatī satī

9.89.2

ऊर्ध्वं तु कालाद् एतस्माद् विन्देत सदृशं पतिम्

ūrdhvaṃ tu kālād etasmād vindeta sadṛśaṃ patim

9.90

अदीयमाना भर्तारम् अधिगच्छेद् यदि स्वयम्

adīyamānā bhartāram adhigacched yadi svayam

9.90.2

नैनः किंचिद् अवाप्नोति न च यं साधिगच्छति

nainaḥ kiṃcid avāpnoti na ca yaṃ sādhigacchati

9.91

अलंकारं नाददीत पित्र्यं कन्या स्वयंवरा

alaṃkāraṃ nādadīta pitryaṃ kanyā svayaṃvarā

9.91.2

मातृकं भ्रातृदत्तं वा स्तेना स्याद् यदि तं हरेत्

mātṛkaṃ bhrātṛdattaṃ vā stenā syād yadi taṃ haret

9.92

पित्रे न दद्याच् छुल्कं तु कन्याम् ऋतुमतीं हरन्

pitre na dadyāc chulkaṃ tu kanyām ṛtumatīṃ haran

9.92.2

स च स्वाम्याद् अतिक्रामेद् ऋतूनां प्रतिरोधनात्

sa ca svāmyād atikrāmed ṛtūnāṃ pratirodhanāt

9.93

त्रिंशद्वर्षो वहेत् कन्यां हृद्यां द्वादशवार्षिकीम्

triṃśadvarṣo vahet kanyāṃ hṛdyāṃ dvādaśavārṣikīm

9.93.2

त्र्यष्टवर्षो ऽष्टवर्षां वा धर्मे सीदति सत्वरः

tryaṣṭavarṣo 'ṣṭavarṣāṃ vā dharme sīdati satvaraḥ

Manusmṛti