7.4.2

आसन्नपाणिग्रहणेति पित्रोर् उमा विशेषोच्छ्वसितं बभूव

āsannapāṇigrahaṇeti pitror umā viśeṣocchvasitaṃ babhūva

7.5

अङ्काद् ययाव् अङ्कम् उदीरिताशीः सा मण्डनान् मण्डनम् अन्वभुङ्क्त

aṅkād yayāv aṅkam udīritāśīḥ sā maṇḍanān maṇḍanam anvabhuṅkta

7.5.2

संबन्धिभिन्नो ऽपि गिरेः कुलस्य स्नेहस् तदेकायतनं जगाम

saṃbandhibhinno 'pi gireḥ kulasya snehas tadekāyatanaṃ jagāma

7.6

मैत्रे मुहूर्ते शशलाञ्छनेन योगं गतासूत्तरफल्गुनीषु

maitre muhūrte śaśalāñchanena yogaṃ gatāsūttaraphalgunīṣu

7.6.2

तस्याः शरीरे प्रतिकर्म चक्रुर् बन्धुस्त्रियो याः पतिपुत्रवत्यः

tasyāḥ śarīre pratikarma cakrur bandhustriyo yāḥ patiputravatyaḥ

7.7

सा गौरसिद्धार्थनिवेशवद्भिर् दूर्वाप्रवालैः प्रतिभिन्नरागम्

sā gaurasiddhārthaniveśavadbhir dūrvāpravālaiḥ pratibhinnarāgam

7.7.2

निर्नाभिकौशेयम् उपात्तबाणम् अभ्यङ्गनेपथ्यम् अलंचकार

nirnābhikauśeyam upāttabāṇam abhyaṅganepathyam alaṃcakāra

7.8

बभौ च संपर्कम् उपेत्य बाला नवेन दीक्षाविधिसायकेन

babhau ca saṃparkam upetya bālā navena dīkṣāvidhisāyakena

7.8.2

करेण भानोर् बहुलावसाने संधुक्ष्यमाणेव शशाङ्कलेखा

kareṇa bhānor bahulāvasāne saṃdhukṣyamāṇeva śaśāṅkalekhā

7.9

तां लोध्रकल्केन हृताङ्गतैलाम् आश्यानकालेयकृताङ्गरागाम्

tāṃ lodhrakalkena hṛtāṅgatailām āśyānakāleyakṛtāṅgarāgām

7.9.2

वासो वसानाम् अभिषेकयोग्यं नार्यश् चतुष्काभिमुखं व्यनैषुः

vāso vasānām abhiṣekayogyaṃ nāryaś catuṣkābhimukhaṃ vyanaiṣuḥ

7.10

विन्यस्तवैदूर्यशिलातले ऽस्मिन्न् अविद्धमुक्ताफलभक्तिचित्रे

vinyastavaidūryaśilātale 'sminn aviddhamuktāphalabhakticitre

7.10.2

आवर्जिताष्टापदकुम्भतोयाः सतूर्यम् एनां स्नपयांबभूवुः

āvarjitāṣṭāpadakumbhatoyāḥ satūryam enāṃ snapayāṃbabhūvuḥ

7.11

सा मङ्गलस्नानविशुद्धगात्री गृहीतपत्युद्गमनीयवस्त्रा

sā maṅgalasnānaviśuddhagātrī gṛhītapatyudgamanīyavastrā

7.11.2

निर्वृत्तपर्जन्यजलाभिषेका प्रफुल्लकाशा वसुधेव रेजे

nirvṛttaparjanyajalābhiṣekā praphullakāśā vasudheva reje

7.12

तस्मात् प्रदेशाच् च वितानवन्तं युक्तं मणिस्तम्भचतुष्टयेन

tasmāt pradeśāc ca vitānavantaṃ yuktaṃ maṇistambhacatuṣṭayena

7.12.2

पतिव्रताभिः परिगृह्य निन्ये क्ﾱप्तासनं कौतुकवेदिमध्यम्

pativratābhiḥ parigṛhya ninye kﾱptāsanaṃ kautukavedimadhyam

7.13

तां प्राङ्मुखीं तत्र निवेश्य तन्वीं क्षणं व्यलम्बन्त पुरो निषण्णाः

tāṃ prāṅmukhīṃ tatra niveśya tanvīṃ kṣaṇaṃ vyalambanta puro niṣaṇṇāḥ

7.13.2

भूतार्थशोभाह्रियमाणनेत्राः प्रसाधने संनिहिते ऽपि नार्यः

bhūtārthaśobhāhriyamāṇanetrāḥ prasādhane saṃnihite 'pi nāryaḥ

7.14

धूपोष्मणा त्याजितम् आर्द्रभावं केशान्तम् अन्तःकुसुमं तदीयम्

dhūpoṣmaṇā tyājitam ārdrabhāvaṃ keśāntam antaḥkusumaṃ tadīyam

Kumārasaṃbhava