6.69.2

पुनन्ति लोकान् पुण्यत्वात् कीर्तयः सरितश् च ते

punanti lokān puṇyatvāt kīrtayaḥ saritaś ca te

6.70

यथैव श्लाघ्यते गङ्गा पादेन परमेष्ठिनः

yathaiva ślāghyate gaṅgā pādena parameṣṭhinaḥ

6.70.2

प्रभवेण द्वितीयेन तथैवोच्छिरसा त्वया

prabhaveṇa dvitīyena tathaivocchirasā tvayā

6.71

तिर्यग् ऊर्ध्वम् अधस्ताच् च व्यापको महिमा हरेः

tiryag ūrdhvam adhastāc ca vyāpako mahimā hareḥ

6.71.2

त्रिविक्रमोद्यतस्यासीत् स च स्वाभाविकस् तव

trivikramodyatasyāsīt sa ca svābhāvikas tava

6.72

यज्ञभागभुजां मध्ये पदम् आतस्थुषा त्वया

yajñabhāgabhujāṃ madhye padam ātasthuṣā tvayā

6.72.2

उच्चैर् हिरण्मयं शृङ्गं सुमेरोर् वितथीकृतम्

uccair hiraṇmayaṃ śṛṅgaṃ sumeror vitathīkṛtam

6.73

काठिन्यं स्थावरे काये भवता सर्वम् अर्पितम्

kāṭhinyaṃ sthāvare kāye bhavatā sarvam arpitam

6.73.2

इदं तु भक्तिनम्रं ते सताम् आराधनं वपुः

idaṃ tu bhaktinamraṃ te satām ārādhanaṃ vapuḥ

6.74

तद् आगमनकार्यं नः शृणु कार्यं तवैव तत्

tad āgamanakāryaṃ naḥ śṛṇu kāryaṃ tavaiva tat

6.74.2

श्रेयसाम् उपदेशात् तु वयम् अत्रांशभागिनः

śreyasām upadeśāt tu vayam atrāṃśabhāginaḥ

6.75

अणिमादिगुणोपेतम् अस्पृष्टपुरुषान्तरम्

aṇimādiguṇopetam aspṛṣṭapuruṣāntaram

6.75.2

शब्दम् ईश्वर इत्य् उच्चैः सार्धचन्द्रं बिभर्ति यः

śabdam īśvara ity uccaiḥ sārdhacandraṃ bibharti yaḥ

6.76

कल्पितान्योन्यसामर्थ्यैः पृथिव्यादिभिर् आत्मनि

kalpitānyonyasāmarthyaiḥ pṛthivyādibhir ātmani

6.76.2

येनेदं ध्रियते विश्वं धुर्यैर् यानम् इवाध्वनि

yenedaṃ dhriyate viśvaṃ dhuryair yānam ivādhvani

6.77

योगिनो यं विचिन्वन्ति क्षेत्राभ्यन्तरवर्तिनम्

yogino yaṃ vicinvanti kṣetrābhyantaravartinam

6.77.2

अनावृत्तिभयं यस्य पदम् आहुर् मनीषिणः

anāvṛttibhayaṃ yasya padam āhur manīṣiṇaḥ

6.78

स ते दुहितरं साक्षात् साक्षी विश्वस्य कर्मणः

sa te duhitaraṃ sākṣāt sākṣī viśvasya karmaṇaḥ

6.78.2

वृणुते वरदः शंभुर् अस्मत्संक्रामितैः पदैः

vṛṇute varadaḥ śaṃbhur asmatsaṃkrāmitaiḥ padaiḥ

6.79

तम् अर्थम् इव भारत्या सुतया योक्तुम् अर्हसि

tam artham iva bhāratyā sutayā yoktum arhasi

Kumārasaṃbhava