7.34.2

शरीरमात्रं विकृतिं प्रपेदे तथैव तस्थुः फणरत्नशोभाः

śarīramātraṃ vikṛtiṃ prapede tathaiva tasthuḥ phaṇaratnaśobhāḥ

7.35

दिवापि निष्ठ्यूतमरीचिभासा बाल्याद् अनाविष्कृतलाञ्छनेन

divāpi niṣṭhyūtamarīcibhāsā bālyād anāviṣkṛtalāñchanena

7.35.2

चन्द्रेण नित्यं प्रतिभिन्नमौलेश् चूडामणेः किं ग्रहणं हरस्य

candreṇa nityaṃ pratibhinnamauleś cūḍāmaṇeḥ kiṃ grahaṇaṃ harasya

7.36

इत्य् अद्भुतैकप्रभवः प्रभावात् प्रसिद्धनेपथ्यविधेर् विधाता

ity adbhutaikaprabhavaḥ prabhāvāt prasiddhanepathyavidher vidhātā

7.36.2

आत्मानम् आसन्नगणोपनीते खड्गे निषक्तप्रतिमं ददर्श

ātmānam āsannagaṇopanīte khaḍge niṣaktapratimaṃ dadarśa

7.37

स गोपतिं नन्दिभुजावलम्बी शार्दूलचर्मान्तरितोरुपृष्ठम्

sa gopatiṃ nandibhujāvalambī śārdūlacarmāntaritorupṛṣṭham

7.37.2

तद्भक्तिसंक्षिप्तबृहत्प्रमाणम् आरुह्य कैलासम् इव प्रतस्थे

tadbhaktisaṃkṣiptabṛhatpramāṇam āruhya kailāsam iva pratasthe

7.38

तं मातरो देवम् अनुव्रजन्त्यः स्ववाहनक्षोभचलावतंसाः

taṃ mātaro devam anuvrajantyaḥ svavāhanakṣobhacalāvataṃsāḥ

7.38.2

मुखैः प्रभामण्डलरेणुगौरैः पद्माकरं चक्रुर् इवान्तरीक्षम्

mukhaiḥ prabhāmaṇḍalareṇugauraiḥ padmākaraṃ cakrur ivāntarīkṣam

7.39

तासां च पश्चात् कनकप्रभाणां काली कपालाभरणा चकाशे

tāsāṃ ca paścāt kanakaprabhāṇāṃ kālī kapālābharaṇā cakāśe

7.39.2

बलाकिनी नीलपयोदराजी दूरं पुरःक्षिप्तशतह्रदेव

balākinī nīlapayodarājī dūraṃ puraḥkṣiptaśatahradeva

7.40

ततो गणैः शूलभृतः पुरोगैर् उदीरितो मङ्गलतूर्यघोषः

tato gaṇaiḥ śūlabhṛtaḥ purogair udīrito maṅgalatūryaghoṣaḥ

7.40.2

विमानशृङ्गाण्य् अवगाहमानः शशंस सेवावसरं सुरेभ्यः

vimānaśṛṅgāṇy avagāhamānaḥ śaśaṃsa sevāvasaraṃ surebhyaḥ

7.41

उपाददे तस्य सहस्ररश्मिस् त्वष्ट्रा नवं निर्मितम् आतपत्रम्

upādade tasya sahasraraśmis tvaṣṭrā navaṃ nirmitam ātapatram

7.41.2

स तद्दुकूलाद् अविदूरमौलिर् बभौ पतद्गङ्ग इवोत्तमाङ्गे

sa taddukūlād avidūramaulir babhau patadgaṅga ivottamāṅge

7.42

मूर्ते च गङ्गायमुने तदानीं सचामरे देवम् असेविषाताम्

mūrte ca gaṅgāyamune tadānīṃ sacāmare devam aseviṣātām

7.42.2

समुद्रगारूपविपर्यये ऽपि सहंसपाते इव लक्ष्यमाणे

samudragārūpaviparyaye 'pi sahaṃsapāte iva lakṣyamāṇe

7.43

तम् अन्वगच्छत् प्रथमो विधाता श्रीवत्सलक्ष्मा पुरुषश् च साक्षात्

tam anvagacchat prathamo vidhātā śrīvatsalakṣmā puruṣaś ca sākṣāt

7.43.2

जयेति वाचा महिमानम् अस्य संवर्धयन्त्या हविषेव वह्निम्

jayeti vācā mahimānam asya saṃvardhayantyā haviṣeva vahnim

7.44

एकैव मूर्तिर् बिभिदे त्रिधा सा सामान्यम् एषां प्रथमावरत्वम्

ekaiva mūrtir bibhide tridhā sā sāmānyam eṣāṃ prathamāvaratvam

Kumārasaṃbhava