2.2

कामात्मता न प्रशस्ता न चैवेहास्त्य् अकामता

kāmātmatā na praśastā na caivehāsty akāmatā

2.2.2

काम्यो हि वेदाधिगमः कर्मयोगश् च वैदिकः

kāmyo hi vedādhigamaḥ karmayogaś ca vaidikaḥ

2.3

संकल्पमूलः कामो वै यज्ञाः संकल्पसम्भवाः

saṃkalpamūlaḥ kāmo vai yajñāḥ saṃkalpasambhavāḥ

2.3.2

व्रतानि यमधर्माश् च सर्वे संकल्पजाः स्मृताः

vratāni yamadharmāś ca sarve saṃkalpajāḥ smṛtāḥ

2.4

अकामस्य क्रिया काचिद् दृश्यते नेह कर्हिचित्

akāmasya kriyā kācid dṛśyate neha karhicit

2.4.2

यद् यद्धि कुरुते किंचित् तत् तत् कामस्य चेष्टितम्

yad yaddhi kurute kiṃcit tat tat kāmasya ceṣṭitam

2.5

तेषु सम्यग् वर्तमानो गच्छत्य् अमरलोकताम्

teṣu samyag vartamāno gacchaty amaralokatām

2.5.2

यथा संकल्पितांश् चेह सर्वान् कामान् समश्नुते

yathā saṃkalpitāṃś ceha sarvān kāmān samaśnute

2.6

वेदो ऽखिलो धर्ममूलं स्मृतिशीले च तद्विदाम्

vedo 'khilo dharmamūlaṃ smṛtiśīle ca tadvidām

2.6.2

आचारश् चैव साधूनाम् आत्मनस् तुष्टिर् एव च

ācāraś caiva sādhūnām ātmanas tuṣṭir eva ca

2.7

यः कश्चित् कस्यचिद् धर्मो मनुना परिकीर्तितः

yaḥ kaścit kasyacid dharmo manunā parikīrtitaḥ

2.7.2

स सर्वो ऽभिहितो वेदे सर्वज्ञानमयो हि सः

sa sarvo 'bhihito vede sarvajñānamayo hi saḥ

2.8

सर्वं तु समवेक्ष्येदं निखिलं ज्ञानचक्षुषा

sarvaṃ tu samavekṣyedaṃ nikhilaṃ jñānacakṣuṣā

2.8.2

श्रुतिप्रामाण्यतो विद्वान् स्वधर्मे निविशेत वै

śrutiprāmāṇyato vidvān svadharme niviśeta vai

2.9

श्रुतिस्मृत्युदितं धर्मम् अनुतिष्ठन् हि मानवः

śrutismṛtyuditaṃ dharmam anutiṣṭhan hi mānavaḥ

2.9.2

इह कीर्तिम् अवाप्नोति प्रेत्य चानुत्तमं सुखम्

iha kīrtim avāpnoti pretya cānuttamaṃ sukham

2.10

श्रुतिस् तु वेदो विज्ञेयो धर्मशास्त्रं तु वै स्मृतिः

śrutis tu vedo vijñeyo dharmaśāstraṃ tu vai smṛtiḥ

2.10.2

ते सर्वार्थेष्व् अमीमांस्ये ताभ्यां धर्मो हि निर्बभौ

te sarvārtheṣv amīmāṃsye tābhyāṃ dharmo hi nirbabhau

2.11

यो ऽवमन्येत ते मूले हेतुशास्त्राश्रयाद् द्विजः

yo 'vamanyeta te mūle hetuśāstrāśrayād dvijaḥ

2.11.2

स साधुभिर् बहिष्कार्यो नास्तिको वेदनिन्दकः

sa sādhubhir bahiṣkāryo nāstiko vedanindakaḥ

Manusmṛti