5.75.2

एवं दशभ्यो दिग्भ्य एकैकस्या दिशो बहूनि बोधिसत्त्वशतसहस्राणि सर्व एकजातिप्रतिबद्धास्तुषितवरभवनवासिनो येन बोधिसत्त्वस्तेनोपसंक्रामन् बोधिसत्त्वस्य पूजाकर्मणे

evaṃ daśabhyo digbhya ekaikasyā diśo bahūni bodhisattvaśatasahasrāṇi sarva ekajātipratibaddhāstuṣitavarabhavanavāsino yena bodhisattvastenopasaṃkrāman bodhisattvasya pūjākarmaṇe

5.75.3

चातुर्महाराजकायिकेभ्यो देवेभ्यश्चतुरशीत्यप्सरःशतसहस्राण्येवं त्रयत्रिंशतो यामेभ्यस्तुषितेभ्यो निर्माणरतिभ्यः परनिर्मितवशवर्तिभ्यो देवेभ्यश्चतुरशीत्यप्सरःशतसहस्राणि नानातूर्यसंगीतिवादितेन येन बोधिसत्त्वस्तेनोपसंक्रामन् बोधिसत्त्वस्य पूजाकर्मणे

cāturmahārājakāyikebhyo devebhyaścaturaśītyapsaraḥśatasahasrāṇyevaṃ trayatriṃśato yāmebhyastuṣitebhyo nirmāṇaratibhyaḥ paranirmitavaśavartibhyo devebhyaścaturaśītyapsaraḥśatasahasrāṇi nānātūryasaṃgītivāditena yena bodhisattvastenopasaṃkrāman bodhisattvasya pūjākarmaṇe

5.76

अथ खलु बोधिसत्त्वः श्रीगर्भसिंहासने सर्वपुण्यसमुद्गते सर्वदेवनागसंदर्शने महाकूटागारे निषद्य सार्धं बोधिसत्त्वैर्देवनागयक्षकोटिनियुतशतसहस्रैः परिवृतः पुरस्कृतस्तुषितवरभवनात् प्रचलति स्म

atha khalu bodhisattvaḥ śrīgarbhasiṃhāsane sarvapuṇyasamudgate sarvadevanāgasaṃdarśane mahākūṭāgāre niṣadya sārdhaṃ bodhisattvairdevanāgayakṣakoṭiniyutaśatasahasraiḥ parivṛtaḥ puraskṛtastuṣitavarabhavanāt pracalati sma

5.76.2

प्रचलता च भिक्षवो बोधिसत्त्वेन तथारूपा कायात् प्रभा मुक्ताभूद् यया प्रभया अयं त्रिसाहस्रमहासाहस्रो लोकधातुरेवं विपुलविस्तीर्णो महतोदारेण सुप्रचलितपूर्वेण दिव्यप्रभासमतिक्रान्तेनावभासेन परिस्फुटो ऽभूत्

pracalatā ca bhikṣavo bodhisattvena tathārūpā kāyāt prabhā muktābhūd yayā prabhayā ayaṃ trisāhasramahāsāhasro lokadhāturevaṃ vipulavistīrṇo mahatodāreṇa supracalitapūrveṇa divyaprabhāsamatikrāntenāvabhāsena parisphuṭo 'bhūt

5.76.3

या अपि ता लोकान्तरिका अघा अघस्फुटा अन्धकारास्तमिस्रा यत्रेमौ चन्द्रसूर्यावेवं महर्द्धिकावेवं महानुभावावेवं महेशाख्यौ आभया आभां वर्णेन वर्णं तेजसा तेजो नाभितपतो नाभिविरोचतः तत्र ये सत्त्वा उपपन्नास्ते स्वकानपि बाहुप्रसारितान्न पश्यन्ति

yā api tā lokāntarikā aghā aghasphuṭā andhakārāstamisrā yatremau candrasūryāvevaṃ maharddhikāvevaṃ mahānubhāvāvevaṃ maheśākhyau ābhayā ābhāṃ varṇena varṇaṃ tejasā tejo nābhitapato nābhivirocataḥ tatra ye sattvā upapannāste svakānapi bāhuprasāritānna paśyanti

5.76.4

तथापि तस्मिन् समये महत उदारस्यावभासस्य प्रादुर्भावो ऽभूत्

tathāpi tasmin samaye mahata udārasyāvabhāsasya prādurbhāvo 'bhūt

5.76.5

ये च तत्र सत्त्वा उपपन्नास्ते तेनैवावभासेन स्फुटाः समाना अन्योन्यं सम्यक् पश्यन्ति स्म

ye ca tatra sattvā upapannāste tenaivāvabhāsena sphuṭāḥ samānā anyonyaṃ samyak paśyanti sma

5.76.6

अन्योन्यं संजानन्ते स्म

anyonyaṃ saṃjānante sma

5.76.7

एवं चाहुर् अन्ये ऽपि किल भोः सत्त्वा इहोपपन्नाः किल भो इति

evaṃ cāhur anye 'pi kila bhoḥ sattvā ihopapannāḥ kila bho iti

5.77

अयं च त्रिसाहस्रमहासाहस्रो लोकधातुः षड्विकारम् अष्टादशमहानिमित्तमभूत्

ayaṃ ca trisāhasramahāsāhasro lokadhātuḥ ṣaḍvikāram aṣṭādaśamahānimittamabhūt

5.77.2

अकम्पत् प्राकम्पत् सम्प्राकम्पत्

akampat prākampat samprākampat

5.77.3

अवेधत् प्रावेधत् संप्रावेधत्

avedhat prāvedhat saṃprāvedhat

5.77.4

अचलत् प्राचलत् संप्राचलत्

acalat prācalat saṃprācalat

5.77.5

अक्षुभ्यत् प्राक्षुभ्यत् सम्प्राक्षुभ्यत्

akṣubhyat prākṣubhyat samprākṣubhyat

5.77.6

अरणत् प्रारणत् संप्रारणत्

araṇat prāraṇat saṃprāraṇat

5.77.7

अगर्जत् प्रागर्जत् संप्रागर्जत्

agarjat prāgarjat saṃprāgarjat

5.77.8

अन्ते ऽवनमति स्म मध्ये उन्नमति स्म

ante 'vanamati sma madhye unnamati sma

5.77.9

मध्ये ऽवनमति स्म अन्ते उन्नमति स्म

madhye 'vanamati sma ante unnamati sma

5.77.10

पूर्वस्यां दिश्यवनमति स्म पश्चिमायां दिश्युन्नमति स्म

pūrvasyāṃ diśyavanamati sma paścimāyāṃ diśyunnamati sma

5.77.11

पश्चिमायां दिश्यवनमति स्म पूर्वस्यां दिश्युन्नमति स्म

paścimāyāṃ diśyavanamati sma pūrvasyāṃ diśyunnamati sma

Lalitavistara