7.88

इति हि भिक्षवो ऽसितो महर्षिः पश्यति स्म राज्ञः शुद्धोदनस्य गृहद्वारे ऽनेकानि प्राणिशतसहस्राणि संनिपतितानि

iti hi bhikṣavo 'sito maharṣiḥ paśyati sma rājñaḥ śuddhodanasya gṛhadvāre 'nekāni prāṇiśatasahasrāṇi saṃnipatitāni

7.88.2

अथ खल्वसितो महर्षिर्दौवारिकमुपसंक्रम्यैवमाह गच्छ त्वं भोः पुरुष राज्ञः शुद्धोदनस्य निवेदय द्वारे ऋषिर्व्यवस्थित इति

atha khalvasito maharṣirdauvārikamupasaṃkramyaivamāha gaccha tvaṃ bhoḥ puruṣa rājñaḥ śuddhodanasya nivedaya dvāre ṛṣirvyavasthita iti

7.88.3

परमेति दौवारिको ऽसितस्य महर्षेः प्रतिश्रुत्य येन राजा शुद्धोदनस्तेनोपसंक्रामत्

parameti dauvāriko 'sitasya maharṣeḥ pratiśrutya yena rājā śuddhodanastenopasaṃkrāmat

7.88.4

उपसंक्रम्य कृताञ्जलिपुटो राजानं शुद्धोदनमेवमाह यत् खलु देव जानीया ऋषिर्जीर्णो वृद्धो महल्लको द्वारे स्थितः

upasaṃkramya kṛtāñjalipuṭo rājānaṃ śuddhodanamevamāha yat khalu deva jānīyā ṛṣirjīrṇo vṛddho mahallako dvāre sthitaḥ

7.88.5

एवं च वदति राजानमहं द्रष्टुकाम इति

evaṃ ca vadati rājānamahaṃ draṣṭukāma iti

7.88.6

अथ राजा शुद्धोदनो ऽसितस्य महर्षेरासनं प्रज्ञाप्य तं पुरुषमेवमाह प्रविशतु ऋषिरिति

atha rājā śuddhodano 'sitasya maharṣerāsanaṃ prajñāpya taṃ puruṣamevamāha praviśatu ṛṣiriti

7.88.7

अथ स पुरुषो राजकुलान्निष्क्रम्यासितं महर्षिमेवमाह प्रविशेति

atha sa puruṣo rājakulānniṣkramyāsitaṃ maharṣimevamāha praviśeti

7.89

अथ खल्वसितो महर्षिर्येन राजा शुद्धोदनस्तेनोपसंक्रामत्

atha khalvasito maharṣiryena rājā śuddhodanastenopasaṃkrāmat

7.89.2

उपसंक्रम्य पुरतः स्थित्वा राजानं शुद्धोदनमेवमाह जय जय महाराज चिरमायुः पालय धर्मेण राज्यं कारयेति

upasaṃkramya purataḥ sthitvā rājānaṃ śuddhodanamevamāha jaya jaya mahārāja ciramāyuḥ pālaya dharmeṇa rājyaṃ kārayeti

7.90

अथ स राजा शुद्धोदनो ऽसितस्य महर्षेरर्घपाद्यमर्चनं च कृत्वा साधु सुष्ठु च परिगृह्य आसनेनोपनिमन्त्रयते स्म

atha sa rājā śuddhodano 'sitasya maharṣerarghapādyamarcanaṃ ca kṛtvā sādhu suṣṭhu ca parigṛhya āsanenopanimantrayate sma

7.90.2

सुखोपविष्टं चैनं ज्ञात्वा सगौरवः सुप्रतीत एवमाह न स्मराम्यहं तव ऋषे दर्शनम्

sukhopaviṣṭaṃ cainaṃ jñātvā sagauravaḥ supratīta evamāha na smarāmyahaṃ tava ṛṣe darśanam

7.90.3

तत्केनार्थेनेहाभ्यागतो ऽसि किं प्रयोजनम्

tatkenārthenehābhyāgato 'si kiṃ prayojanam

7.90.4

एवमुक्ते ऽसितो महर्षी राजानं शुद्धोदनमेतदवोचत् पुत्रस्ते महाराज जातस्तमहं द्रष्टुकाम इहागत इति

evamukte 'sito maharṣī rājānaṃ śuddhodanametadavocat putraste mahārāja jātastamahaṃ draṣṭukāma ihāgata iti

7.91

राजा आह स्वपिति महर्षे कुमारः

rājā āha svapiti maharṣe kumāraḥ

7.91.2

मुहूर्तमागमय यावदुत्थास्यतीति

muhūrtamāgamaya yāvadutthāsyatīti

7.92

ऋषिरवोचन् न महाराज तादृशा महापुरुषाश्चिरं स्वपन्ति

ṛṣiravocan na mahārāja tādṛśā mahāpuruṣāściraṃ svapanti

7.92.2

जागरशीलास्तादृशाः सत्पुरुषा भवन्ति

jāgaraśīlāstādṛśāḥ satpuruṣā bhavanti

7.93

इति हि भिक्षवो बोधिसत्त्वो ऽसितस्य महर्षेरनुकम्पया जागरणनिमित्तमकरोत्

iti hi bhikṣavo bodhisattvo 'sitasya maharṣeranukampayā jāgaraṇanimittamakarot

7.93.2

अथ खलु राजा शुद्धोदनः सर्वार्थसिद्धं कुमारमुभाभ्यां पाणिभ्यां साधु च सुष्ठु चानुपरिगृह्य असितस्य महर्षेरन्तिकमुपनामयति स्म

atha khalu rājā śuddhodanaḥ sarvārthasiddhaṃ kumāramubhābhyāṃ pāṇibhyāṃ sādhu ca suṣṭhu cānuparigṛhya asitasya maharṣerantikamupanāmayati sma

7.94

इति हि असितो महर्षिर्बोधिसत्त्वमवलोक्य द्वात्रिंशता महापुरुषलक्षणैः समन्वागतमशीत्यनुव्यञ्जनसुविचित्रगात्रं शक्रब्रह्मलोकपालातिरेकवपुषं दिनकरशतसहस्रातिरेकतेजसं सर्वाङ्गसुन्दरं दृष्ट्वा चोदानमुदानयति स्म आश्चर्यपुद्गलो बतायं लोके प्रादुर्भूत महाश्चर्यपुद्गलो बतायं लोके प्रादुर्भूत इत्युत्थायासनात्कृताञ्जलिपुटो बोधिसत्त्वस्य चरणयोः प्रणिपत्य प्रदक्षिणीकृत्य च बोधिसत्त्वमङ्केन परिगृह्य निध्यायन्नवस्थितो ऽभूत्

iti hi asito maharṣirbodhisattvamavalokya dvātriṃśatā mahāpuruṣalakṣaṇaiḥ samanvāgatamaśītyanuvyañjanasuvicitragātraṃ śakrabrahmalokapālātirekavapuṣaṃ dinakaraśatasahasrātirekatejasaṃ sarvāṅgasundaraṃ dṛṣṭvā codānamudānayati sma āścaryapudgalo batāyaṃ loke prādurbhūta mahāścaryapudgalo batāyaṃ loke prādurbhūta ityutthāyāsanātkṛtāñjalipuṭo bodhisattvasya caraṇayoḥ praṇipatya pradakṣiṇīkṛtya ca bodhisattvamaṅkena parigṛhya nidhyāyannavasthito 'bhūt

Lalitavistara