2.51

तद् इच्छामो विभो सृष्टं सेनान्यं तस्य

tad icchāmo vibho sṛṣṭaṃ senānyaṃ tasya

2.51.2

कर्मबन्धच्छिदं धर्मं भवस्येव मुमुक्षवः

karmabandhacchidaṃ dharmaṃ bhavasyeva mumukṣavaḥ

2.52

गोप्तारं सुरसैन्यानां यं पुरस्कृत्य गोत्रभित्

goptāraṃ surasainyānāṃ yaṃ puraskṛtya gotrabhit

2.52.2

प्रत्यानेष्यति शत्रुभ्यो बन्दीम् इव जयश्रियम्

pratyāneṣyati śatrubhyo bandīm iva jayaśriyam

2.53

वचस्य् अवसिते तस्मिन् ससर्ज गिरम् आत्मभूः

vacasy avasite tasmin sasarja giram ātmabhūḥ

2.53.2

गर्जितानन्तरां वृष्टिं सौभाग्येन जिगाय या

garjitānantarāṃ vṛṣṭiṃ saubhāgyena jigāya yā

2.54

सम्पत्स्यते वः कामो यं कालः कश्चित् प्रतीक्ष्यताम्

sampatsyate vaḥ kāmo yaṃ kālaḥ kaścit pratīkṣyatām

2.54.2

न त्व् अस्य सिद्धौ यास्यामि सर्गव्यापारम् आत्मना

na tv asya siddhau yāsyāmi sargavyāpāram ātmanā

2.55

इतः स दैत्यः प्राप्तश्रीर् नेत एवार्हति क्षयम्

itaḥ sa daityaḥ prāptaśrīr neta evārhati kṣayam

2.55.2

विषवृक्षो ऽपि संवर्ध्य स्वयं छेत्तुम् असांप्रतम्

viṣavṛkṣo 'pi saṃvardhya svayaṃ chettum asāṃpratam

2.56

वृतं तेनेदम् एव प्राङ् मया चास्मै प्रतिश्रुतम्

vṛtaṃ tenedam eva prāṅ mayā cāsmai pratiśrutam

2.56.2

वरेण शमितं लोकान् अलं दग्धुं हि तत्तपः

vareṇa śamitaṃ lokān alaṃ dagdhuṃ hi tattapaḥ

2.57

संयुगे सांयुगीनं तम् उद्यतं प्रसहेत कः

saṃyuge sāṃyugīnaṃ tam udyataṃ prasaheta kaḥ

2.57.2

अंशाद् ऋते निषिक्तस्य नीललोहितरेतसः

aṃśād ṛte niṣiktasya nīlalohitaretasaḥ

2.58

स हि देवः परं ज्योतिस् तमःपारे व्यवस्थितम्

sa hi devaḥ paraṃ jyotis tamaḥpāre vyavasthitam

2.58.2

परिच्छिन्नप्रभावर्द्धिर् न मया न च विष्णुना

paricchinnaprabhāvarddhir na mayā na ca viṣṇunā

2.59

उमारूपेण ते यूयं संयमस्तिमितं मनः

umārūpeṇa te yūyaṃ saṃyamastimitaṃ manaḥ

2.59.2

शंभोर् यतध्वम् आक्रष्टुम् अयस्कान्तेन लोहवत्

śaṃbhor yatadhvam ākraṣṭum ayaskāntena lohavat

2.60

उभे एव क्षमे वोढुम् उभयोर् वीर्यम् आहितम्

ubhe eva kṣame voḍhum ubhayor vīryam āhitam

2.60.2

सा वा शंभोस् तदीया वा मूर्तिर् जलमयी मम

sā vā śaṃbhos tadīyā vā mūrtir jalamayī mama

Kumārasaṃbhava