7.1

राजधर्मान् प्रवक्ष्यामि यथावृत्तो भवेन् नृपः

rājadharmān pravakṣyāmi yathāvṛtto bhaven nṛpaḥ

7.1.2

सम्भवश् च यथा तस्य सिद्धिश् च परमा यथा

sambhavaś ca yathā tasya siddhiś ca paramā yathā

7.2

ब्राह्मं प्राप्तेन संस्कारं क्षत्रियेण यथाविधि

brāhmaṃ prāptena saṃskāraṃ kṣatriyeṇa yathāvidhi

7.2.2

सर्वस्यास्य यथान्यायं कर्तव्यं परिरक्षणम्

sarvasyāsya yathānyāyaṃ kartavyaṃ parirakṣaṇam

7.3

अराजके हि लोके ऽस्मिन् सर्वतो विद्रुतो भयात्

arājake hi loke 'smin sarvato vidruto bhayāt

7.3.2

रक्षार्थम् अस्य सर्वस्य राजानम् असृजत् प्रभुः

rakṣārtham asya sarvasya rājānam asṛjat prabhuḥ

7.4

इन्द्रानिलयमार्काणाम् अग्नेश् च वरुणस्य च

indrānilayamārkāṇām agneś ca varuṇasya ca

7.4.2

चन्द्रवित्तेशयोश् चैव मात्रा निर्हृत्य शाश्वतीः

candravitteśayoś caiva mātrā nirhṛtya śāśvatīḥ

7.5

यस्माद् एषां सुरेन्द्राणां मात्राभ्यो निर्मितो नृपः

yasmād eṣāṃ surendrāṇāṃ mātrābhyo nirmito nṛpaḥ

7.5.2

तस्माद् अभिभवत्य् एष सर्वभूतानि तेजसा

tasmād abhibhavaty eṣa sarvabhūtāni tejasā

7.6

तपत्य् आदित्यवच् चैष चक्षूंषि च मनांसि च

tapaty ādityavac caiṣa cakṣūṃṣi ca manāṃsi ca

7.6.2

न चैनं भुवि शक्नोति कश्चिद् अप्य् अभिवीक्षितुम्

na cainaṃ bhuvi śaknoti kaścid apy abhivīkṣitum

7.7

सो ऽग्निर् भवति वायुश् च सो ऽर्कः सोमः स धर्मराट्

so 'gnir bhavati vāyuś ca so 'rkaḥ somaḥ sa dharmarāṭ

7.7.2

स कुबेरः स वरुणः स महेन्द्रः प्रभावतः

sa kuberaḥ sa varuṇaḥ sa mahendraḥ prabhāvataḥ

7.8

बालो ऽपि नावमन्तव्यो मनुष्य इति भूमिपः

bālo 'pi nāvamantavyo manuṣya iti bhūmipaḥ

7.8.2

महती देवता ह्य् एषा नररूपेण तिष्ठति

mahatī devatā hy eṣā nararūpeṇa tiṣṭhati

7.9

एकम् एव दहत्य् अग्निर् नरं दुरुपसर्पिणम्

ekam eva dahaty agnir naraṃ durupasarpiṇam

7.9.2

कुलं दहति राजाग्निः सपशुद्रव्यसंचयम्

kulaṃ dahati rājāgniḥ sapaśudravyasaṃcayam

7.10

कार्यं सो ऽवेक्ष्य शक्तिं च देशकालौ च तत्त्वतः

kāryaṃ so 'vekṣya śaktiṃ ca deśakālau ca tattvataḥ

7.10.2

कुरुते धर्मसिद्ध्यर्थं विश्वरूपं पुनः पुनः

kurute dharmasiddhyarthaṃ viśvarūpaṃ punaḥ punaḥ

Manusmṛti