1.21

अथावमानेन पितुः प्रयुक्ता दक्षस्य कन्या भवपूर्वपत्नी

athāvamānena pituḥ prayuktā dakṣasya kanyā bhavapūrvapatnī

1.21.2

सती सती योगविसृष्टदेहा तां जन्मने शैलवधूं प्रपेदे

satī satī yogavisṛṣṭadehā tāṃ janmane śailavadhūṃ prapede

1.22

सा भूधराणाम् अधिपेन तस्यां समाधिमत्याम् उदपादि भव्या

sā bhūdharāṇām adhipena tasyāṃ samādhimatyām udapādi bhavyā

1.22.2

सम्यक्प्रयोगाद् अपरिक्षतायां नीताव् इवोत्साहगुणेन संपत्

samyakprayogād aparikṣatāyāṃ nītāv ivotsāhaguṇena saṃpat

1.23

प्रसन्नदिक् पांसुविविक्तवातं शङ्खस्वनानन्तरपुष्पवृष्टि

prasannadik pāṃsuviviktavātaṃ śaṅkhasvanānantarapuṣpavṛṣṭi

1.23.2

शरीरिणां स्थावरजङ्गमानां सुखाय तज्जन्मदिनं बभूव

śarīriṇāṃ sthāvarajaṅgamānāṃ sukhāya tajjanmadinaṃ babhūva

1.24

तया दुहित्रा सुतरां सवित्री स्फुरत्प्रभामण्डलया

tayā duhitrā sutarāṃ savitrī sphuratprabhāmaṇḍalayā

1.24.2

विदूरभूमिर् नवमेघशब्दाद् उद्भिन्नया रत्नशलाकयेव

vidūrabhūmir navameghaśabdād udbhinnayā ratnaśalākayeva

1.25

दिने दिने सा परिवर्धमाना लब्धोदया चान्द्रमसीव लेखा

dine dine sā parivardhamānā labdhodayā cāndramasīva lekhā

1.25.2

पुपोष लावण्यमयान् विशेषाञ् ज्योत्स्नान्तराणीव कलान्तराणि

pupoṣa lāvaṇyamayān viśeṣāñ jyotsnāntarāṇīva kalāntarāṇi

1.26

तां पार्वतीत्य् आभिजनेन नाम्ना बन्धुप्रियां बन्धुजनो जुहाव

tāṃ pārvatīty ābhijanena nāmnā bandhupriyāṃ bandhujano juhāva

1.26.2

उ मेति मात्रा तपसो निषिद्धा पश्चाद् उमाख्यां सुमुखी

meti mātrā tapaso niṣiddhā paścād umākhyāṃ sumukhī jagāma

1.27

महीभृतः पुत्रवतो ऽपि दृष्टिस् तस्मिन्न् अपत्ये न जगाम तृप्तिम्

mahībhṛtaḥ putravato 'pi dṛṣṭis tasminn apatye na jagāma tṛptim

1.27.2

अनन्तपुष्पस्य मधोर् हि चूते द्विरेफमाला सविशेषसङ्गा

anantapuṣpasya madhor hi cūte dvirephamālā saviśeṣasaṅgā

1.28

प्रभामहत्या शिखयेव दीपस् त्रिमार्गयेव त्रिदिवस्य मार्गः

prabhāmahatyā śikhayeva dīpas trimārgayeva tridivasya mārgaḥ

1.28.2

संस्कारवत्येव गिरा मनीषी तया स पूतश् च विभूषितश् च

saṃskāravatyeva girā manīṣī tayā sa pūtaś ca vibhūṣitaś ca

1.29

मन्दाकिनीसैकतवेदिकाभिः सा कन्दुकैः कृत्रिमपुत्रकैश् च

mandākinīsaikatavedikābhiḥ sā kandukaiḥ kṛtrimaputrakaiś ca

1.29.2

रेमे मुहुर् मध्यगता सखीनां क्रीडारसं निर्विशतीव बाल्ये

reme muhur madhyagatā sakhīnāṃ krīḍārasaṃ nirviśatīva bālye

1.30

तां हंसमालाः शरदीव गङ्गां महौषधिं नक्तम् इवात्मभासः

tāṃ haṃsamālāḥ śaradīva gaṅgāṃ mahauṣadhiṃ naktam ivātmabhāsaḥ

1.30.2

स्थिरोपदेशाम् उपदेशकाले प्रपेदिरे प्राक्तनजन्मविद्याः

sthiropadeśām upadeśakāle prapedire prāktanajanmavidyāḥ

Kumārasaṃbhava