2.22

आ समुद्रात् तु वै पूर्वाद् आ

samudrāt tu vai pūrvād ā samudrācca

2.22.2

तयोर् एवान्तरं गिर्योर् आर्यावर्तं विदुर् बुधाः

tayor evāntaraṃ giryor āryāvartaṃ vidur budhāḥ

2.23

कृष्णसारस् तु चरति मृगो यत्र स्वभावतः

kṛṣṇasāras tu carati mṛgo yatra svabhāvataḥ

2.23.2

स ज्ञेयो यज्ञियो देशो म्लेच्छदेशस् त्व् अतः परः

sa jñeyo yajñiyo deśo mlecchadeśas tv ataḥ paraḥ

2.24

एतान् द्विजातयो देशान् संश्रयेरन् प्रयत्नतः

etān dvijātayo deśān saṃśrayeran prayatnataḥ

2.24.2

शूद्रस् तु यस्मिन् कस्मिन् वा निवसेद् वृत्तिकर्शितः

śūdras tu yasmin kasmin vā nivased vṛttikarśitaḥ

2.25

एषा धर्मस्य वो योनिः समासेन प्रकीर्तिता

eṣā dharmasya vo yoniḥ samāsena prakīrtitā

2.25.2

सम्भवश् चास्य सर्वस्य वर्णधर्मान् निबोधत

sambhavaś cāsya sarvasya varṇadharmān nibodhata

2.26

वैदिकैः कर्मभिः पुण्यैर् निषेकादिर् द्विजन्मनाम्

vaidikaiḥ karmabhiḥ puṇyair niṣekādir dvijanmanām

2.26.2

कार्यः शरीरसंस्कारः पावनः प्रेत्य चेह च

kāryaḥ śarīrasaṃskāraḥ pāvanaḥ pretya ceha ca

2.27

गार्भैर् होमैर् जातकर्मचौडमौञ्जीनिबन्धनैः

gārbhair homair jātakarmacauḍamauñjīnibandhanaiḥ

2.27.2

बैजिकं गार्भिकं चैनो द्विजानाम् अपमृज्यते

baijikaṃ gārbhikaṃ caino dvijānām apamṛjyate

2.28

स्वाध्यायेन व्रतैर् होमैस् त्रैविद्येनेज्यया सुतैः

svādhyāyena vratair homais traividyenejyayā sutaiḥ

2.28.2

महायज्ञैश् च यज्ञैश् च ब्राह्मीयं क्रियते तनुः

mahāyajñaiś ca yajñaiś ca brāhmīyaṃ kriyate tanuḥ

2.29

प्राङ् नाभिवर्धनात् पुंसो जातकर्म विधीयते

prāṅ nābhivardhanāt puṃso jātakarma vidhīyate

2.29.2

मन्त्रवत् प्राशनं चास्य हिरण्यमधुसर्पिषाम्

mantravat prāśanaṃ cāsya hiraṇyamadhusarpiṣām

2.30

नामधेयं दशम्यां तु द्वादश्यां वास्य कारयेत्

nāmadheyaṃ daśamyāṃ tu dvādaśyāṃ vāsya kārayet

2.30.2

पुण्ये तिथौ मुहूर्ते वा नक्षत्रे वा गुणान्विते

puṇye tithau muhūrte vā nakṣatre vā guṇānvite

2.31

मङ्गल्यं ब्राह्मणस्य स्यात् क्षत्रियस्य बलान्वितम्

maṅgalyaṃ brāhmaṇasya syāt kṣatriyasya balānvitam

2.31.2

वैश्यस्य धनसंयुक्तं शूद्रस्य तु जुगुप्सितम्

vaiśyasya dhanasaṃyuktaṃ śūdrasya tu jugupsitam

Manusmṛti