3.16

किं कारणं बोधिसत्त्वो द्वीपविलोकितं विलोकयति स्म न बोधिसत्त्वाः प्रत्यन्तद्वीपा उपपद्यन्ते न पूर्वविदेहे नापरगोदानीये न चोत्तरकुरौ

kiṃ kāraṇaṃ bodhisattvo dvīpavilokitaṃ vilokayati sma na bodhisattvāḥ pratyantadvīpā upapadyante na pūrvavidehe nāparagodānīye na cottarakurau

3.16.2

अथ तर्हि जम्बुद्वीप एवोपपद्यन्ते

atha tarhi jambudvīpa evopapadyante

3.17

किं कारणं भिक्षवो बोधिसत्त्वो देशविलोकितं विलोकयति स्म न बोधिसत्त्वाः प्रत्यन्तजनपदेषूपपद्यन्ते येषु मनुष्या अन्धजात्या जडा एडमूकजातीया अभव्याः सुभाषितदुर्भाषितानामर्थं ज्ञातुम्

kiṃ kāraṇaṃ bhikṣavo bodhisattvo deśavilokitaṃ vilokayati sma na bodhisattvāḥ pratyantajanapadeṣūpapadyante yeṣu manuṣyā andhajātyā jaḍā eḍamūkajātīyā abhavyāḥ subhāṣitadurbhāṣitānāmarthaṃ jñātum

3.17.2

अथ तर्हि बोधिसत्त्वा मध्यमेष्वेव जनपदेषूपपद्यन्ते

atha tarhi bodhisattvā madhyameṣveva janapadeṣūpapadyante

3.18

किं कारणं भिक्षवो बोधिसत्त्वः कुलविलोकितं विलोकयति स्म न बोधिसत्त्वा हीनकुलेषूपपद्यन्ते चण्डालकुलेषु वा वेणुकारकुले वा रथकारकुले वा पुष्कसकुले वा

kiṃ kāraṇaṃ bhikṣavo bodhisattvaḥ kulavilokitaṃ vilokayati sma na bodhisattvā hīnakuleṣūpapadyante caṇḍālakuleṣu vā veṇukārakule vā rathakārakule vā puṣkasakule vā

3.18.2

अथ तर्हि कुलद्वये एवोपपद्यन्ते ब्राह्मणकुले क्षत्रियकुले च

atha tarhi kuladvaye evopapadyante brāhmaṇakule kṣatriyakule ca

3.18.3

तत्र यदा ब्राह्मणगुरुको लोको भवति तदा ब्राह्मणकुले उपपद्यन्ते

tatra yadā brāhmaṇaguruko loko bhavati tadā brāhmaṇakule upapadyante

3.18.4

यदा क्षत्रियगुरुको लोको भवति तदा क्षत्रियकुले उपपद्यन्ते

yadā kṣatriyaguruko loko bhavati tadā kṣatriyakule upapadyante

3.18.5

एतर्हि भिक्षवः क्षत्रियगुरुको लोकः

etarhi bhikṣavaḥ kṣatriyaguruko lokaḥ

3.18.6

तस्माद्बोधिसत्त्वाः क्षत्रियकुले उपपद्यन्ते

tasmādbodhisattvāḥ kṣatriyakule upapadyante

3.18.7

तमर्थं च सम्प्रतीत्य बोधिसत्त्वस्तुषितवरभवनस्थश्चत्वारि महाविलोकितानि विलोकयति स्म

tamarthaṃ ca sampratītya bodhisattvastuṣitavarabhavanasthaścatvāri mahāvilokitāni vilokayati sma

3.19

एवं चावलोक्य तूष्णीमभूत्

evaṃ cāvalokya tūṣṇīmabhūt

3.19.2

इति हि भिक्षवस्ते देवपुत्राः बोधिसत्त्वस्यान्योन्यं परिपृच्छन्ति स्म कतमस्मिन् कुलरत्ने कियद्रूपायां जनन्यां बोधिसत्त्वः

iti hi bhikṣavaste devaputrāḥ bodhisattvasyānyonyaṃ paripṛcchanti sma katamasmin kularatne kiyadrūpāyāṃ jananyāṃ bodhisattvaḥ

3.19.3

तत्र केचिदाहुः इदं वैदेहीकुलं मगधेषु जनपदेषु ऋद्धं च स्फीतं च क्षेमं सुभिक्षं च

tatra kecidāhuḥ idaṃ vaidehīkulaṃ magadheṣu janapadeṣu ṛddhaṃ ca sphītaṃ ca kṣemaṃ subhikṣaṃ ca

3.19.4

इदं प्रतिरूपमस्य बोधिसत्त्वस्य गर्भस्थानम्

idaṃ pratirūpamasya bodhisattvasya garbhasthānam

3.19.5

अपरे त्वाहुर् न तत्प्रतिरूपम्

apare tvāhur na tatpratirūpam

3.19.6

तत्कस्मात् तथा हि तन्न मातृशुद्धं पितृशुद्धं अप्लुतं चञ्चलमनवस्थितं परित्तपुण्याभिष्यन्दितं न विपुलपुण्याभिषिक्तं सत्कुलप्रदेशोपचारं नोद्यानसरस्तडागाकीर्णं कर्वटमिव प्रत्यन्तवासम्

tatkasmāt tathā hi tanna mātṛśuddhaṃ pitṛśuddhaṃ aplutaṃ cañcalamanavasthitaṃ parittapuṇyābhiṣyanditaṃ na vipulapuṇyābhiṣiktaṃ satkulapradeśopacāraṃ nodyānasarastaḍāgākīrṇaṃ karvaṭamiva pratyantavāsam

3.19.7

तेन न तत्प्रतिरूपम्

tena na tatpratirūpam

3.20

अपरे त्वाहुर् इदं पुनः कौशलकुलं महावाहनं च महापरिवारं च महाधनं च

apare tvāhur idaṃ punaḥ kauśalakulaṃ mahāvāhanaṃ ca mahāparivāraṃ ca mahādhanaṃ ca

3.20.2

तत्प्रतिरूपमस्य बोधिसत्त्वस्य गर्भप्रतिसंस्थानायेति

tatpratirūpamasya bodhisattvasya garbhapratisaṃsthānāyeti

Lalitavistara