3.46

सव्रीडमन्दैर् इव निष्क्रियत्वान् नात्यर्थम् अस्त्रैर् अवभासमानः

savrīḍamandair iva niṣkriyatvān nātyartham astrair avabhāsamānaḥ

3.46.2

यशःक्षयक्षीणजलार्णवाभस् त्वम् अन्यम् आकारम् इवाभिपन्नः

yaśaḥkṣayakṣīṇajalārṇavābhas tvam anyam ākāram ivābhipannaḥ

3.47

दुःशासनामर्षरजोविकीर्णैर् एभिर् विनार्थैर् इव भाग्यनाथैः

duḥśāsanāmarṣarajovikīrṇair ebhir vinārthair iva bhāgyanāthaiḥ

3.47.2

केशैः कदर्थीकृतवीर्यसारः कच्चित् स एवासि धनंजयस् त्वम्

keśaiḥ kadarthīkṛtavīryasāraḥ kaccit sa evāsi dhanaṃjayas tvam

3.48

स क्षत्त्रियस् त्राणसहः सतां यस् तत् कार्मुकं कर्मसु यस्य शक्तिः

sa kṣattriyas trāṇasahaḥ satāṃ yas tat kārmukaṃ karmasu yasya śaktiḥ

3.48.2

वहन् द्वयीं यद्य् अफले ऽर्थजाते करोत्य् असंस्कारहताम् इवोक्तिम्

vahan dvayīṃ yady aphale 'rthajāte karoty asaṃskārahatām ivoktim

3.49

वीतौजसः सन्निधिमात्रशेषा भवत्कृतां भूतिम् अपेक्षमाणाः

vītaujasaḥ sannidhimātraśeṣā bhavatkṛtāṃ bhūtim apekṣamāṇāḥ

3.49.2

समानदुःखा इव नस् त्वदीयाः सरूपतां पार्थ गुणा भजन्ते

samānaduḥkhā iva nas tvadīyāḥ sarūpatāṃ pārtha guṇā bhajante

3.50

आक्षिप्यमाणं रिपुभिः प्रमादान् नागैर् इवालूनसटं मृगेन्द्रम्

ākṣipyamāṇaṃ ripubhiḥ pramādān nāgair ivālūnasaṭaṃ mṛgendram

3.50.2

त्वां धूर् इयं योग्यतयाधिरूढा दीप्त्या दिनश्रीर् इव तिग्मरश्मिम्

tvāṃ dhūr iyaṃ yogyatayādhirūḍhā dīptyā dinaśrīr iva tigmaraśmim

3.51

करोति यो ऽशेषजनातिरिक्तां सम्भावनाम् अर्थवतीं क्रियाभिः

karoti yo 'śeṣajanātiriktāṃ sambhāvanām arthavatīṃ kriyābhiḥ

3.51.2

संसत्सु जाते पुरुषाधिकारे न पूरणी तं समुपैति संख्या

saṃsatsu jāte puruṣādhikāre na pūraṇī taṃ samupaiti saṃkhyā

3.52

प्रियेषु यैः पार्थ विनोपपत्तेर् विचिन्त्यमानैः क्लमम् एति चेतः

priyeṣu yaiḥ pārtha vinopapatter vicintyamānaiḥ klamam eti cetaḥ

3.52.2

तव प्रयातस्य जयाय तेषां क्रियाद् अघानां मघवा विघातम्

tava prayātasya jayāya teṣāṃ kriyād aghānāṃ maghavā vighātam

3.53

मा गाश् चिरायैकचरः प्रमादं वसन्न् असंबाधशिवे ऽपि देशे

mā gāś cirāyaikacaraḥ pramādaṃ vasann asaṃbādhaśive 'pi deśe

3.53.2

मात्सर्यरागोपहतात्मनां हि स्खलन्ति साधुष्व् अपि मानसानि

mātsaryarāgopahatātmanāṃ hi skhalanti sādhuṣv api mānasāni

3.54

तद् आशु कुर्वन् वचनं महर्षेर् मनोरथान् नः सफलीकुरुष्व

tad āśu kurvan vacanaṃ maharṣer manorathān naḥ saphalīkuruṣva

3.54.2

प्रत्यागतं त्वास्मि कृतार्थम् एव स्तनोपपीडं परिरब्धुकामा

pratyāgataṃ tvāsmi kṛtārtham eva stanopapīḍaṃ parirabdhukāmā

3.55

उदीरितां ताम् इति याज्ञसेन्या नवीकृतोद्ग्राहितविप्रकाराम्

udīritāṃ tām iti yājñasenyā navīkṛtodgrāhitaviprakārām

3.55.2

आसाद्य वाचं स भृशं दिदीपे काष्ठाम् उदीचीम् इव तिग्मरश्मिः

āsādya vācaṃ sa bhṛśaṃ didīpe kāṣṭhām udīcīm iva tigmaraśmiḥ

Kirātārjunīya