7.39.2

भगवानाह या गतिर् बुद्धबोधिम् अन्तर्धायाप्यतीतानागतप्रत्युत्पन्नांश्च बुद्धान् भगवतो ऽत्याख्याय तां ते गतिं गमिष्यन्ति

bhagavānāha yā gatir buddhabodhim antardhāyāpyatītānāgatapratyutpannāṃśca buddhān bhagavato 'tyākhyāya tāṃ te gatiṃ gamiṣyanti

7.40

अथ खल्वायुष्मानानन्दः संहर्षितरोमकूपजातो नमो बुद्धाय इत्युक्त्वा भगवन्तमेतदवोचन् मूर्च्छा मे भगवन् कायस्याभूदिमं तेषामसत्पुरुषाणां समुदाचारं श्रुत्वा

atha khalvāyuṣmānānandaḥ saṃharṣitaromakūpajāto namo buddhāya ityuktvā bhagavantametadavocan mūrcchā me bhagavan kāyasyābhūdimaṃ teṣāmasatpuruṣāṇāṃ samudācāraṃ śrutvā

7.41

भगवानाह न तेषामानन्द समाचारो भविष्यति

bhagavānāha na teṣāmānanda samācāro bhaviṣyati

7.41.2

विषमसमुदाचाराः खलु पुनस्ते सत्त्वा भविष्यन्ति

viṣamasamudācārāḥ khalu punaste sattvā bhaviṣyanti

7.41.3

ते तेन विषमेन समुदाचारेणावीचौ महानरके प्रपतिष्यन्ति

te tena viṣamena samudācāreṇāvīcau mahānarake prapatiṣyanti

7.41.4

तत्कस्य हेतोर् ये केचिदानन्द भिक्षवो वा भिक्षुण्यो वा उपासको वा उपासिका वा इमानेवंरूपान् सूत्रान्तान् श्रुत्वा नाधिमोक्ष्यन्ति न श्रद्धास्यन्ति न प्रतिवेत्स्यन्ति ते च्युताः समाना अवीचौ महानरके प्रपतिष्यन्ति

tatkasya hetor ye kecidānanda bhikṣavo vā bhikṣuṇyo vā upāsako vā upāsikā vā imānevaṃrūpān sūtrāntān śrutvā nādhimokṣyanti na śraddhāsyanti na prativetsyanti te cyutāḥ samānā avīcau mahānarake prapatiṣyanti

7.41.5

मा आनन्द तथागताप्रामाणिकं अकार्षुः

mā ānanda tathāgatāprāmāṇikaṃ akārṣuḥ

7.41.6

तत्कस्माद्धेतोर् अप्रमेयो ह्यानन्द तथागतो गम्भीरो विपुलो दुरवगाहः

tatkasmāddhetor aprameyo hyānanda tathāgato gambhīro vipulo duravagāhaḥ

7.41.7

येषां केषांचिदानन्द इमानेवंरूपान् सूत्रान्ताञ्छ्रुत्वोपपत्स्यते प्रीतिप्रामोद्यं प्रसादलाभास्तैः सत्त्वैः सुलब्धाः

yeṣāṃ keṣāṃcidānanda imānevaṃrūpān sūtrāntāñchrutvopapatsyate prītiprāmodyaṃ prasādalābhāstaiḥ sattvaiḥ sulabdhāḥ

7.41.8

अमोघं च तेषां जीवितम् अमोघं च तेषां मानुष्यं सुचरितचरणाश्च ते आदत्तं च तैः सारं मुक्ताश्च ते त्रिभ्यो ऽपायेभ्यः भविष्यन्ति च ते पुत्रास्तथागतस्य परिप्राप्तं च तैः सर्वकार्यम् अमोघश्च तेषां श्रद्धाप्रतिलम्भः सुविभक्तं च तै राष्ट्रपिण्डं प्रसन्नाश्च ते ऽग्रसत्त्वैः संछिन्नास्तैर्मारपाशाः निस्तीर्णश्च तैः संसाराटवीकान्तारः समुद्धृतश्च तैः शोकशल्यो ऽनुप्राप्तं च तैः प्रामोद्यवस्तु सुगृहीतानि च तैः शरणगमनानि दक्षिणीयाश्च ते पूजार्हाः दुर्लभप्रादुर्भावाश्च ते लोके दक्षिणीयाश्च ते धारयितव्याः

amoghaṃ ca teṣāṃ jīvitam amoghaṃ ca teṣāṃ mānuṣyaṃ sucaritacaraṇāśca te ādattaṃ ca taiḥ sāraṃ muktāśca te tribhyo 'pāyebhyaḥ bhaviṣyanti ca te putrāstathāgatasya pariprāptaṃ ca taiḥ sarvakāryam amoghaśca teṣāṃ śraddhāpratilambhaḥ suvibhaktaṃ ca tai rāṣṭrapiṇḍaṃ prasannāśca te 'grasattvaiḥ saṃchinnāstairmārapāśāḥ nistīrṇaśca taiḥ saṃsārāṭavīkāntāraḥ samuddhṛtaśca taiḥ śokaśalyo 'nuprāptaṃ ca taiḥ prāmodyavastu sugṛhītāni ca taiḥ śaraṇagamanāni dakṣiṇīyāśca te pūjārhāḥ durlabhaprādurbhāvāśca te loke dakṣiṇīyāśca te dhārayitavyāḥ

7.41.9

तत्कस्य हेतोस् तथा हि ते सर्वलोके इममेवं सर्वलोकविप्रत्यनीकं तथागतधर्मं श्रद्दधन्ति

tatkasya hetos tathā hi te sarvaloke imamevaṃ sarvalokavipratyanīkaṃ tathāgatadharmaṃ śraddadhanti

7.41.10

न ते आनन्द सत्त्वा अवरकेण कुशलमूलेन समन्वागता भवन्ति

na te ānanda sattvā avarakeṇa kuśalamūlena samanvāgatā bhavanti

7.41.11

ते चानन्द सत्त्वा ममैकजातिप्रतिबद्धानि मित्राणि भविष्यन्ति

te cānanda sattvā mamaikajātipratibaddhāni mitrāṇi bhaviṣyanti

7.41.12

तत्कस्माद्धेतोः कश्चिदानन्द श्रवणादेव प्रियो भवति मनापश्च न तु दर्शनेन

tatkasmāddhetoḥ kaścidānanda śravaṇādeva priyo bhavati manāpaśca na tu darśanena

7.41.13

कश्चिदानन्द दर्शनेनापि प्रियो भवति मनापश्च न तु खलु पुनः श्रवणेन

kaścidānanda darśanenāpi priyo bhavati manāpaśca na tu khalu punaḥ śravaṇena

7.41.14

कश्चिदानन्द दर्शनेनापि श्रवणेनापि प्रियो भवति मनापश्च

kaścidānanda darśanenāpi śravaṇenāpi priyo bhavati manāpaśca

7.41.15

तेषां केषांचिदानन्द अहं दर्शनेन वा श्रवणेन वा प्रियो मनापो भवेयं निष्ठां त्वं तत्र गच्छेथाः न तानि ममैकजातिप्रतिबद्धानि मित्राणि

teṣāṃ keṣāṃcidānanda ahaṃ darśanena vā śravaṇena vā priyo manāpo bhaveyaṃ niṣṭhāṃ tvaṃ tatra gacchethāḥ na tāni mamaikajātipratibaddhāni mitrāṇi

7.41.16

दृष्टास्ते तथागतेन मोचयितव्यास्ते तथागतेन ते समगुणप्रत्यंशास् ते तथागतगुणप्रत्यंशास् ते तथागतेन कर्तव्या उपासकाः ते तथागतं शरणं गता उपात्तास्ते तथागतेन

dṛṣṭāste tathāgatena mocayitavyāste tathāgatena te samaguṇapratyaṃśās te tathāgataguṇapratyaṃśās te tathāgatena kartavyā upāsakāḥ te tathāgataṃ śaraṇaṃ gatā upāttāste tathāgatena

7.41.17

ममान्तिकात् खल्वप्यानन्द पूर्वं बोधिसत्त्वचर्यामेव तावच्चरतो ये केचिद्भयार्दिताः सत्त्वा आगत्य अभयं प्रतियाचन्ते स्म तेभ्यो ऽहं सत्त्वेभ्यो ऽभयं दत्तवान् किमङ्ग पुनरेतर्ह्यनुत्तरां सम्यक्संबोधिमभिसंबुद्धः

mamāntikāt khalvapyānanda pūrvaṃ bodhisattvacaryāmeva tāvaccarato ye kecidbhayārditāḥ sattvā āgatya abhayaṃ pratiyācante sma tebhyo 'haṃ sattvebhyo 'bhayaṃ dattavān kimaṅga punaretarhyanuttarāṃ samyaksaṃbodhimabhisaṃbuddhaḥ

7.41.18

श्रद्धायामानन्द योगः करणीयः

śraddhāyāmānanda yogaḥ karaṇīyaḥ

Lalitavistara