9.44

एतावान् एव पुरुषो यज् जायात्मा प्रजेति ह

etāvān eva puruṣo yaj jāyātmā prajeti ha

9.44.2

विप्राः प्राहुस् तथा चैतद् यो भर्ता सा स्मृताङ्गना

viprāḥ prāhus tathā caitad yo bhartā sā smṛtāṅganā

9.45

न निष्क्रयविसर्गाभ्यां भर्तुर् भार्या विमुच्यते

na niṣkrayavisargābhyāṃ bhartur bhāryā vimucyate

9.45.2

एवं धर्मं विजानीमः प्राक् प्रजापतिनिर्मितम्

evaṃ dharmaṃ vijānīmaḥ prāk prajāpatinirmitam

9.46

सकृद् अंशो निपतति सकृत् कन्या प्रदीयते

sakṛd aṃśo nipatati sakṛt kanyā pradīyate

9.46.2

सकृद् आह ददानीति त्रीण्य् एतानि सतां सकृत्

sakṛd āha dadānīti trīṇy etāni satāṃ sakṛt

9.47

यथा गोऽश्वोष्ट्रदासीषु महिष्यजाविकासु च

yathā go'śvoṣṭradāsīṣu mahiṣyajāvikāsu ca

9.47.2

नोत्पादकः प्रजाभागी तथैवान्याङ्गनास्व् अपि

notpādakaḥ prajābhāgī tathaivānyāṅganāsv api

9.48

ये ऽक्षेत्रिणो बीजवन्तः परक्षेत्रप्रवापिणः

ye 'kṣetriṇo bījavantaḥ parakṣetrapravāpiṇaḥ

9.48.2

ते वै सस्यस्य जातस्य न लभन्ते फलं क्वचित्

te vai sasyasya jātasya na labhante phalaṃ kvacit

9.49

यद् अन्यगोषु वृषभो वत्सानां जनयेत् शतम्

yad anyagoṣu vṛṣabho vatsānāṃ janayet śatam

9.49.2

गोमिनाम् एव ते वत्सा मोघं स्कन्दितम् आर्षभम्

gominām eva te vatsā moghaṃ skanditam ārṣabham

9.50

तथैवाक्षेत्रिणो बीजं परक्षेत्रप्रवापिणः

tathaivākṣetriṇo bījaṃ parakṣetrapravāpiṇaḥ

9.50.2

कुर्वन्ति क्षेत्रिणाम् अर्थं न बीजी लभते फलम्

kurvanti kṣetriṇām arthaṃ na bījī labhate phalam

9.51

फलं त्व् अनभिसंधाय क्षेत्रिणां बीजिनाम् तथा

phalaṃ tv anabhisaṃdhāya kṣetriṇāṃ bījinām tathā

9.51.2

प्रत्यक्षं क्षेत्रिणाम् अर्थो बीजाद् योनिर् गरीयसी

pratyakṣaṃ kṣetriṇām artho bījād yonir garīyasī

9.52

क्रियाभ्युपगमात् त्व् एतद् बीजार्थं यत् प्रदीयते

kriyābhyupagamāt tv etad bījārthaṃ yat pradīyate

9.52.2

तस्येह भागिनौ दृष्टौ बीजी क्षेत्रिक एव च

tasyeha bhāginau dṛṣṭau bījī kṣetrika eva ca

9.53

ओघवाताहृतं बीजं यस्य क्षेत्रे प्ररोहति

oghavātāhṛtaṃ bījaṃ yasya kṣetre prarohati

9.53.2

क्षेत्रिकस्यैव तद् बीजं न वप्ता लभते फलम्

kṣetrikasyaiva tad bījaṃ na vaptā labhate phalam

Manusmṛti