7.54.2

पूर्वं महिम्ना स हि तस्य दूरम् आवर्जितं नात्मशिरो विवेद

pūrvaṃ mahimnā sa hi tasya dūram āvarjitaṃ nātmaśiro viveda

7.55

स प्रीतियोगाद् विकसन्मुखश्रीर् जामातुर् अग्रेसरताम् उपेत्य

sa prītiyogād vikasanmukhaśrīr jāmātur agresaratām upetya

7.55.2

प्रावेशयन् मन्दिरम् ऋद्धम् एनम् आ गुल्फकीर्णापणमार्गपुष्पम्

prāveśayan mandiram ṛddham enam ā gulphakīrṇāpaṇamārgapuṣpam

7.56

तस्मिन् मुहूर्ते पुरसुन्दरीणाम् ईशानसंदर्शनलालसानाम्

tasmin muhūrte purasundarīṇām īśānasaṃdarśanalālasānām

7.56.2

प्रासादमालासु बभूवुर् इत्थं त्यक्तान्यकार्याणि विचेष्टितानि

prāsādamālāsu babhūvur itthaṃ tyaktānyakāryāṇi viceṣṭitāni

7.57

आलोकमार्गं सहसा व्रजन्त्या कयाचिद् उद्वेष्टनवान्तमाल्यः

ālokamārgaṃ sahasā vrajantyā kayācid udveṣṭanavāntamālyaḥ

7.57.2

बन्धुं न संभावित एव तावत् करेण रुद्धो ऽपि न केशपाशः

bandhuṃ na saṃbhāvita eva tāvat kareṇa ruddho 'pi na keśapāśaḥ

7.58

प्रसाधिकालम्बितम् अग्रपादम् आक्षिप्य काचिद् द्रवरागम् एव

prasādhikālambitam agrapādam ākṣipya kācid dravarāgam eva

7.58.2

उत्सृष्टलीलागतिर् आ गवाक्षाद् अलक्तकाङ्कां पदवीं ततान

utsṛṣṭalīlāgatir ā gavākṣād alaktakāṅkāṃ padavīṃ tatāna

7.59

विलोचनं दक्षिणम् अञ्जनेन संभाव्य तद्वञ्चितवामनेत्रा

vilocanaṃ dakṣiṇam añjanena saṃbhāvya tadvañcitavāmanetrā

7.59.2

तथैव वातायनसंनिकर्षं ययौ शलाकाम् अपरा वहन्ती

tathaiva vātāyanasaṃnikarṣaṃ yayau śalākām aparā vahantī

7.60

जालान्तरप्रेषितदृष्टिर् अन्या प्रस्थानभिन्नां न बबन्ध नीवीम्

jālāntarapreṣitadṛṣṭir anyā prasthānabhinnāṃ na babandha nīvīm

7.60.2

नाभिप्रविष्टाभरणप्रभेण हस्तेन तस्थाव् अवलम्ब्य वासः

nābhipraviṣṭābharaṇaprabheṇa hastena tasthāv avalambya vāsaḥ

7.61

अर्धाचिता सत्वरम् उत्थितायाः पदे पदे दुर्निमिते गलन्ती

ardhācitā satvaram utthitāyāḥ pade pade durnimite galantī

7.61.2

कस्याश्चिद् आसीद् रशना तदानीम् अङ्गुष्ठमूलार्पितसूत्रशेषा

kasyāścid āsīd raśanā tadānīm aṅguṣṭhamūlārpitasūtraśeṣā

7.62

तासां मुखैर् आसवगन्धगर्भैर् व्याप्तान्तराः सान्द्रकुतूहलानाम्

tāsāṃ mukhair āsavagandhagarbhair vyāptāntarāḥ sāndrakutūhalānām

7.62.2

विलोलनेत्रभ्रमरैर् गवाक्षाः सहस्रपत्राभरणा इवासन्

vilolanetrabhramarair gavākṣāḥ sahasrapatrābharaṇā ivāsan

7.63

तावत् पताकाकुलम् इन्दुमौलिर् उत्तोरणं राजपथं प्रपेदे

tāvat patākākulam indumaulir uttoraṇaṃ rājapathaṃ prapede

7.63.2

प्रासादशृङ्गाणि दिवापि कुर्वञ् ज्योत्स्नाभिषेकद्विगुणद्युतीनि

prāsādaśṛṅgāṇi divāpi kurvañ jyotsnābhiṣekadviguṇadyutīni

7.64

तम् एकदृश्यं नयनैः पिबन्त्यो नार्यो न जग्मुर् विषयान्तराणि

tam ekadṛśyaṃ nayanaiḥ pibantyo nāryo na jagmur viṣayāntarāṇi

Kumārasaṃbhava