3.7

काम् एकपत्नीव्रतदुःखशीलां लोलं मनश् चारुतया प्रविष्टाम्

kām ekapatnīvrataduḥkhaśīlāṃ lolaṃ manaś cārutayā praviṣṭām

3.7.2

नितम्बिनीम् इच्छसि मुक्तलज्जां कण्ठे स्वयंग्राहनिषक्तबाहुम्

nitambinīm icchasi muktalajjāṃ kaṇṭhe svayaṃgrāhaniṣaktabāhum

3.8

कयासि कामिन् सुरतापराधात् पादानतः कोपनयावधूतः

kayāsi kāmin suratāparādhāt pādānataḥ kopanayāvadhūtaḥ

3.8.2

यस्याः करिष्यामि दृढानुतापं प्रवालशय्याशरणं शरीरम्

yasyāḥ kariṣyāmi dṛḍhānutāpaṃ pravālaśayyāśaraṇaṃ śarīram

3.9

प्रसीद विश्राम्यतु वीर वज्रं शरैर् मदीयैः कतमः सुरारिः

prasīda viśrāmyatu vīra vajraṃ śarair madīyaiḥ katamaḥ surāriḥ

3.9.2

बिभेतु मोघीकृतबाहुवीर्यः स्त्रीभ्यो ऽपि कोपस्फुरिताधराभ्यः

bibhetu moghīkṛtabāhuvīryaḥ strībhyo 'pi kopasphuritādharābhyaḥ

3.10

तव प्रसादात् कुसुमायुधो ऽपि सहायम् एकं मधुम् एव लब्ध्वा

tava prasādāt kusumāyudho 'pi sahāyam ekaṃ madhum eva labdhvā

3.10.2

कुर्यां हरस्यापि पिनाकपाणेर् धैर्यच्युतिं के मम धन्विनो ऽन्ये

kuryāṃ harasyāpi pinākapāṇer dhairyacyutiṃ ke mama dhanvino 'nye

3.11

अथोरुदेशाद् अवतार्य पादम् आक्रान्तिसंभावितपादपीठम्

athorudeśād avatārya pādam ākrāntisaṃbhāvitapādapīṭham

3.11.2

संकल्पितार्थे विवृतात्मशक्तिम् आखण्डलः कामम् इदं बभाषे

saṃkalpitārthe vivṛtātmaśaktim ākhaṇḍalaḥ kāmam idaṃ babhāṣe

3.12

सर्वं सखे त्वय्य् उपपन्नम् एतद् उभे ममास्त्रे कुलिशं भवांश् च

sarvaṃ sakhe tvayy upapannam etad ubhe mamāstre kuliśaṃ bhavāṃś ca

3.12.2

वज्रं तपोवीर्यमहत्सु कुण्ठं त्वं सर्वतोगामि च साधकं च

vajraṃ tapovīryamahatsu kuṇṭhaṃ tvaṃ sarvatogāmi ca sādhakaṃ ca

3.13

अवैमि ते सारम् अतः खलु त्वां कार्ये गुरुण्य् आत्मसमं नियोक्ष्ये

avaimi te sāram ataḥ khalu tvāṃ kārye guruṇy ātmasamaṃ niyokṣye

3.13.2

व्यादिश्यते भूधरताम् अवेक्ष्य कृष्णेन देहोद्वहनाय शेषः

vyādiśyate bhūdharatām avekṣya kṛṣṇena dehodvahanāya śeṣaḥ

3.14

आशंसता बाणगतिं वृषाङ्के कार्यं त्वया नः प्रतिपन्नकल्पम्

āśaṃsatā bāṇagatiṃ vṛṣāṅke kāryaṃ tvayā naḥ pratipannakalpam

3.14.2

निबोध यज्ञांशभुजाम् इदानीम् उच्चैर्द्विषाम् ईप्सितम् एतद् एव

nibodha yajñāṃśabhujām idānīm uccairdviṣām īpsitam etad eva

3.15

अमी हि वीर्यप्रभवं भवस्य जयाय सेनान्यम् उशन्ति

amī hi vīryaprabhavaṃ bhavasya jayāya senānyam uśanti

3.15.2

स च त्वदेकेषुनिपातसाध्यो ब्रह्माङ्गभूर् ब्रह्मणि योजितात्मा

sa ca tvadekeṣunipātasādhyo brahmāṅgabhūr brahmaṇi yojitātmā

3.16

तस्मै हिमाद्रेः प्रयतां तनूजां यतात्मने रोचयितुं यतस्व

tasmai himādreḥ prayatāṃ tanūjāṃ yatātmane rocayituṃ yatasva

3.16.2

योषित्सु तद्वीर्यनिषेकभूमिः सैव क्षमेत्य् आत्मभुवोपदिष्टम्

yoṣitsu tadvīryaniṣekabhūmiḥ saiva kṣamety ātmabhuvopadiṣṭam

Kumārasaṃbhava