1.43.46

स्वर्णोदकेति तामाह देवदेवस्त्रियंबकः

svarṇodaketi tāmāha devadevastriyaṃbakaḥ

1.43.46.2

जाम्बूनदमयाद्यस्माद्द्वितीया मुकुटाच्छुभा

jāmbūnadamayādyasmāddvitīyā mukuṭācchubhā

1.43.47

प्रावर्तत नदी पुण्या ऊचुर् जम्बूनदीति ताम्

prāvartata nadī puṇyā ūcur jambūnadīti tām

1.43.47.2

एतत्पञ्चनदं नाम जप्येश्वरसमीपगम्

etatpañcanadaṃ nāma japyeśvarasamīpagam

1.43.48

यः पञ्चनदमासाद्य स्नात्वा जप्येश्वरेश्वरम्

yaḥ pañcanadamāsādya snātvā japyeśvareśvaram

1.43.48.2

पूजयेच्छिवसायुज्यं प्रयात्येव न संशयः

pūjayecchivasāyujyaṃ prayātyeva na saṃśayaḥ

1.43.49

अथ देवो महादेवः सर्वभूतपतिर्भवः

atha devo mahādevaḥ sarvabhūtapatirbhavaḥ

1.43.49.2

देवीमुवाच शर्वाणीमुमां गिरिसुतामजाम्

devīmuvāca śarvāṇīmumāṃ girisutāmajām

1.43.50

देवी नन्दीश्वरं देवमभिषिञ्चामि भूतपम्

devī nandīśvaraṃ devamabhiṣiñcāmi bhūtapam

1.43.50.2

गणेन्द्रं व्याहरिष्यामि किं वा त्वं मन्यसे ऽव्यये

gaṇendraṃ vyāhariṣyāmi kiṃ vā tvaṃ manyase 'vyaye

1.43.51

तस्य तद्वचनं श्रुत्वा भवानी हर्षितानना

tasya tadvacanaṃ śrutvā bhavānī harṣitānanā

1.43.51.2

स्मयन्ती वरदं प्राह भवं भूतपतिं पतिम्

smayantī varadaṃ prāha bhavaṃ bhūtapatiṃ patim

1.43.52

सर्वलोकाधिपत्यं च गणेशत्वं तथैव च

sarvalokādhipatyaṃ ca gaṇeśatvaṃ tathaiva ca

1.43.52.2

दातुमर्हसि देवेश शैलादिस्तनयो मम

dātumarhasi deveśa śailādistanayo mama

1.43.53

ततः स भगवाञ्शर्वः सर्वलोकेश्वरेश्वरः

tataḥ sa bhagavāñśarvaḥ sarvalokeśvareśvaraḥ

1.43.53.2

सस्मार गणपान् दिव्यान्देवदेवो वृषध्वजः

sasmāra gaṇapān divyāndevadevo vṛṣadhvajaḥ

1.43.54

इति श्रीलिङ्गमहापुराणे पूर्वभागे नन्दिकेश्वरप्रादुर्भावनन्दिकेश्वराभिषेकमन्त्रो नाम त्रिचत्वारिंशो ऽध्यायः

iti śrīliṅgamahāpurāṇe pūrvabhāge nandikeśvaraprādurbhāvanandikeśvarābhiṣekamantro nāma tricatvāriṃśo 'dhyāyaḥ

1.44.1

शैलादिरुवाच

śailādiruvāca

1.44.1.2

स्मरणादेव रुद्रस्य सम्प्राप्ताश् च गणेश्वराः

smaraṇādeva rudrasya samprāptāś ca gaṇeśvarāḥ

1.44.1.3

सर्वे सहस्रहस्ताश् च सहस्रायुधपाणयः

sarve sahasrahastāś ca sahasrāyudhapāṇayaḥ

Liṅgapurāṇa