6.89.2

इयं नमति वः सर्वांस् त्रिलोचनवधूर् इति

iyaṃ namati vaḥ sarvāṃs trilocanavadhūr iti

6.90

ईप्सितार्थक्रियोदारं ते ऽभिनन्द्य गिरेर् वचः

īpsitārthakriyodāraṃ te 'bhinandya girer vacaḥ

6.90.2

आशीर्भिर् एधयामासुः पुरःपाकाभिर् अम्बिकाम्

āśīrbhir edhayāmāsuḥ puraḥpākābhir ambikām

6.91

तां प्रणामादरस्रस्तजाम्बूनदवतंसकाम्

tāṃ praṇāmādarasrastajāmbūnadavataṃsakām

6.91.2

अङ्कम् आरोपयामास लज्जमानाम् अरुन्धती

aṅkam āropayāmāsa lajjamānām arundhatī

6.92

तन्मातरं चाश्रुमुखीं दुहितृस्नेहविक्लवाम्

tanmātaraṃ cāśrumukhīṃ duhitṛsnehaviklavām

6.92.2

वरस्यानन्यपूर्वस्य विशोकाम् अकरोद् गुणैः

varasyānanyapūrvasya viśokām akarod guṇaiḥ

6.93

वैवाहिकीं तिथिं पृष्टास् तत्क्षणं हरबन्धुना

vaivāhikīṃ tithiṃ pṛṣṭās tatkṣaṇaṃ harabandhunā

6.93.2

ते त्र्यहाद् ऊर्ध्वम् आख्याय चेलुश् चीरपरिग्रहाः

te tryahād ūrdhvam ākhyāya celuś cīraparigrahāḥ

6.94

ते हिमालयम् आमन्त्र्य पुनः प्रेक्ष्य च शूलिनम्

te himālayam āmantrya punaḥ prekṣya ca śūlinam

6.94.2

सिद्धं चास्मै निवेद्यार्थं तद्विसृष्टाः खम् उद्ययुः

siddhaṃ cāsmai nivedyārthaṃ tadvisṛṣṭāḥ kham udyayuḥ

6.95

पशुपतिर् अपि तान्य् अहानि कृच्छ्राद् अगमयद् अद्रिसुतासमागमोत्कः

paśupatir api tāny ahāni kṛcchrād agamayad adrisutāsamāgamotkaḥ

6.95.2

कम् अपरम् अवशं न विप्रकुर्युर् विभुम् अपि तं यद् अमी स्पृशन्ति भावाः

kam aparam avaśaṃ na viprakuryur vibhum api taṃ yad amī spṛśanti bhāvāḥ

7.1

अथौषधीनाम् अधिपस्य वृद्धौ तिथौ च जामित्रगुणान्वितायाम्

athauṣadhīnām adhipasya vṛddhau tithau ca jāmitraguṇānvitāyām

7.1.2

समेतबन्धुर् हिमवान् सुताया विवाहदीक्षाविधिम् अन्वतिष्ठत्

sametabandhur himavān sutāyā vivāhadīkṣāvidhim anvatiṣṭhat

7.2

वैवाहिकैः कौतुकसंविधानैर् गृहे गृहे व्यग्रपुरंध्रिवर्गम्

vaivāhikaiḥ kautukasaṃvidhānair gṛhe gṛhe vyagrapuraṃdhrivargam

7.2.2

आसीत् पुरं सानुमतो ऽनुरागाद् अन्तःपुरं चैककुलोपमेयम्

āsīt puraṃ sānumato 'nurāgād antaḥpuraṃ caikakulopameyam

7.3

संतानकाकीर्णमहापथं तच् चीनांशुकैः कल्पितकेतुमालम्

saṃtānakākīrṇamahāpathaṃ tac cīnāṃśukaiḥ kalpitaketumālam

7.3.2

भासा ज्वलत् काञ्चनतोरणानां स्थानान्तरस्वर्ग इवाबभासे

bhāsā jvalat kāñcanatoraṇānāṃ sthānāntarasvarga ivābabhāse

7.4

एकैव सत्याम् अपि पुत्रपङ्क्तौ चिरस्य दृष्टेव मृतोत्थितेव

ekaiva satyām api putrapaṅktau cirasya dṛṣṭeva mṛtotthiteva

Kumārasaṃbhava