12.139.81

श्वपच उवाच

śvapaca uvāca

12.139.81.2

नैवोत्सहे भवते दातुम् एतां नोपेक्षितुं ह्रियमाणं स्वम् अन्नम्

naivotsahe bhavate dātum etāṃ nopekṣituṃ hriyamāṇaṃ svam annam

12.139.81.3

उभौ स्यावः स्वमलेनावलिप्तौ दाताहं च त्वं च विप्र

ubhau syāvaḥ svamalenāvaliptau dātāhaṃ ca tvaṃ ca vipra

12.139.82

विश्वामित्र उवाच

viśvāmitra uvāca

12.139.82.2

अद्याहम् एतद् वृजिनं कर्म कृत्वा जीवंश्चरिष्यामि महापवित्रम्

adyāham etad vṛjinaṃ karma kṛtvā jīvaṃścariṣyāmi mahāpavitram

12.139.82.3

प्रपूतात्मा धर्मम् एवाभिपत्स्ये यद् एतयोर् गुरु तद् वै ब्रवीहि

prapūtātmā dharmam evābhipatsye yad etayor guru tad vai bravīhi

12.139.83

श्वपच उवाच

śvapaca uvāca

12.139.83.2

आत्मैव साक्षी किल लोककृत्ये त्वम् एव जानासि यद् अत्र दुष्टम्

ātmaiva sākṣī kila lokakṛtye tvam eva jānāsi yad atra duṣṭam

12.139.83.3

यो ह्याद्रियेद् भक्ष्यम् इति श्वमांसं मन्ये न तस्यास्ति विवर्जनीयम्

yo hyādriyed bhakṣyam iti śvamāṃsaṃ manye na tasyāsti vivarjanīyam

12.139.84

विश्वामित्र उवाच

viśvāmitra uvāca

12.139.84.2

उपादाने खादने वास्य दोषः कार्यो न्यायैर् नित्यम् अत्रापवादः

upādāne khādane vāsya doṣaḥ kāryo nyāyair nityam atrāpavādaḥ

12.139.84.3

यस्मिन्न हिंसा नानृते वाक्यलेशो भक्ष्यक्रिया तत्र न तद् गरीयः

yasminna hiṃsā nānṛte vākyaleśo bhakṣyakriyā tatra na tad garīyaḥ

12.139.85

श्वपच उवाच

śvapaca uvāca

12.139.85.2

यद्येष हेतुस्तव खादनस्य न ते वेदः कारणं नान्यधर्मः

yadyeṣa hetustava khādanasya na te vedaḥ kāraṇaṃ nānyadharmaḥ

12.139.85.3

तस्माद् अभक्ष्ये भक्षणाद् वा द्विजेन्द्र दोषं न पश्यामि यथेदम् आत्थ

tasmād abhakṣye bhakṣaṇād vā dvijendra doṣaṃ na paśyāmi yathedam āttha

12.139.86

विश्वामित्र उवाच

viśvāmitra uvāca

12.139.86.2

न पातकं भक्षणम् अस्य दृष्टं सुरां पीत्वा पततीतीह शब्दः

na pātakaṃ bhakṣaṇam asya dṛṣṭaṃ surāṃ pītvā patatītīha śabdaḥ

12.139.86.3

अन्योन्यकर्माणि तथा तथैव न लेशमात्रेण कृत्यं हिनस्ति

anyonyakarmāṇi tathā tathaiva na leśamātreṇa kṛtyaṃ hinasti

12.139.87

श्वपच उवाच

śvapaca uvāca

12.139.87.2

अस्थानतो हीनतः कुत्सिताद् वा तं विद्वांसं बाधते साधुवृत्तम्

asthānato hīnataḥ kutsitād vā taṃ vidvāṃsaṃ bādhate sādhuvṛttam