3.56

अथाभिपश्यन्न् इव विद्विषः पुरः पुरोधसारोपितहेतिसंहतिः

athābhipaśyann iva vidviṣaḥ puraḥ purodhasāropitahetisaṃhatiḥ

3.56.2

बभार रम्यो ऽपि वपुः स भीषणं गतः क्रियां मन्त्र इवाभिचारिकीम्

babhāra ramyo 'pi vapuḥ sa bhīṣaṇaṃ gataḥ kriyāṃ mantra ivābhicārikīm

3.57

अविलङ्घ्यविकर्षणं परैः प्रथितज्यारवकर्म कार्मुकम्

avilaṅghyavikarṣaṇaṃ paraiḥ prathitajyāravakarma kārmukam

3.57.2

अगताव् अरिदृष्टिगोचरं शितनिस्त्रिंशयुजौ महेषुधी

agatāv aridṛṣṭigocaraṃ śitanistriṃśayujau maheṣudhī

3.58

यशसेव तिरोदधन् मुहुर् महसा गोत्रभिदायुधक्षतीः

yaśaseva tirodadhan muhur mahasā gotrabhidāyudhakṣatīḥ

3.58.2

कवचं च सरत्नम् उद्वहञ्ज्वलितज्योतिर् इवान्तरं दिवः

kavacaṃ ca saratnam udvahañjvalitajyotir ivāntaraṃ divaḥ

3.59

अकलाधिपभृत्यदर्शितं शिवम् उर्वीधरवर्त्म संप्रयान्

akalādhipabhṛtyadarśitaṃ śivam urvīdharavartma saṃprayān

3.59.2

हृदयानि समाविवेश स क्षणम् उद्बाष्पदृशां तपोभृताम्

hṛdayāni samāviveśa sa kṣaṇam udbāṣpadṛśāṃ tapobhṛtām

3.60

अनुजगुर् अथ दिव्यं दुन्दुभिध्वानम् आशाः सुरकुसुमनिपातैर् व्योम्नि लक्ष्मीर् वितेने

anujagur atha divyaṃ dundubhidhvānam āśāḥ surakusumanipātair vyomni lakṣmīr vitene

3.60.2

प्रियम् इव कथयिष्यन्न् आलिलिङ्ग स्फुरन्तीं भुवम् अनिभृतवेलावीचिबाहुः पयोधिः

priyam iva kathayiṣyann āliliṅga sphurantīṃ bhuvam anibhṛtavelāvīcibāhuḥ payodhiḥ

4.1

ततः स कूजत्कलहंसमेखलां सपाकसस्याहितपाण्डुतागुणाम्

tataḥ sa kūjatkalahaṃsamekhalāṃ sapākasasyāhitapāṇḍutāguṇām

4.1.2

उपाससादोपजनं जनप्रियः प्रियाम् इवासादितयौवनां भुवम्

upāsasādopajanaṃ janapriyaḥ priyām ivāsāditayauvanāṃ bhuvam

4.2

विनम्रशालिप्रसवौघशालिनीर् अपेतपङ्काः ससरोरुहाम्भसः

vinamraśāliprasavaughaśālinīr apetapaṅkāḥ sasaroruhāmbhasaḥ

4.2.2

ननन्द पश्यन्न् उपसीम स स्थलीर् उपायनीभूतशरद्गुणश्रियः

nananda paśyann upasīma sa sthalīr upāyanībhūtaśaradguṇaśriyaḥ

4.3

निरीक्ष्यमाणा इव विस्मयाकुलैः पयोभिर् उन्मीलितपद्मलोचनैः

nirīkṣyamāṇā iva vismayākulaiḥ payobhir unmīlitapadmalocanaiḥ

4.3.2

हृतप्रियादृष्टिविलासविभ्रमा मनो ऽस्य जह्रुः शफरीविवृत्तयः

hṛtapriyādṛṣṭivilāsavibhramā mano 'sya jahruḥ śapharīvivṛttayaḥ

4.4

तुतोष पश्यन् कलमस्य स अधिकं सवारिजे वारिणि रामणीयकम्

tutoṣa paśyan kalamasya sa adhikaṃ savārije vāriṇi rāmaṇīyakam

4.4.2

सुदुर्लभे नार्हति को ऽभिनन्दितुं प्रकर्षलक्ष्मीम् अनुरूपसंगमे

sudurlabhe nārhati ko 'bhinandituṃ prakarṣalakṣmīm anurūpasaṃgame

4.5

नुनोद तस्य स्थलपद्मिनीगतं वितर्कम् आविष्कृतफेनसंतति

nunoda tasya sthalapadminīgataṃ vitarkam āviṣkṛtaphenasaṃtati

4.5.2

अवाप्तकिञ्जल्कविभेदम् उच्चकैर् विवृत्तपाठीनपराहतं पयः

avāptakiñjalkavibhedam uccakair vivṛttapāṭhīnaparāhataṃ payaḥ

Kirātārjunīya