3.17

गुरोर् नियोगाच् च नगेन्द्रकन्या स्थाणुं तपस्यन्तम् अधित्यकायाम्

guror niyogāc ca nagendrakanyā sthāṇuṃ tapasyantam adhityakāyām

3.17.2

अन्वास्त इत्य् अप्सरसां मुखेभ्यः श्रुतं मया मत्प्रणिधिः स वर्गः

anvāsta ity apsarasāṃ mukhebhyaḥ śrutaṃ mayā matpraṇidhiḥ sa vargaḥ

3.18

तद् गच्छ सिद्ध्यै कुरु देवकार्यम् अर्थो ऽयम् अर्थान्तरभाव्य एव

tad gaccha siddhyai kuru devakāryam artho 'yam arthāntarabhāvya eva

3.18.2

अपेक्षते प्रत्ययम् उत्तमं त्वां बीजाङ्कुरः प्राग् उदयाद् इवाम्भः

apekṣate pratyayam uttamaṃ tvāṃ bījāṅkuraḥ prāg udayād ivāmbhaḥ

3.19

तस्मिन् सुराणां विजयाभ्युपाये तवैव नामास्त्रगतिः कृती त्वम्

tasmin surāṇāṃ vijayābhyupāye tavaiva nāmāstragatiḥ kṛtī tvam

3.19.2

अप्य् अप्रसिद्धं यशसे हि पुंसाम् अनन्यसाधारणम् एव कर्म

apy aprasiddhaṃ yaśase hi puṃsām ananyasādhāraṇam eva karma

3.20

सुराः समभ्यर्थयितार एते कार्यं त्रयाणाम् अपि विष्टपानाम्

surāḥ samabhyarthayitāra ete kāryaṃ trayāṇām api viṣṭapānām

3.20.2

चापेन ते कर्म न चातिहिंस्रम् अहो बतासि स्पृहणीयवीर्यः

cāpena te karma na cātihiṃsram aho batāsi spṛhaṇīyavīryaḥ

3.21

मधुश् च ते मन्मथ साहचर्याद् असावनुक्तो ऽपि सहाय एव

madhuś ca te manmatha sāhacaryād asāvanukto 'pi sahāya eva

3.21.2

समीरणो नोदयिता भवेति व्यादिश्यते केन हुताशनस्य

samīraṇo nodayitā bhaveti vyādiśyate kena hutāśanasya

3.22

तथेति शेषाम् इव भर्तुर् आज्ञाम् आदाय मूर्ध्ना मदनः प्रतस्थे

tatheti śeṣām iva bhartur ājñām ādāya mūrdhnā madanaḥ pratasthe

3.22.2

ऐरावतास्फालनकर्कशेन हस्तेन पस्पर्श तदङ्गम् इन्द्रः

airāvatāsphālanakarkaśena hastena pasparśa tadaṅgam indraḥ

3.23

स माधवेनाभिमतेन सख्या रत्या च साशङ्कम् अनुप्रयातः

sa mādhavenābhimatena sakhyā ratyā ca sāśaṅkam anuprayātaḥ

3.23.2

अङ्गव्ययप्रार्थितकार्यसिद्धिः स्थाण्वाश्रमं हैमवतं जगाम

aṅgavyayaprārthitakāryasiddhiḥ sthāṇvāśramaṃ haimavataṃ jagāma

3.24

तस्मिन् वने संयमिनां मुनीनां तपःसमाधेः प्रतिकूलवर्ती

tasmin vane saṃyamināṃ munīnāṃ tapaḥsamādheḥ pratikūlavartī

3.24.2

संकल्पयोनेर् अभिमानभूतम् आत्मानम् आधाय मधुर् जजृम्भे

saṃkalpayoner abhimānabhūtam ātmānam ādhāya madhur jajṛmbhe

3.25

कुबेरगुप्तां दिशम् उष्णरश्मौ गन्तुं प्रवृत्ते समयं विलङ्घ्य

kuberaguptāṃ diśam uṣṇaraśmau gantuṃ pravṛtte samayaṃ vilaṅghya

3.25.2

दिग् दक्षिणा गन्धवहं मुखेन व्यलीकनिःश्वासम् इवोत्ससर्ज

dig dakṣiṇā gandhavahaṃ mukhena vyalīkaniḥśvāsam ivotsasarja

3.26

असूत सद्यः कुसुमान्य् अशोकः स्कन्धात् प्रभृत्य् एव सपल्लवानि

asūta sadyaḥ kusumāny aśokaḥ skandhāt prabhṛty eva sapallavāni

3.26.2

पादेन नापैक्षत सुन्दरीणां संपर्कम् आसिञ्जितनूपुरेण

pādena nāpaikṣata sundarīṇāṃ saṃparkam āsiñjitanūpureṇa

Kumārasaṃbhava