1.1

अस्त्य् उत्तरस्यां दिशि देवतात्मा हिमालयो नाम नगाधिराजः

asty uttarasyāṃ diśi devatātmā himālayo nāma nagādhirājaḥ

1.1.2

पूर्वापरौ तोयनिधी विगाह्य स्थितः पृथिव्या इव मानदण्डः

pūrvāparau toyanidhī vigāhya sthitaḥ pṛthivyā iva mānadaṇḍaḥ

1.2

यं सर्वशैलाः परिकल्प्य वत्सं मेरौ स्थिते दोग्धरि दोहदक्षे

yaṃ sarvaśailāḥ parikalpya vatsaṃ merau sthite dogdhari dohadakṣe

1.2.2

भास्वन्ति रत्नानि महौषधीश् च पृथूपदिष्टां दुदुहुर् धरित्रीम्

bhāsvanti ratnāni mahauṣadhīś ca pṛthūpadiṣṭāṃ duduhur dharitrīm

1.3

अनन्तरत्नप्रभवस्य यस्य हिमं न सौभाग्यविलोपि जातम्

anantaratnaprabhavasya yasya himaṃ na saubhāgyavilopi jātam

1.3.2

एको हि दोषो गुणसंनिपाते निमज्जतीन्दोः किरणेष्व् इवाङ्कः

eko hi doṣo guṇasaṃnipāte nimajjatīndoḥ kiraṇeṣv ivāṅkaḥ

1.4

यश् चाप्सरोविभ्रममण्डनानां सम्पादयित्रीं शिखरैर् बिभर्ति

yaś cāpsarovibhramamaṇḍanānāṃ sampādayitrīṃ śikharair bibharti

1.4.2

बलाहकच्छेदविभक्तरागाम् अकालसंध्याम् इव धातुमत्ताम्

balāhakacchedavibhaktarāgām akālasaṃdhyām iva dhātumattām

1.5

आमेखलं संचरतां घनानां छायाम् अधःसानुगतां निषेव्य

āmekhalaṃ saṃcaratāṃ ghanānāṃ chāyām adhaḥsānugatāṃ niṣevya

1.5.2

उद्वेजिता वृष्टिभिर् आश्रयन्ते शृङ्गाणि यस्यातपवन्ति सिद्धाः

udvejitā vṛṣṭibhir āśrayante śṛṅgāṇi yasyātapavanti siddhāḥ

1.6

पदं तुषारस्रुतिधौतरक्तं यस्मिन्न् अदृष्ट्वापि हतद्विपानाम्

padaṃ tuṣārasrutidhautaraktaṃ yasminn adṛṣṭvāpi hatadvipānām

1.6.2

विदन्ति मार्गं नखरन्ध्रमुक्तैर् मुक्ताफलैः केसरिणां किराताः

vidanti mārgaṃ nakharandhramuktair muktāphalaiḥ kesariṇāṃ kirātāḥ

1.7

न्यस्ताक्षरा धातुरसेन यत्र भूर्जत्वचः कुञ्जरबिन्दुशोणाः

nyastākṣarā dhāturasena yatra bhūrjatvacaḥ kuñjarabinduśoṇāḥ

1.7.2

व्रजन्ति विद्याधरसुन्दरीणाम् अनङ्गलेखक्रिययोपयोगम्

vrajanti vidyādharasundarīṇām anaṅgalekhakriyayopayogam

1.8

यः पूरयन् कीचकरन्ध्रभागान् दरीमुखोत्थेन समीरणेन

yaḥ pūrayan kīcakarandhrabhāgān darīmukhotthena samīraṇena

1.8.2

उद्गास्यताम् इच्छति किंनराणां तानप्रदायित्वम् इवोपगन्तुम्

udgāsyatām icchati kiṃnarāṇāṃ tānapradāyitvam ivopagantum

1.9

कपोलकण्डूः करिभिर् विनेतुं विघट्टितानां सरलद्रुमाणाम्

kapolakaṇḍūḥ karibhir vinetuṃ vighaṭṭitānāṃ saraladrumāṇām

1.9.2

यत्र स्रुतक्षीरतया प्रसूतः सानूनि गन्धः सुरभीकरोति

yatra srutakṣīratayā prasūtaḥ sānūni gandhaḥ surabhīkaroti

1.10

वनेचराणां वनितासखानां दरीगृहोत्सङ्गनिषक्तभासः

vanecarāṇāṃ vanitāsakhānāṃ darīgṛhotsaṅganiṣaktabhāsaḥ

1.10.2

भवन्ति यत्रौषधयो रजन्याम् अतैलपूराः सुरतप्रदीपाः

bhavanti yatrauṣadhayo rajanyām atailapūrāḥ suratapradīpāḥ

Kumārasaṃbhava